<Зәбур 107

[1] Р'ази бьн жь Хӧдан, чьмки Әw qәнщ ә, чьмки һ'ӧба Wи һ'әта-һ'әтайе йә.

[2] Бьра аһа бежьн азадбуйед Хӧдан, к'ижан азад кьрьн жь дәсте дьжмьн

[3] у әw т'оп кьрьн жь wәлата, жь р'оһьлат у р'оавайе у жь бакӧр у башуре.

[4] Һьнәк бәр'ийеда хальфин, әwе р'ийа хькә-хwәлида, бажарәки майине wьр нәдитьн.

[5] Т'и у бьр'чи бун, дьл нава wанда хава дьчу.

[6] Һьнге тәнгасийа хwәда һәwара хwә Хӧдан анин у Wи әw хьлаз кьрьн жь хәмед гьран.

[7] Р'ийа р'астда Wи р'ебәрийа wан кьр, һ'әта кӧ гьһиштьнә бажаре майине.

[8] Бьра шькьрийе бьдьнә Хӧдан бона һ'ӧба Wи у кьрьнед Wийә һ'ӧжмәк'ар бона мәрьвайе!

[9] Чьмки Әw нәфса ч'ьлабуйи ав дькә у йе бьр'чи qәнщийева хьне дькә.

[10] Һьнәк тә'рийе у бьн сийа мьрьнеда р'уньштьбун, дәрд-кӧла у qәйдава гьредайи бун.

[11] Чьмки әw ль бәр готьнед Хwәде р'абун у шеwьред Йе Жорьн беһӧрмәт кьрьн.

[12] Әwи жи пе һ'але гьран дьле wан та кьрьн, әw к'әтьн, кәсәк т'ӧнәбу дәст бавита wан.

[13] Һьнге тәнгасийа хwәда газийа хwә Хӧдан анин у Wи әw азад кьрьн жь хәмед гьран.

[14] Әвана жь тә'ристанийе у сийа мьрьне дәрхьстьн у qәйдед wан шкенандьн.

[15] Бьра шькьрийе бьдьнә Хӧдан бона һ'ӧба Wи у кьрьнед Wийә һ'ӧжмәк'ар бона мәрьвайе!

[16] Чьмки дәргәһед сьфьр һурдәхwәши кьрьн у стунед һ'әсьни шкенандьн.

[17] Һьнәкә беһ'ьш жь дәст кьред хwәйә хьраб у нәһәqийед хwә тәнгасийе дьбиньн.

[18] Мә'де wан жь һ'әму хwарьне ль һәв дьк'әвә у дьчьн һ'әта ль бәр дәре мьрьне.

[19] Тәнгасийа хwәда газийа хwә Хӧдан анин у Wи әw азад кьрьн жь хәмед гьран.

[20] Хәбәра Хwә шанд әw qәнщ кьрьн у әw хьлаз кьрьн жь гор'ьстен.

[21] Бьра шькьрийе бьдьнә Хӧдан бона һ'ӧба Wи у кьрьнед Wийә һ'ӧжмәк'ар бона мәрьвайе!

[22] Бьра дийарийед р'азидарийе бьдьн у кьрьнед Wи бь әшq сальх кьн!

[23] Һьнәкед кӧ бь гәмийа сәр бә'рер'а дьчьн, авед мәзьнда шьхӧл дькьн,

[24] wана кьрьнед Хӧдан дитьн, ӧса жи к'әрәмәтед Wийә бебьнийеда.

[25] Әwи ә'мьри бе кьр у фьртонә р'акьр у пелед wе бьльнд кьрьн.

[26] Һ'әта ә'змен бьльнд бун, һ'әта бебьнийе бәржер чун, жь wе бәле гәмиван һ'әлийан-машийан.

[27] Мина сәрхwәш ль сәр ньга нәсәкьнин, заньстийа wана нәда wана т'ӧ к'арин.

[28] Тәнгасийа хwәда һәwара хwә Хӧдан анин у Wи әw хьлаз кьрьн жь хәмед гьран.

[29] Әwи фьртонә сәqьр'андьн у пел данә сәкьнандьн.

[30] Һьнге әw шабун гава пел сәкьнин у әw бьрьнә гәмиwаргәһа wан хwәсти.

[31] Бьра шькьрийе бьдьнә Хӧдан бона һ'ӧба Wи у кьрьнед Wийә һ'ӧжмәк'ар бона мәрьвайе!

[32] Бьра Wи бьльнд кьн щьвина щьмә'тада у пәсьне Wи бьдьн к'ома р'успийада.

[33] Әw ч'әма дькә чол у бәст у ч'ә'вканийа ә'рде зьһа.

[34] Wәлате шен дькә шор'әк'әт, бона хьрабийа бьнәлийед wьр.

[35] Әw чол у бәста дькә гола аве, ә'рде зьһа канийа аве.

[36] Бьр'чийа ль wьр щиwар дькә, әw бажаре майине ава дькьн.

[37] Ә'рде давежьн, тьрийа датиньн у дәрәмәте т'оп дькьн.

[38] Хӧдан дӧа ль wан дькә, гәләки ль һәв әw зедә дьбьн у һ'әйwанед wан Әw кем накә.

[39] Ле йед нәйар әw кем дьбьн, ньмьз дьбьн, жь дәст тәнгасийе, хьрабийе у к'әдәре.

[40] Әw бер'умәтийе ль сәр мирада дьр'ежинә, чол у бәста, р'е-дьрбада дьхальфинә. s

[41] Ле йе фәqир жь бәләнгазийе дәрдьхә, р'ьк'ьнйата wан мина кәре пез зедә дькә.

[42] Р'асте бьбиньн әве йәке у ша бьн, ле һ'әму нәһәqе дәве хwә бьгьрьн.

[43] К'и йә сәрwахт кӧ ван йәка бьдә бәр һ'ьша у һ'ӧба Хӧдан әw фә'м бькә.