<Зәбур 103

[1] Пәсьне Хӧдан бьдә, нәфса мьн у һәр тьште нава мьнда, наве Wийи пироз.

[2] Пәсьне Хӧдан бьдә, нәфса мьн у бир нәкә һ'әму qәнщийед Wи.

[3] Әw дьбахшинә һ'әму гӧнәйед тә у qәнщ дькә һ'әму нәхwәшийед тә,

[4] ә'мьре тә жь т'ьрбе Әw азад дькә у һ'ӧб у дьлованийева дьхәмьлинә,

[5] хwәстьна тә бәрәк'әтийева т'ьжи дькә, щаһьлтийа тә мина тәйра ну дьбә.

[6] Хӧдан бона һ'әму бәләнгаза р'астийе у һәqийе дькә.

[7] Әwи р'ийед Хwә нишани Муса кьрьн у кьрьнед Хwә жи әwләдед Исраел.

[8] Дьлшәwат у р'ә'м ә Хӧдан, хwәйе сәбьр-ськ'ане у һ'ӧбеда хьнейо.

[9] Әw һ'әта хьлазийе һерс нак'әвә, һ'әта-һ'әтайе к'ине нажо.

[10] Әw wәкә гӧнәйед мә, сәре мә накә у wәкә нәһәqийед мә надә бәр мә.

[11] Ле чьqас ә'зман жь ә'рде бьльндтьр ә, һаqас жи һ'ӧба Wи һьндава хофк'ешед Wида мәзьн ә.

[12] Чьqас р'оһьлат жь р'оавайе дуртьр ә, һаqаси жи гӧнәйед мә жь мә дур хьсти нә.

[13] Чаwа дьле баве ль сәр әwләде wи дьшәwьтә, ӧса жи дьле Хӧдан ль сәр хофк'ешед Wи дьшәwьтә.

[14] Чьмки Әw занә мәйа мә у бир тинә кӧ әм хали нә.

[15] Р'ожед мерьв мина гиһе нә, мина гӧла чоле кӧ гӧл дьдә,

[16] Гава ба сәрр'а дәрбаз дьбә, ӧнда дьбә у щийе wе иди wе нас накә.

[17] Һ'ӧба Хӧдан жь һәр-һәйе һ'әта-һ'әтайе йә, ль сәр хофк'ешед Wи йә у һәqийа Wи т'әви кӧр'ед кӧр'а йә,

[18] ль сәр wан ә, кӧ хwәй дькьн пәймана Wи у бир тиньн wан т'әмийед Wи у пек тиньн.

[19] Хӧдан т'әхте хwә данийә ль ә'змана, п'адшатийа Wи һ'ӧкӧми ль сәр һ'әмуйа дькә.

[20] Пәсьне Хӧдан бьдьн, мьлйак'әтед Wийә хwәйиqәwат, кӧ һун дьqәдиньн готьна Wи, дькьн гӧһдарийа дәнге Wи.

[21] Пәсьне Хӧдан бьдьн, гәли ордийед Wи, һ'әму qӧльхк'аред Wи, кӧ ә'мьре Wи дьqәдиньн.

[22] Пәсьне Хӧдан бьдьн, һ'әму ә'фьринед Wи, wан һ'әму щийед бьн һ'ӧкӧмәтийа Wи. Пәсьне Хӧдан бьдә, нәфса мьн!