<Зәбур 81

[1] Бьстьрен әшqи Хwәде, кӧ qәwата мә йә, бь шабуне Хwәдейе Аqуб бькьн гази.

[2] Мьqам хьн у дәфе хьн, чәнге дәнгхwәш т'әви чәнге зис.

[3] Йәкр'ожийа Һиведа бор'ийе хьн, ӧса жи дәма һив т'әмамбуне, ль р'ожа wе щәжьна мәда .

[4] Чьмки әв йәк qанун ә бона Исраел, ә'мьре Хwәдейе Аqуб ә.

[5] Әwи әв йәк бона Усьв кьрә qьрар, гава әw жь ә'рде Мьсьре дәрк'әт. Дәнгәк мьн бьһист кӧ нас нәдькьр:

[6] «Мьн мьле тә жь бьн бар дәрхьст у дәсте тә жь сәпәте данә бәрдан.

[7] Тәнгасийеда тә гази Мьн кьр у Мьн тӧ хьлаз кьри, жь бьн qьр'ч'инийа ә'wра Мьн щаба тә да, дәве авед Мерибаһе тӧ щер'ьбанди. (Сәла)

[8] Бьбьһе щьмә'та Мьн, Әз тәр'а дьбежьм, Исраел, хwәзи тӧ гӧһдарийа Мьн бьки!

[9] Гәрәке хwәдейе хәриб нава тәда т'ӧнә бә у хwәдейе хәриб нәһ'әбини.

[10] Әз ьм Хӧдан Хwәдейе тә, кӧ тӧ жь wәлате Мьсьре дәрхьсти. Дәве хwә р'ьнд вәкә Әзе wи дагьрьм!

[11] Ле щьмә'та Мьн дәнге Мьн нәбьһист у Исраеле гӧр'а Мьн нәкьр.

[12] Мьн жи әw данә qәлпе дьле wан, кӧ әw бь фькьред нав хwәда бьжин.

[13] Һәгәр щьмә'та Мьн гӧһдарийа Мьн бькә у Исраел р'ийа Мьнда һәр'ә,

[14] һьнге Әзе дьжмьнед wан зу та кьм у дәсте Хwә һьлдьмә сәр зордаред wан.

[15] Пәйк'әтийед Мьн wе ль бәр Мьн табьн у сәр бәлайе һ'әта-һ'әтайе вәбьн.

[16] Ле Әзе гәньме к'ьр'ьк тә бьдьмә хwарьне у һьнгьве жь qәйе тә бьдьмә т'еркьрьне».