<Зәбур 27

[1] Хӧдан ә р'онаийа мьн у хьлазбуна мьн! Әзе жь к'е бьтьрсьм? Хӧдан ә qәсьра жийана мьн! Әзе жь к'е бьр'ьщьфьм?

[2] Гава хьраб һ'ьщуми сәр мьн дькьн, кӧ щанийа мьн һ'уфи хwә кьн, һьнге пәйк'әти у нәйаред мьн, хwәха дьльк'ӧмьн у дьк'әвьн.

[3] Һәгәр ордик р'абә бәр мьн, wе нәтьрсә qәт дьле мьн. Һәгәр шер'р'а бенә сәр мьн, wе диса ӧнда нәбә гӧмана мьн.

[4] Тьштәки жь Хӧдан әз дьхwазьм у әз һ'әйра ве йәкеда мә, т'әмамийа р'ожед ә'мьре хwәда, Хана Хӧданда әз бьминьм, жь диндара Wи әз т'ер нәбьм у һ'әйра П'арьстгәһа Wида бьм.

[5] Wе р'ожед охьрме гьранда, Әwе мьн вәшерә чардаха Хwәда, к'урайийа конда мьн бьньхемә у мьн бьльнд кә, бьдә сәр qәйе.

[6] Ле ньһа сәре мьне бьльнд бә, бәр wан нәйаред дора мьн гьртьнә, Коне Wида әзе бь дәнге әшqе qӧрбана бьдьм, әзе бьстьрем у мьqама Хӧданр'а ле хьм.

[7] Хӧдано, бьбьһе дәнге әве газийа мьн, р'ә'ме бькә у бьдә Тӧ ве щаба мьн.

[8] Дьле мьн бой Тә дьбежә: «Дә тӧ р'уйе Wи бьгәр'ә». Ва йә Хӧдан, әз жи р'уйе Тә дьгәр'ьм.

[9] Р'уйе Хwә Тӧ жь мьн вәнәшерә. Бь һерсе бәри хӧламе Хwә нәдә. Пьштоване мьн Тӧ буйи, пьшт нәдә мьн, мьн нәһелә, Хӧдан, Хьлазкьре мьн!

[10] Һәгәр дийа мьн у баве мьн, әw дәст жь мьн бьк'ьшиньн, ле Хӧдан wе qәбул кә мьн.

[11] Р'ийа Хwә Хӧдан, мьн һин кә, дьжмьнед мьнр'а ә'йнат кә, шьвәр'ийа р'астда мьн хwәй кә.

[12] Дәсте нәйарва бәр'нәдә мьн, кӧ шә'дед дәрәw р'адьбьн бәр мьн у гәф у гӧр'ийе һуйи мьн дькьн.

[13] Ле әз баwәр ьм, ә'рде зендийада qәнщийа Хӧдан әзе бьбиньм.

[14] Хӧданда гӧман бә! Сәрхwә у дьлтәйах бә! Хӧданда гӧман бә!