<Зәбур 34

[1] Һәр гав пәсьне Хӧдан әзе бьдьм, шькьрдайин wе жь заре мьн кем нәбә.

[2] Нәфса мьн пе Хӧдан дьфьр'ә, бьра йед мьлук бьбьһен у ша бьн.

[3] Т'әви мьн Хӧдан мәзьн кьн, әм т'әвайи наве Хӧдан бьльнд кьн.

[4] Әз Хӧдан гәр'ийам у Әwи щаба мьн да, әз жь һ'әму хоф-тьрса хьлаз кьрьм.

[5] Йед кӧ Wи дьньһер'ьн дьбьрьqьн, у р'уйед wане шәрма сор нәбьн.

[6] Әви фәqири кьрә гази, Хӧдан бьһист у әw жь һ'әму тәнгасийед wи хьлаз кьр.

[7] Мьлйак'әте Хӧдан т'әви хофк'ешед Wи йә, пьшта wан дьгьрә у wан хьлаз дькә.

[8] Тә'м кьн у бьзаньбьн кӧ Хӧдан ча qәнщ ә! Хwәзи wи мәрьви, йе кӧ хwә дайә бьн сийа Wи.

[9] Жь Хӧдан бьтьрсьн гәли пирозед Wи, чьмки хофк'ешед Wийе һ'әwще тьштәки нибьн.

[10] Щәwрькед шера бьр'чи у мӧһ'тащ дьбьн, ле әwед ль Хӧдан дьгәр'ьн, кемасийа т'ӧ qәнщийе набиньн.

[11] Wәрьн лаwо, гӧһ бьдьнә мьн, хофа Хӧдан әз wә һин кьм.

[12] К'и дьхwазә кӧ хwәш бьжи, гәләк р'ожа әw бьбинә?

[13] Бьра зьмане хwә жь хьрабийе хwәй кә заре хwә жи жь дәрәwийе.

[14] Жь хьрабийе вәгәр'ә, qәнщийе бькә, ә'дьлайе бьгәр'ә у ль пәй wе һәр'ә.

[15] Ч'ә'ве Хӧдан ль сәр р'аста йә у гӧһе Wи ль сәр һәwар-газийа wан ә.

[16] Бәре Хӧдан мьqабьли хьраба йә, кӧ биранина wан жь дьне бьдә һьлдане.

[17] Йед р'аст гази дькьн, Хӧдан дьбьһе у wан жь һ'әму тәнгасийа хьлаз дькә.

[18] Хӧдан незики дьлшкәстийа йә у мә'рьм-бәләнгаза дьдәбьринә.

[19] Тәнгасийед йе р'аст гәләк ьн, ле Хӧдан жь һ'әмуйа хьлаз дькә.

[20] Хӧдан һәр һәстуйед wи хwәй дькә, кӧ жь wан йәк жи нәшке .

[21] Хьрабийе хьраба бькӧжә у диwана пәйк'әтийед р'аста wе бьбә.

[22] Хӧдан нәфса хӧламед Хwә хьлаз дькә у диwана әwед кӧ хwә данә бьн сийа Wи набә .