<Зәбур 104

[1] Пәсьне Хӧдан бьдә, нәфса мьн! Хӧдано, Хwәдейе мьн, Тӧ чьqаси мәзьн и! Бәдәwәти у р'умәтева wәргьрти йи,

[2] р'онайи мина к'ьнща ль Хwә кьрийә, ә'зман мина кон вәгьртийә.

[3] Тә Хана Хwә жор сәр ава чекьр, ә'wра дьки хwәр'а ә'рәбә у ль сәр баске бе дьчи.

[4] Байе Хwәр'а дьки qасьд, алава егьр жи qӧльхк'ар .

[5] Тә ә'рд дани ль сәр бьнгәһ, кӧ т'ӧ щар жь щи нәһ'әжә.

[6] Ава бебьни мина к'ьнщәке Тә ле кьрийә, ав ль сәре ч'ийа к'әтьнә.

[7] Әw жь һьлатьна Тә дьр'әвьн, жь гӧр'инийа ә'wре Тә вәдьк'ьшьн.

[8] Р'адьбьнә ль сәре ч'ийа, дьк'ьшьн дьчьнә нәwала, бәр бь wан щийед Тә бона wан к'ьфш кьрьнә.

[9] Тә синор дани кӧ же дәрбаз нәбьн у вәнәгәр'ьн р'уйе ә'рде нәньхемьн.

[10] Тӧ канийа нәwалада дәр тини, wан нава ч'ийада дьһәр'ькини,

[11] һ'әму һ'әйwанед чоле дьдьнә вәхwарьне у к'әред бәйани пе wан тенә авдане.

[12] Тәйрәдед ә'змана ль бәр wан дьминьн, нава ч'ьqьлада әw дәнг дьдьн.

[13] Тӧ жь мала Хwәйә жорьн ч'ийа ав дьди, р'уйе ә'рде пе меwа кьред Тә т'ер дьбә.

[14] Әw бона һ'әйwен гиһе шин дькә у п'ьнщар'е бона к'ара инсен, кӧ хӧрәк дәрхә жь ә'рде

[15] у шәраве, кӧ ша дькә дьле инсен, бьзьр кӧ бәшәра wан хwәш дькә, нан кӧ дьле wан дьшьдинә.

[16] Даред Хӧдан т'ер тен авдане, әрзед Лӧбнане жи Wи дач'ькандьнә.

[17] Ль wьр тәйрәда һелуна датиньн, малед ләгләга жи ль сәр сьпьндара нә.

[18] Чийайед бьльнд wаред к'увийа нә, qӧлч'ед зьнара жи сьт'аргәһа qотька нә.

[19] Тә һив ә'фьранд бона дәмсале, р'о wәхте хwә занә чаwа дьчә ава.

[20] Тә'ристан дьки у дьбә шәв, һ'әму р'ә'wьред дарьстен wеда дьгәр'ьн.

[21] Щәwрькед шера бона неч'ире дькьн мьр'ин у жь Хwәде хӧрәкед хwә дьпьрсин.

[22] Гава р'о дәрдьк'әвә, пашда вәдьк'ьшьн у нә'лед хwәда р'адьк'әвьн.

[23] Мәрьв дәрте дьчә к'аре хwә, шьхӧле хwәйи һ'әта еваре.

[24] Хӧдано, чьqаси гәләк ьн кьред Тә! Һәр тьшт бь сәрwахтийа Тә чебуйә, ә'фьринед Тәва ә'рд т'ьжи йә.

[25] Ва йә әв бә'ра мәзьн у бәр, беһ'әсаб шульки теда нә, һ'әйwанед бьч'ук т'әви мәзьна.

[26] Wеда гәми дьгәр'ьн, Леwйат'ане Тә ә'фьранд, кӧ әw теда бьлизә.

[27] Әвана һ'әму һивийа Тә нә, кӧ хӧрәкед wан wә'дәда бьди.

[28] Тӧ дьди wан, әw т'оп дьбьн, Дәсте Хwә вәдьки р'ьсqе хwәва т'ер дьбьн.

[29] Бәре Хwә ль wан дьгӧһези, әw дьтьрсьн, бина wан дьди гьртьн, әw дьмьрьн у ль хwәлийе вәдьгәр'ьн.

[30] Р'ӧһ'е Хwә дьшини әw дьә'фьрьн у жийана ну дьди р'уйе ә'рде.

[31] Дә бьра р'умәта Хӧдан һ'әта-һ'әтайе бә, Хӧдан ша бә бь кьрьнед Хwә!

[32] Сәр ә'рдеда дьньһер'ә әw дьләрьзә, ч'ийа дьк'әвә әw ду дькьн.

[33] Әшqи Хӧдан әзе бьстьрем, бь т'әмамийа ә'мьре хwә, әзе Хwәдейе хwәр'а мьqаме ле хьм һ'әта кӧ һәмә.

[34] Бьра стьрана мьн ль Wи хwәш бе, әзе пе Хӧдан әшq у ша бьм.

[35] Дә бьра гӧнәк'ар бәтавәбьн у нәп'ак сәр дьне т'ӧнәбьн. Пәсьне Хӧдан бьдә, нәфса мьн. Һалелуйа!