<Зәбур 73

[1] Р'асти чьqаси qәнщ ә Хwәде һьндава Исраелда, һьндава йед хwәйе сьтqе дьле р'астда.

[2] Ле һьндьк мабу әз жь р'е бьк'әтама у мук мабу гавед мьн бьшьмьтийана,

[3] чьмки мьн дьле хwә кьр машоqе хwәр'азийа, гава мьн дина хwә да ачьхийа нәп'ака.

[4] Чьмки әw ньзаньн еш чь йә һ'әта мьрьне, әw ль сәр qәwата хwә жи дьминьн.

[5] Әw мина йед майин тәнгасийе набиньн у т'әви мәрьвед майин начәрчьрьн.

[6] Ләма жи бабахи мина т'оq стӧкӧра wанда йә у зордари мина хьшьр хwәва дькьн.

[7] Жь к'окбуне ч'ә'вед wан дьбьжьqьн, фькьред дьле wан бе синор ьн.

[8] Әw сәр хәлqе дьк'әньн, мьхәнәти хәбәр дьдьн у жорда әw гәфе дьхwьн,

[9] бәр бь ә'змен дәве хwә вәдькьн, бь зьманед хwә т'әмамийа ә'рде ль һәв дьхьн.

[10] Ләма жи щьмә'та Wи хwә ль wан дьгьрә, бь дәввәкьри гӧһдарийа готьнед wан дькә .

[11] Дьбежьн: «Хwәдейе чь бьзаньбә? Гәло Йе Һәри Жорьн һаш пе һәйә?»

[12] Аwа әв ьн әwед нәп'ак, әwә т'ьме бе дәрд-кӧл ьн у һәбуке зедә дькьн.

[13] Кӧ ӧса йә бадиһәwа мьн хwә паqьж хwәйи кьрийә у дәстед хwә пе бесущийе шуштьнә.

[14] Әз һәр р'ож ледайи мә у һәр сьбәһ к'әwанди мә.

[15] Һәгәр мьн бьгота: «Әзе жи ви щур'әйи хәбәр дьм», һьнге әзе бьбума хайине щьмә'та Тә.

[16] Һьнге әз фькьрим кӧ ве йәке фә'м бькьм, ле әв йәк сәр мьн гьран р'уньшт,

[17] һ'әта кӧ к'әтьмә пирозгәһа Хwәде, һьнге ахьрийа wана әз пе һ'әсийам.

[18] Р'асти Тә нәп'ак кьрьнә р'ийа шьмшат, бәржере кәнделда wан дьшини.

[19] Чаwа ньшкева әw т'ур'-т'ур'и бун, бәтавәбун у бь тьрсе к'ок ле һатьн.

[20] Гава Тӧ р'аби, Те жь wан зьвер би, чаwа йәк жь хәwна хьраб һ'ьшйар дьбә.

[21] Гава дьле мьн qьлqьли у навдьле мьн к'ьр-к'ьри,

[22] һьнге әз бум йәки бефә'м у нәзан, ль бәр Тә бумә мина һ'әйwан.

[23] Ле әз т'ьме т'әви Тә мә, Тӧ дәсте мьни р'асте дьгьри.

[24] Тӧ пе ширәтед Хwә р'е нишани мьн дьки у паше жи бь р'умәте мьн qәбул дьки.

[25] К'и мьн һәйә ль ә'змен? Ль сәр ә'рде жи пештьри Тә тьштәки дьн әз нахwазьм.

[26] Һәгәр бәдән у дьле мьн бьһ'әльн, ле бәле Хwәде йә ськ'ана дьле мьн у һ'әта-һ'әтайе п'ара мьн.

[27] Р'асти әwед Тә дьһельн, ӧнда дьбьн, Те к'ока wан һ'әмуйа бини, йед кӧ һьндава Тәда беә'сьл ьн.

[28] Ле бона мьн qәнщ ә, незики Хwәде бьм, мьн гӧмана хwә дайә ль сәр Хӧдан Хwәде, wәки һ'әму кьрьнед Тә бькьмә дәнги.