<Зәбур 50

[1] Йе Зор, Хӧдан, Хwәде хәбәр дьдә, жь р'оһьлате һ'әта р'оавайе гази дьнйайе дькә.

[2] Жь Сийоне, бәдәwәтийа Хwәдейә к'амьл дьбьрьqә.

[3] Хwәдейе мә те у Әw Хwә кәр' накә, агьре п'әр'ьтандьне ль пешийа Wи йә у дора Wи бобәлиска мәзьн ә.

[4] Әw жорда ә'рд у ә'змен шә'дә дьгьрә, кӧ диwана щьмә'та Хwә бькә.

[5] «Амьнед мьн щәм Мьн т'оп кьн, йед кӧ бь qӧрбане пәйман т'әв Мьн гьредан».

[6] Һьнге ә'зман р'астийа Wи дькьнә дәнги, кӧ Хwәде Хwәха һ'акьм ә. (Сәла)

[7] «Бьбьһе щьмә'та Мьн у Әзе хәбәр дьм, һәй Исраел, Әзе шә'де мьqабьли тә бьм, Әз Хwәде мә, Хwәдейе тә.

[8] Нә кӧ бона qӧрбанед тә Әз тә һьлтем, т'әвайишәwатед тә т'ьме бәр Мьн ьн.

[9] Әз жь мала тә щанәга нахwазьм, нә жи нерийа жь ахьле тә.

[10] Чьмки һ'әму бинбәре дарьстен әw йед Мьн ьн, ӧса жи һ'әйwанед ль сәр һ'әзара ч'ийа.

[11] Һ'әму тәйрәдед ч'ийа Әз нас дькьм у һ'әйwанед чоле ль бәр ч'ә'ве Мьн ьн.

[12] Һәгәр Әз бьр'чи бьм, Әз тәр'а набежьм, чьмки дьнйа хер-хьзна хwәва йа Мьн ә.

[13] Гәло Әз гоште щанәга дьхwьм, йан жи хуна нерийа вәдьхwьм?

[14] Хwәдер'а qӧрбана р'азидарийе бьдә, ад-qьраред хwә т'әв Йе Һәри Жорьн бинә сери.

[15] Охьрмед гьранда тӧ Мьн бькә гази, Әзе тә хьлаз кьм, те жи шькьрийе бьди Мьн».

[16] Ле бәле Хwәде гӧнәк'арар'а дьбежә: «Чи тәр'а нә, кӧ тӧ qәйдә-qанунед Мьн сальх дьки у пәймана Мьн дьди ль сәр заре хwә?

[17] Чьмки тӧ ль ширәтед Мьн нә хwәш и у хәбәра Мьн давежи пьшт гӧһе хwә.

[18] Гава дьз дьбини, дьди пәй дьчи у дьби һәвале зьнек'ара.

[19] Бона хьрабийе дәве хwә вәдьки у зьмане тә мьхәнәтийе дәртинә.

[20] Тӧ р'удьни давежи бьре хwә у хәйба кӧр'е дийа хwә дьки.

[21] Тә әв йәк кьрьн у Мьн дәнг нәкьр, тә т'ьре Әзи мина тә мә. Әзе тә һьлем у кьред тә бьдьмә бәр ч'ә'ве тә.

[22] Ве йәке фә'м бькьн, гәли Хwәдебиркьрийа, кӧ нәбә Әз wә qәт-qәти кьм у азадкьр т'ӧнә бә.

[23] Йе qӧрбана р'азидарийе дьдә, әw ә йе кӧ qәдьре Мьн дьгьрә у әwе мьqати р'ийа хwә дьбә, хьлазкьрьна хwә Әзе нишани wи дьм».