[1] Oi chhong sîn ke sṳ̂-kô chan-mî Song-chú! Chhiòn sṳ-kie tû oi lòi kô-siung Song-chú!
[2] Oi tui Song-chú chhong-kô, oi siung-chan Kì ke miàng! Oi tak-ngit chhòn-yòng Kì chṳ́n-kiu ke fuk-yîm!
[3] Oi tui van-koet siên-chhòn Kì ke yùng-kông! Oi tui van-mìn kóng-hí Kì ví-thai ke chok-vì!
[4] Song-chú he chui ví-thai ke, yin-tông su chui-thai ke chan-mî; Kì yin-tông pí só-yû ke sṳ̀n-mìn tet-tó kha-tô ke kin-vi.
[5] Lie̍t-koet só-yû ke sṳ̀n-mìn put-ko he ngiéu-siong; chúng-he chhóng-chho chû-thiên ke chhiu-he Song-chú.
[6] Yùng-kông, vî-ngiàm chhai Kì ke mien-chhièn; thai-nèn, yùng-fà chhûng-mân Kì ke sṳn-só.
[7] Thi-song ke van-chhu̍k â, yin-tông siung-chan Song-chú! Ngì-têu oi siung-chan Kì ke yùng-kông lâu thai-nèn!
[8] Oi siung-chan Song-chú yùng-kông ke miàng; oi tai chi-vu̍t lòi chin-ngi̍p Kì ke sṳn-thien.
[9] Oi yung sṳn-kiet ke tá-pan lòi khúi-pai Song-chú; chhiòn-thi oi chhai Kì ke mien-chhièn pi̍t-pi̍t-chhat!
[10] Oi hiong van-koet siên-pu: “Song-chú chóng-khièn! Thai-thi kiên-ku, m̀-voi yèu-thung; Kì oi yung kûng-chṳn lòi sṳ́m-phan van-mìn.”
[11] Chû-thiên oi fôn-hí, thai-thi oi khoai-lo̍k! Hói lâu khì-chûng ke sâng-vu̍t â, oi thai-sâng fôn-fû!
[12] Thièn-yèn lâu khì-chûng ke chhut-sán â, oi fôn-hí hí-lòi! Ke-sṳ̀, su-nà chûng ke su-muk oi chhai Song-chú mien-chhièn fôn-hí chhong-kô;
[13] yîn-vi Song-chú oi lòi, Kì oi lòi chhṳ-lî thiên-ha. Kì oi yung kûng-ngi thúng-chhṳ sṳ-kie; Kì oi yung sin-sṳ̍t tui-thai van-mìn.