<Зәбур 17

[1] Сәр һәqийеда бьньһер', йа Хӧдан, дина Хwә бьдә заринийа мьн у гӧһ бьдә дӧайе мьн, хельф дәрнайе жь дәве мьн.

[2] Бьра р'успитийа мьн жь диндара Тә бә, бьра ч'ә'ве Тә сәр р'астийе бә.

[3] Тә дьле мьн щер'ьбанд, шәв жи сәрик ль мьн да, Тә әз ә'нәнә кьрьм, нәдитьм тьштәки хьрабда, мьн ад кьрийә, хьраби т'ӧнәбә дәве мьнда.

[4] Wәкә готьнед дәве Тә, бона кьрьнед мәрьвайе, һ'әвза хwә дькьм жь зӧлмк'арийе.

[5] Гавед мьн шьдийайи нә шьвәр'ийед Тәда у ньгед мьн нәшьмьтин жь нав wанда.

[6] Мьн Тә кьр гази, Хwәдейо, Те щабе бьди у гӧһ бьди мьн, готьнед мьн бьбьһейи.

[7] Р'ә'ма Хwәйә һ'ӧжмәк'ар ә'йан бьки у Те бь дәсте Хwәйи р'асте бьки, кӧ спартийед Хwә жь нәйар хьлаз бьки.

[8] Мина р'онайийа ч'ә'ва Тӧ мьн хwәй кә, бьн сийа п'әр'е Хwәда мьн бьньхемә,

[9] жь бәр ч'ә'вед wан нәп'акед мьн дьшелиньн, жь wан хунхӧред кӧ дора мьн дьгьрьн.

[10] Ван бәз гьртийә, бе исаф бунә , бь дәве хwә хәбәрада бәрзәq бунә.

[11] П'е-п'е пәй мьн ьн, ва йә дора мьн ьн, ч'ә'ве wан ль сәр мьн ә, кӧ мьн ә'рде хьн.

[12] Әwә мина шере дькә кӧ бьдьр'инә, мина щәwрьке шерайи кӧ хwә дьтәлинә.

[13] Р'абә Хӧдан, пешийа wан Тӧ бьгьрә у дәвәр'уйа Тӧ wан бинә, пе шуре Хwә жь йед нәп'ак мьн хьлаз кә,

[14] пе дәсте Хwә, Хӧдано, мьн жь мәрьва хьлаз кә, жь wан мәрьвед ве дьне, п'ара к'ижана әв ә'мьр ә, кӧ зьке wан хәзәбед Хwәва Тӧ дадьгьри, кӧ ч'ә'в ль wан дьбьжьqьн у зар'ед wан пе т'ер ьн, бәрмайи жи зар'е зар'ед хwәр'а дьһельн.

[15] Ле бәле әзе р'уки р'успи диндара Тә бьньһер'ьм, гава һ'ьшйар бьм, нур-нәдәра Тә әзе т'ер бьм.