<Зәбур 38

[1] Хӧдано! Бь һерса Хwә мьн һьлнәйе у бь к'әла Хwә мьн ширәт нәкә.

[2] Чьмки тиред Тә ль мьн к'әтьнә у дәсте Тә ль сәр мьн гьран буйә.

[3] Жь алава һерса Тә, щики мьни сах нәмайә, дәст гӧнәйе мьн, һәстуки мьни р'ьһ'әт нәмайә.

[4] Чьмки нәһәqийед мьн жь сәре мьн бьльндтьр бунә, мина баре гьран әw ль сәр мьн гьран бунә.

[5] Р'уйе бефә'мийа мьнда, бьринед мьн бин к'әтьне дьр'ьзьн.

[6] Дәвәр'уйа чуйи, qӧдумк'әти, һәр р'ож бь дьле кӧл дьгәр'ьм,

[7] чьмки навдьле мьн кӧл-бьринава т'ьжи нә у нав мьнда щики сах нәмайә.

[8] Әз һ'алк'әти у гәләки һ'ьнщьр'и, дькьм зарин жь ахинийа дьле хwә.

[9] Хwәйо, хwәстьна мьн Тәва ә'йан ә, к'әсәра дьле мьн жь Тә вәшарти нинә.

[10] Дьле мьн ле дьхә, qӧдум к'әтьмә, р'онайа ч'ә'ве мьн жи ль мьн бьрийа йә.

[11] Һ'ьзкьрийед мьн у һәвалед мьн, хwә дур дьгьрьн жь бьринед мьн, пьсмамед мьн жи дур сәкьнин.

[12] Әwед ә'мьре мьн дьгәр'ьн, т'әла датиньн у йед хьрабийа мьн дьхwазьн, бона к'әтьна мьн хьраб хәбәр дьдьн у һәр р'ож мьхәнәтийе дьфькьрьн.

[13] Ле әз мина кәр'а набьһем у мина йе лал кӧ дәве хwә вәнакә.

[14] Әз бумә мәрьве чаwа кӧ набьһе у дәве wида щабәк т'ӧнә.

[15] Әз хwә дьсперьмә Тә, Хӧдано, Те щабе бьди, йа Хwәйи, Хwәдейе мьн.

[16] Чьмки мьн гот: «Бьра әw дьле хwә мьн ша нәкьн у фьр'наq нәбьн гава бьшьмьтә ньге мьн».

[17] Ва йә әз к'әтьна хwә дьбиньм, һәр гав кӧла мьн бәр бина мьн ә.

[18] Әз нәһәqийед хwә ашкәрә дьбежьм, бона гӧнәйед хwә хwәда дьшәwьтьм.

[19] Ле нәйаред мьн сьһ'әт у qәwат ьн, щийе һәqи-нәһәq хернәхwазед мьн зедә дьбьн.

[20] Йед бәр qәнщийева хьрабийе мьн дькьн, бона wе йәке мьqабьли мьн р'адьбьн, чьмки әз хwә qәнщийе дьгьрьм.

[21] Мьн нәһелә Хӧдано! Хwәдейе мьн жь мьн Тӧ дур нәк'әвә.

[22] Зу бькә wәрә һәwара мьн, йа Хӧдан, Хьлазкьре мьн!