<Зәбур 132

[1] Хӧдан, Тӧ Даwьд бир бинә т'әви һ'әму щәфайед wи,

[2] чаwа wи Хӧданр'а сонд хwар у Зоре Аqубр'а ад-qьрар кьр.

[3] «Әзе ньг нәвежьмә шемика хwә , нак'әвьмә нава щи-ньвине хwә,

[4] хәwе нәкьмә ч'ә'ве хwә, нәйньм сәр һәв бьжангед хwә,

[5] һ'әта нәбиньм щики Хӧданр'а, щи-wарәки Зоре Аqубр'а».

[6] Мә бьһист бона Сьндоqе Әфрат'еда у мә әw дит нава дәшта Йаһареда.

[7] «Wәрьн әм бьк'әвьн щи-wаре Wи у сәре хwә дайньн ль бәр ньгед Wи».

[8] Р'абә, Хӧдан, wаре р'ьһ'әтийа Хwә, Тӧ у Сьндоqа Зорайийа Хwә.

[9] К'аһинед Тә бьра р'астийе хwә кьн у амьнед Тә бьра әшq у ша бьн.

[10] Бьдә хатьре Даwьде хӧламе Хwә, бәре Хwә нәгӧһезә жь к'ьфшкьрийе Хwә.

[11] Хӧдан р'асти Даwьдр'а сонд хwар, Әwе сонде Хwә инк'ар нәкә: «Әзе йәки дәрхьм жь бәдәна тә, бьдьмә р'уньштьн сәр к'ӧрсийа тә .

[12] Һәгәр пәйман у готьнед Мьн әwләдед тә бьqәдиньн, к'ижана Әзе wана һин кьм, һьнге әwләдед wан жи сәр к'ӧрсийа тә һ'әта-һ'әтайе wе р'унен».

[13] Чьмки Хӧдан Сийон бьжарт, хwәст кӧ Хwәр'а бькә щи-wар.

[14] «Әв ә wаре р'ьһ'әтийа Мьнә һ'әта-һ'әте. Әзе вьр бьм, чьмки әва Мьн бәгәм кьр.

[15] Хӧрәкед wе Әзе сәрда бьр'ежьм, к'әсибед wе Әзе пе нен т'ер кьм.

[16] Әзе к'аһина хьлазбунева wәргьрьм у амьнед wе Әзе әшq у ша кьм,

[17] Даwьдр'а wьр струки бьдьмә дәрхьстьне у ч'ьре саз кьм бона к'ьфшкьрийе Хwә.

[18] Әзе шәрме ль дьжмьнед wи wәргьрьм, ле т'аще ль сәре wи wе гӧл дә у бьч'ьрусә ».