<Зәбур 105

[1] Жь Хӧдан р'ази бьн, наве Wи бьдьн, кьред Wи нава щьмә'тада бәла кьн.

[2] Әшqи Wи бьстьрен, мьqаме Wир'а ле хьн, һ'әму к'әрәмәтед Wи сальх кьн.

[3] Пе наве Wийи пироз бьфьр'ьн, бьра дьле wан ша бә, йед Хӧдан дьгәр'ьн.

[4] Хӧдан у qӧдрәта Wи бьхwазьн, һәр гав р'уйе Wи бьгәр'ьн.

[5] Бир биньн к'әрәмәтед кӧ Wи кьрьн, нишанед Wи у qьраред дәве Wи.

[6] Һәй зӧр'әта Ибраһиме хӧламе Wи, гәли әwләдед Аqуб, бьжартийед Wи.

[7] Хӧдан ә Хwәде мә, сәр т'әмамийа ә'рде qьраред Wи нә.

[8] Әw пәймана Хwә һ'әта-һ'әтайе бир тинә у созе Хwәйи дайи жи һ'әта һ'әзар ньсьли,

[9] к'ижан кӧ да Ибраһим у сонде кӧ Исһаqр'а хwар.

[10] Аqубр'а жи әw мак кьр чаwа qанун у Исраелр'а жи пәймана һ'әта-һ'әтайе.

[11] Гот: «Ә'рде Кәнане Әзе бьдьмә тә, чаwа п'ара wартийа wә».

[12] Гава әwә кем бун, һьндьк у хәриб бун нава wеда,

[13] жь мьләтәки дәрбази нав мьләтәки дьн дьбун, жь п'адшатике дәрбази нав щьмә'тәкә дьн,

[14] Әwи нәһьшт кӧ йәк qәдьре wан к'әвә у бона wан ль п'адша һьлат,

[15] гот: «Qәдьре к'ьфшкьрийе Мьн нәк'әвьн у хьрабийе ль п'ехәмбәред Мьн нәкьн».

[16] Гава хәлайи ани сәр ә'рде у qьнйатед нанин данә бьр'ине,

[17] һьнге мәрик пешийа wан шанд, Усьв хӧламтийер'а һатә фьротан.

[18] Ньгед wи qәйдада шьдандьн у хәлаq авитьнә стӧкӧра wи,

[19] һ'әта wи wәхте готьна wи һатә сери, хәбәра Хӧдан әw щер'ьбанд.

[20] П'адша шанд у әw да вәкьрьн, мире щьмә'та әw азад кьр.

[21] Ль сәр мала хwә әw кьрә малхе у wәк'иле т'әмамийа һәбука хwә,

[22] wәки миред wи гора дьле хwә ширәт кә у р'успи-гьрәгьред wи билан кә.

[23] Һьнге Исраел һатә Мьсьре, Аqуб ль wәлате Һаме хәрибийеда ма.

[24] Хӧдан щьмә'та Хwә п'ьр' зедә кьр у әw жь нәйаред wан qәwаттьр кьр.

[25] Дьле wан гӧһар'т кӧ бьжәньнә щьмә'та Wи у тәнгасийе бьдьнә хӧламед Wи.

[26] Хӧламе Хwә Муса шанд, ӧса жи бьжартийе Хwә Һарун.

[27] Wана нава wанда нишанед Wи данә к'ьфше у к'әрәмәтед Wи wәлате Һамеда.

[28] Тә'ристан шанд кьрә шәвәр'әш у Мьсьри мьqабьли готьна Wи р'абун.

[29] Авед wан кьрә хун у мә'сийед wан qьр' кьр.

[30] Ә'рде wан бәqава т'ьжи кьр, һ'әта гозед п'адшайә р'азане жи.

[31] Әwи гот, меш-мор у моз һатьн у дәрдоред wан гьртьн.

[32] Дәwса баране тәйрок сәр wанда баранд у бьрq-бьруск wәлатед wанда.

[33] Тьри у һежиред wан хьст, һ'әму даред дорбәред wан һурдәхwәши кьр.

[34] Гот у кӧли һатьн, хьсила wанә беһ'әсаб,

[35] һ'әму шинаийа wәлет хwарьн, ӧса жи бәред ә'рде wан.

[36] Ньхӧрийед т'әмамийа wәлет хьст, т'әмамийа бәред wанә пеш.

[37] Исраел бь зер' у зив жь wьр дәрхьст, qәбилед wанда бет'аqәтәк т'ӧнәбу.

[38] Мьсьр ша бу бь дәрк'әтьна wан, чьмки саwа wан к'әтьбу сәр wе.

[39] Ә'wр дәрхьст бона ньхамтьне, агьр жи бона р'онайийа шәве.

[40] Wана хwәст Әwи суськ анин, бь нанед ә'змен әw т'ер кьрьн.

[41] Qәйа qәлашт ав һәр'ьки, мина ч'ем к'ьшийа бәр'ийеда.

[42] Чьмки созе Хwәйи пироз Wи бир ани, кӧ дабу Ибраһиме хӧламе Хwә.

[43] Щьмә'т дәрхьст бь дьле әшq у бьжартийед Хwә бь дәнге ша.

[44] Wәлатед мьләта Әwи да wан у к'әда хәриба кьрьн мьлк'е хwә,

[45] wәки т'әмийед Wи хwәй кьн у qанунед Wи бьqәдиньн. Һалелуйа!