<Зәбур 66

[1] Һәй т'әмамийа дьнйайе, бь дьле ша Хwәдер'а дәнге хwә һьлдьн.

[2] Дә бьстьрен әшqи р'умәта наве Wи, шькьрийе бьдьнә р'умәта Wи.

[3] Бежьнә Хwәде: «Чьqас хоф ьн кьрьнед Тә! Жь qәwата Тәйә зор, нәйар ль бәр Тә дьqӧрьфьн.

[4] Дьнйа пева ль бәр Тә та дьбә, әшqи Тә дьстьрен, әшqи наве Тә дьстьрен». (Сәла)

[5] Wәрьн у бьбиньн кьред Хwәде, Әw бь кьред Хwә хоф ә сәр мәрьвайе.

[6] Wи бә'р кьрә зьһабун, ч'әме авер'а п'ийа дәрбаз бун, ль wьр әм пе Wи ша бун.

[7] Бь qӧдрәта Хwә һ'әта-һ'әтайе сәрwерийе дькә, ч'ә'ве Wи п'утп'арьста дьбинә, дә бьра сәрһьлдайи фьр'наq нәбьн. (Сәла)

[8] Гәли мьләта, пәсьне Хwәде бьдьн у дәнге пәсьндайина Wи бьдьнә бьһистьне.

[9] Йе кӧ нәфса мә сах дьһелә у наһелә кӧ ньге мә бьшьмьтә.

[10] Хӧдан Тә әм ә'нәнә кьрьн у һ'әландьн, чаwа кӧ зив те һ'әландьне.

[11] Тә әм кьрьнә т'ор'е, баре гьран да сәр мьле мә.

[12] Тә сәре мә кьрьнә бьн п'ийед сийара. Әм агьр у авер'а дәрбаз бун, ле бәле Тә әм дәрхьстьнә фьрәqәтийе.

[13] Әзе бь дийаришәwата бемә Мала Тә, wан ад-qьраред хwә биньмә сери,

[14] к'ижан левед мьн соз данә у тәнгасийеда жь дәве мьн дәрк'әтьнә.

[15] Әзе дийарийед к'ок п'ешк'еши Тә кьм, т'әви шәwьтандьна бина бәрана, щанәга у нерийа әзе qӧрбан биньм. (Сәла)

[16] Wәрьн бьбьһен, һ'әмуйед Хwәдехоф, әзе wәр'а бежьм Әwи чь кьр бона мьн.

[17] Мьн бь дәве хwә гази Wи кьр, пәсьндайин сәр заре хwә кем нәкьр.

[18] Һәгәр нәһәqи мьн хwәда хwәй кьра, Хӧдан wе дәнге мьн нәбьһиста.

[19] Ле бәле Хwәде бьһист у гӧһ да дәнге дӧайе мьн.

[20] Шькьр жь Хwәдер'а, кӧ пьшт надә дӧайе мьн у һ'ӧба Хwә жь мьн дур нәхьст.