[1] Song-chú, ngài kin-oi Ngì! Ngì he ngài ke li̍t-liong!
[2] Song-chú he ngài ke ngàm-sa̍k, ngài ke sàng-pó, ngài ke kiu-chú; ngài ke Song-ti he ngài ke phàn-sa̍k, ngài phit-nan ke só-chhai; Kì he ngài ke tún-phài, chṳ́n-kiu ke kok, lâu yeu-sai.
[3] Ngài khiù-ham yin-tông su chan-mî ke Song-chú, ngài chhiu tet chṳ́n-kiu thot-lì ngài ke sù-thi̍t.
[4] Sí-mòng ke káu-sok vì-tén ngài; fí-me̍t ke kip-liù chhûng-tén ngài.
[5] Yîm-kiên ke káu-sok chhàn-tén ngài; sí-mòng ke lò-mióng khièm ko-lòi.
[6] Chhai kip-nan chûng ngài khiù-ham Song-chú; ngài khiù ngài ke Song-ti chṳ́n-kiu ngài. Kì chhai Kì ke sṳn-thien tú thâng-tó ngài ke sâng; ngài khiù-ham ke sâng-yîm chhòn-ngi̍p Kì ke ngí-kûng.
[7] Ke-sṳ̀, chhiu yû thai thi-thûng; khiùn-sân ke kîn-kî yèu-thung, yîn-vi Song-ti thai fat-khién!
[8] Kì ke phi-kûng yû yên chhung-tén chhut-lòi, choi phùn-chhut lie̍t-fó lâu chho̍k-tén ke fó-than.
[9] Kì tá-khôi thiên, chhîn-chhṳ kong-lìm; yû phûn-phûn ke vû-yùn chhai Kì ke kiok-hâ.
[10] Kì khì-tén kî-lu-pak lòi pî, chia fûng ke yi̍t-kap pî chhin-kiak.
[11] Kì yung vû-am chhiong pu-phùng châ-tén chhṳ-kâ; yû chhin-phûn ke yùn lâu súi-hi vì-tén Kì;
[12] pên-pho̍k lâu ngiap-lang tui Kì mien-chhièn ke yùng-kông chhut-lòi, chhôn-ko phûn-phûn ke vû-yùn sa chhut-lòi.
[13] Song-chú tui thiên-táng tá lùi-kûng; Chṳ-kô-chá fat-chhut Kì ke sâng.
[14] Kì sa-chien kiuk-chéu Kì ke sù-thi̍t; Kì kín ngiap-lang sṳ́ kì-têu lon-thet.
[15] Song-chú â, Ngì yit-ha thai-sâng tot, phi-kûng ke hi yit-ha phùn chhut-lòi, súi chhiu fûn-khôi, hói-tái hien chhut-lòi, thai-thi ke kîn-kî ya lu chhut-lòi.
[16] Song-chú tui táng-kô chhûn-sú chok-tén ngài, chiông ngài tui thai-súi chûng-kiên lâi chhut-lòi.
[17] Kì kiu ngài thot-lì chhin-hiûng ke tui-thi̍t, thot-lì yit-chhiet yen-hen ngài ke thi̍t-ngìn; yîn-vi kì-têu chhiòn-phu pí ngài kha-khiòng.
[18] Ngài tù-tó châi-nan ke sṳ̀-chiet, tông-ngit kì-têu chhiu lòi kûng-kit; hó-tet yû Song-chú pó-fu ngài.
[19] Kì tai ngài to tông-fat ke só-chhai; Kì kiu ngài, yîn-vi Kì fôn-hí ngài.
[20] Song-chú cheu ngài ke chṳn-chhṳ̍t po-tap ngài, Kì su-fuk pûn ngài, yîn-vi ngài sûng-sú chhiang-li.
[21] Ngài chûn-hàng Song-chú ke tho-lu, m̀-sṳt phoi-ngia̍k ngài ke Song-ti.
[22] Ngài chûn-hàng Kì yit-chhiet ke fap-li̍t; ya m̀-sṳt vì-poi Kì ke min-lin.
[23] Ngài chhai Kì mien-chhièn mò vû-tiám; ngài yû yén-yén lì-khôi chhui-ok.
[24] Só-yî Song-chú cheu ngài ke chṳn-chhṳ̍t po-tap ngài, yîn-vi Kì khon ngài cho sûng-sú chhiang-li ke ngìn.
[25] Song-chú â, tui sin-sṳ̍t ke ngìn, Ngì hién-mìn Ngì ke sin-sṳ̍t; tui mò vû-tiám ke, Ngì hién-mìn Ngì ke vàn-chhiòn.
[26] Tui sùn-kiet ke ngìn, Ngì hién-mìn Ngì ke sùn-kiet; tui kúi-cha ke ngìn, Ngì hién-mìn Ngì ke chîn-mìn.
[27] Ngì chṳ́n-kiu khiâm-pî ke ngìn; Ngì kong-tâi kiêu-ngau ke ngìn.
[28] Song-chú — ngài ke Song-ti â, he Ngì pûn ngài ke tên chho̍k hí-lòi, chiông ngài ke vû-am pien-cho kông-mìn!
[29] Thùng ngài khiung-ha kûng-ngi̍p thi̍t-ngìn kiûn-chhui ke chhiu-he Ngì; thùng ngài khiung-ha thiau-ko vì-chhiòng ke he ngài ke Song-ti!
[30] Lun-tó Song-ti, Kì só-hàng ke khi̍t yèn-mân! Kì kóng ke fa chui chṳ̂n-sṳ̍t! Yit-chhiet khiù Kì pí-yu ke ngìn, Kì chhiu cho kì-têu ke tún-phài.
[31] Chhù-liáu Song-chú, mò phe̍t ke Song-ti; vì-yû Song-ti he pó-fu ngài-têu ke phàn-sa̍k.
[32] He Song-ti su-pûn ngài li̍t-liong; Kì sṳ́ ngài ke tho-lu phìn-ôn.
[33] Kì sṳ́ ngài ke kiok chhiong lu̍k-é ke kiok, pûn ngài chhai kô-sân-táng khî-to chhai-chhai.
[34] Kì hiun-lien ngài ke sú, pûn ngài tî oi ngióng-pân siông-chhṳ̀, pûn ngài ke sú-kut lâi tet-khôi thùng kiûng.
[35] Song-chú â, Ngì su-pûn ngài tet-kiu ke tún-phài; Ngì yung yu-sú lòi chṳ̂-chhṳ̀ ngài; Ngì pí-yu ngài, pûn ngài hîn-vong.
[36] Ngì sṳ́ ngài só-hàng ke lu pien-fat, sṳ́ ngài ke kiok m̀-voi tá-thong-thiu.
[37] Ngài tûi thi̍t-ngìn ke sṳ̀, yit-thin tûi tet-tó, mò tá-yàng kì-têu, ngài chhie̍t-tui m̀ chón-thèu.
[38] Ngài chiông kì-têu tá-to hong m̀ hí-lòi; kì-têu chhiòn-phu vang chhai ngài ke kiok-hâ.
[39] Ngì su ngài siông-chhṳ̀ ke li̍t-liong; sṳ́ ngài ke thi̍t-ngìn hòng-fu̍k ngài.
[40] Ngì sṳ́ ngài ke tui-thi̍t fân-chón sṳ̂n thò-chéu; ngài chiông ke-têu yen-hen ngài ke ngìn sêu-me̍t.
[41] Kì-têu hêm kiu-miang, chúng-he mò-ngìn lòi kiu kì-têu; kì-têu khiù-ham Song-chú, chúng-he Kì m̀ en kì-têu.
[42] Ngài tá-sui kì-têu, chhiong chhṳ̀n-fôi pûn fûng chhôi-san; ngài put-chéu kì-têu, chhiong so kiê-hong ke nài-mòi.
[43] Pak-siang poi-phan, Ngì chṳ́n-kiu ngài, Ngì li̍p ngài cho lie̍t-koet ke thèu; lièn ngài m̀-sṳt ke ngìn-mìn ya fu̍k-sṳ ngài.
[44] Kì-têu yit thâng-tó he ngài chhiu kûi-sun; ngoi-chhu̍k ngìn hòng-fu̍k chhai ngài ke mien-chhièn.
[45] Kì-têu ke yúng-hi m̀ kien-thet chhiang-chhiang, pi̍t-pi̍t-chhat chéu-chhut kì-têu ke yàng-fòng.
[46] Song-chú he yún-sên ke! Oi siung-chan ngài ke phàn-sa̍k! Song-ti he ngài ke chṳ́n-kiu-chá! Oi chhòn-yòng Kì ke ví-thai!
[47] Kì chhiu-he vi ngài sṳ̂n-yên ke Song-ti; sṳ́ van-chhu̍k hòng-fu̍k ngài ke chhiu-he Kì,
[48] kiu ngài thot-lì thi̍t-ngìn ke ya he Kì. Song-chú â, Ngì sṳ́ ngài yàng-ko tui-thi̍t; Ngì chṳ́n-kiu ngài thot-lì khiòng-phau ke ngìn.
[49] Só-yî, ngài oi chhai lie̍t-koet chûng chan-mî Ngì; ngài oi ngìm-sṳ̂ chhong-kô siung-chan Ngì ke miàng.
[50] Song-chú sṳ́ Kì só li̍p ke vòng tet-tó thai sṳn-li; Kì su put-pien ke chhṳ̀-oi pûn Kì kò-yù só sat-li̍p ke, chhiu-he pûn Thai-ví lâu kì ke heu-thoi, yit-chhṳ̍t to yún-yén.