[1] Ngài ke sîm â, oi siung-chan Song-chú! Ngài ke sṳ̂n-sîm-lìn oi siung-chan Kì ke sṳn-miàng!
[2] Ngài ke sîm â, oi siung-chan Song-chú! M̀-hó m̀ ki-tet Kì yit-chhiet ke ên-fi!
[3] Kì sa-miên ngài só-yû ke chhui-ok; Kì yî-hó ngài yit-chhiet ke phiang-thung.
[4] Kì kiu ngài thot-lì sí-mòng; Kì yung chhṳ̀-oi lâu lìn-mén cho ngài ke miên-liù.
[5] Kì yung chui-hó ke tûng-sî lòi mân-chiuk ngài, pûn ngài yit-chhṳ̍t chhiâng-chhûn, yúng-khien chhiong yîn-tiâu.
[6] Song-chú thoi su ap-pet ke sṳ̂n-yên; Kì vi-tó kì-têu sṳ̂n-chông kûng-ngi.
[7] Kì tui Mô-sî khí-sṳ Kì ke kie-va̍k, pûn Yî-set-lie̍t-ngìn tî Kì ke chok-vì.
[8] Song-chú yû lìn-mén lâu ên-tién, mò sùi-phien fat-khién, mân-yû put-pien ke chhṳ̀-oi.
[9] Kì m̀-voi yit-chhṳ̍t chit-phi; Kì m̀-voi yún-yén pot-at.
[10] Kì mò cheu ngài-têu ke chhui-ko chit-fa̍t ngài-têu; Kì ya mò yîn-vi ngài-têu ke chhui-ok po-yin ngài-têu.
[11] Thiên lì thi yû kí-kô, tui kin-vi Kì ke ngìn, Kì ke chhṳ̀-oi ya yû kí-thai!
[12] Tûng lì sî yû kí-yén, Kì sṳ́ ngài-têu ke ko-fam lì-khôi ngài-têu ya yû án-yén!
[13] Â-pâ he ngióng-pân thung-siak chhṳ-kâ ke chṳ́-ńg, Song-chú ya ngióng-pân thung-siak kin-vi Kì ke ngìn.
[14] Kì tî ngài-têu ke pún-chṳt; Kì ki-tet ngài-têu put-ko he nài cho ke.
[15] Lun-tó sṳ-ngìn, kì-têu ke sâng-miang chhiu-chhiong chhó. Kì-têu chhiong yâ-thi ke fâ, sâng-to án-chiâng;
[16] pûn fûng yit chhôi chhiu mò-thet hi, mò-ngìn chai chhìm tet-tó kì.
[17] Chúng-he Song-chú ke chhṳ̀-oi kûi-pûn kin-vi Kì ke ngìn, tui song-kú to yún-yén; Kì ke kûng-ngi ya kûi-pûn kì-têu ke chṳ́-chṳ́ sûn-sûn,
[18] chhiu-he ke-têu sṳ̀n-sîm sú Kì ke khie-yok, chûng-sṳ̍t chûn-hàng Kì kie-min ke ngìn.
[19] Song-chú chhai thiên-táng sat pó-chho; Kì cho vòng thúng-chhṳ só-yû ke yit-chhiet.
[20] Thai-yû nèn-li̍t ke thiên-sṳ́ â, thâng Kì min-lin, sun-chhiùng Kì chṳ́-yi ke sṳ́-chá â, ngì-têu oi siung-chan Song-chú!
[21] Thiên-táng yit-chhiet yû khièn-nèn, chûn-hàng Kì chṳ́-yi ke nù-phu̍k â, ngì-têu oi siung-chan Song-chú!
[22] Yit-chhiet Kì só chhóng-chho ke â, oi siung-chan Song-chú! Oi chhai Kì thúng-chhṳ ke tak só-chhai siung-chan Kì! Ngài ke sîm â, oi siung-chan Song-chú!