[1] Hàng-vì mò hó hiàm, chûn-hàng Song-chú kau-sṳ ke, liá-chúng ngìn sṳ̍t-chhai yû fuk-hi ô!
[2] Thâng-chhiùng Song-chú ke fap-lin, chhiòn-sîm chhìm-khiù Kì ke, liá-chúng ngìn sṳ̍t-chhai yû fuk-hi ô!
[3] Liá-chúng ngìn chhie̍t-tui m̀ cho fái-sṳ; tân-tân chûn-hàng Song-chú ke tho-lu.
[4] Song-chú â, Ngì pân-pu kau-hiun pûn ngài-têu, ham ngài-têu ngin-chṳ̂n chûn-hàng.
[5] Ngài chṳ̂n hî-mong nèn hàng-sṳ kiên-thin, chûn-hàng Ngì só kûi-thin ke!
[6] Ngài na khon-chhung Ngì só-yû ke kie-min, chhiu m̀-voi tù-tó kien-seu.
[7] Ngài kín ho̍k-voi Ngì kûng-chṳn ke fap-chet, chhiu voi yung chṳn-chhṳ̍t ke sîm siung-chan Ngì.
[8] Ngài oi chûn-hàng Ngì ke kûi-chet; khiù Ngì m̀-hó piong-thet ngài!
[9] Heu-sâng-ngìn oi ngióng-pân ko sùn-kiet ke sên-fa̍t â? Chhiu-he oi chûn-hàng Ngì ke fa!
[10] Ngài chhiòn-sîm chhìm-khiù Ngì; khiù Ngì m̀-hó pûn ngài vì-poi Ngì ke kie-min.
[11] Ngài chiông Ngì ke fa ki chhai sîm-chûng, miên-tet ngài tet-chhui Ngì.
[12] Song-chú â, ngài siung-chan Ngì! Khiù Ngì kâu ngài Ngì ke kûi-chet.
[13] Ngài oi thai-sâng chhòn-yòng Ngì só-li̍p yit-chhiet ke fap-chet.
[14] Ngài hí-oi Ngì ke fap-lin, yàng-ko yit-chhiet ke chhòi-pó.
[15] Ngài me̍t-sióng Ngì ke kau-hiun; ngài khon-chhung Ngì ke tho-lu.
[16] Ngài fî-sòng fôn-hí Ngì ke kûi-chet; ngài m̀-voi m̀ ki-tet Ngì ke fa.
[17] Khiù Ngì ên-thai Ngì ke phu̍k-ngìn, su ngài sâng-miang lòi chûn-hàng Ngì ke fa.
[18] Khiù Ngì tá-khôi ngài ke muk-chû, pûn ngài khon-chhut Ngì kau-sṳ chûng o-meu ke chṳ̂n-lî.
[19] Ngài chhai sṳ-kiên cho ngìn-hak; khiù Ngì m̀-hó tui ngài khong-tén Ngì ke kie-min.
[20] Ngài ke sîm sṳ̀-sòng chho̍k-kip, tông hot-mu Ngì ke fap-chet.
[21] Ngì chit-phi kiêu-ngau ke ngìn, chu-chú phoi-ngia̍k Ngì kie-min ke ngìn.
[22] Khiù Ngì chhù-thet ngài só-su ke siû-yu̍k lâu méu-sṳ, yîn-vi ngài kiún-sú Ngì ke fap-lin.
[23] Sûi-yèn thúng-chhṳ-chá chhô khiung-ha, sióng-chhin phan-fap oi hoi ngài, ngài he Ngì ke phu̍k-ngìn, hàn-he oi me̍t-sióng Ngì ke kûi-chet.
[24] Ngì ke fap-lin sṳ́ ngài fôn-hí, he ngài ke liòng-sṳ̂ yit-yû.
[25] Ngài ke sâng-miang hiám-hiám kûi-thú; khiù Ngì cheu Ngì ke yin-hí sṳ́ ngài fán-sâng!
[26] Ngài ko-pha̍k ngài só-hàng ke, Ngì chhiu en ngài; khiù Ngì kâu ngài Ngì ke kûi-chet!
[27] Khiù Ngì pûn ngài liáu-kié Ngì ke kau-hiun; ngài oi me̍t-sióng Ngì khì-meu ke chok-vì.
[28] Ngài yù-sèu to kín-liù muk-chṳp; khiù Ngì cheu Ngì ke yin-hí pûn ngài kiên-khiòng hí-lòi.
[29] Khiù Ngì pûn ngài lì-khôi hî-ká ke lu, khôi-ên chiông Ngì ke kau-sṳ su-pûn ngài.
[30] Ngài só-sién ke he chṳ̂n-lî ke lu; ngài chiông Ngì ke fap-chet pài chhai mien-chhièn.
[31] Song-chú â, ngài kiên-chhṳ̀ chûn-hàng Ngì ke fap-lin; khiù Ngì m̀-hó pûn ngài tù-tó kien-seu.
[32] Ngài fî-sòng ngie̍t-sîm chûn-hàng Ngì ke kie-min, yîn-vi Ngì sṳ́ ngài ke sîm thai-yû chṳ-fi.
[33] Song-chú â, khiù Ngì chiông Ngì kûi-chet ke yi-ngi kâu ngài; ngài ngien-yi chûn-hàng to-tái.
[34] Khiù Ngì pûn ngài mìn-pha̍k Ngì ke kau-sṳ; ngài chhiu yit-sîm chûn-hàng.
[35] Khiù Ngì tai ngài hàng Ngì kie-min ke lu, yîn-vi liá he ngài só fôn-hí ke.
[36] Khiù Ngì pûn ngài lo̍k-yi chûn-hàng Ngì ke fap-lin, yàng-ko oi-mu chhièn-chhòi.
[37] Khiù Ngì pûn ngài mò khon-chhung hî-khûng ke sṳ; khiù Ngì pûn ngài hàng Ngì ke tho-lu, von-sîn ngài ke sâng-miang.
[38] Ngì tui kin-vi Ngì ke ngìn só yin-hí ke, khiù Ngì sṳ̍t-hien chhai Ngì ke phu̍k-ngìn sṳ̂n-song.
[39] Khiù Ngì sṳ́ ngài só-kiâng ke siû-yu̍k lì-khôi ngài, yîn-vi Ngì ke fap-chet án-hó.
[40] Ngì ke kau-hiun he ngài só hot-mu ke; khiù Ngì yîn-vi Ngì ke kûng-ngi su ngài sîn sâng-miang!
[41] Song-chú â, khiù Ngì tui ngài hién-chhut Ngì ke chhṳ̀-oi, khiù Ngì cheu Ngì ke yin-hí chṳ́n-kiu ngài;
[42] ngài chhiu yû fa hó en vú-yu̍k ngài ke ngìn, yîn-vi ngài sin-kho Ngì ke fa.
[43] Khiù Ngì sṳ́ ngài ke choi mò lì-khôi chṳ̂n-lî, yîn-vi ngài ke hî-mong he chhai Ngì ke fap-chet.
[44] Ngài oi ki-siu̍k chûn-hàng Ngì ke kau-sṳ, chhṳ̍t-to yún-yún yén-yén.
[45] Ngài voi chhṳ-yù chhṳ-chhai lòi sên-fa̍t, yîn-vi ngài chûn-hàng Ngì ke kau-hiun.
[46] Ngài voi tui kiûn-vòng kóng-lun Ngì ke fap-lin, ngài ya m̀-voi tù-tó kien-seu.
[47] Ngài chûn-hàng Ngì ke kie-min chhiu chhin khoai-lo̍k, yîn-vi ngài oi-mu Ngì ke kie-min.
[48] Ngài chûn-chhung yu oi-mu Ngì ke kie-min; ngài ya oi me̍t-sióng Ngì ke kûi-chet.
[49] Khiù Ngì ki-tet Ngì tui phu̍k-ngìn ke yin-hí, yîn-vi Ngì ke fa pûn ngài tet-tó hî-mong.
[50] Chhiu-he chhai fam-nan chûng ngài ya tet-tó ôn-ví, yîn-vi Ngì ke yin-hí von-sîn ngài ke sâng-miang.
[51] Kiêu-ngau ke ngìn yit-chhṳ̍t chhin-miang vú-yu̍k ngài, chúng-he ngài m̀-sṳt phiên-lì Ngì ke kau-sṳ.
[52] Ngài ki-tet Ngì chó-siên ke fap-chet; Song-chú â, Ngì ke fap-chet pûn ngài tet-tó ôn-ví.
[53] Khon-tó fái-ngìn hi-chhie̍t Ngì ke kau-sṳ, ngài chhiu sîm-fó thai-chho̍k.
[54] Ngài chhai sṳ-song cho ngìn-hak; Ngì ke kûi-chet sàng-cho ngài ke sṳ̂-kô.
[55] Song-chú â, lièn am-pû-sṳ̀ ngài ya ki-ngiam Ngì ke miàng; ngài oi kiún-sú Ngì ke kau-sṳ.
[56] Sun-chhiùng Ngì ke kau-hiun, chhiu-he ngài ke khoai-lo̍k.
[57] Song-chú â, Ngì he ngài ke fuk-fun; ngài kiet-sîm oi chûn-hàng Ngì ke fa.
[58] Ngài chhiòn-sîm khiù Ngì khôi-ên, khiù Ngì cheu Ngì ke yin-hí lìn-mén ngài!
[59] Ngài fán-sén chhṳ-kâ só-hàng ke lu, chhiu chón-hiong Ngì ke fap-lin.
[60] Ngài chûn-hàng Ngì ke kie-min, m̀-kám thìn-thò yèn-chhṳ̀.
[61] Cho fái-sṳ ke ngìn yung sok-è khún-tén ngài, ngài hàn-he mò m̀ ki-tet Ngì ke kau-sṳ.
[62] Yîn-vi Ngì kûng-ngi ke fap-chet, ngài pan-ya hong-hí-lòi kám-chhia Ngì.
[63] Kin-vi Ngì, sun-chhiùng Ngì kau-hiun ke ngìn, chhiòn-phu he ngài ke phèn-yû.
[64] Song-chú â, Ngì ke chhṳ̀-oi chhûng-mân chhiòn-thi; khiù Ngì kâu ngài Ngì ke kûi-chet.
[65] Song-chú â, cheu Ngì só yin-hí ke, Ngì yit-chhṳ̍t hó khoán-thai Ngì ke phu̍k-ngìn.
[66] Khiù Ngì su ngài chṳ-fi lâu chṳ-sṳt, yîn-vi ngài sin-chhiùng Ngì ke kie-min.
[67] Ngì chit-fa̍t ngài yî-chhièn, ngài sòng-sòng hàng chhâ-lu, chúng-he liá-ha ngài chûn-hàng Ngì ke fa.
[68] Ngì he chṳ-san, só-hàng ke chhiòn-he hó-sṳ; khiù Ngì kâu ngài Ngì ke kûi-chet.
[69] Kiêu-ngau ke ngìn kóng fâ-liâu kûng-kit ngài, ngài hàn-he yit-sîm yit-yi chûn-sú Ngì ke kau-hiun.
[70] Kì-têu ke sîm múng-múng túng-túng; chúng-he ngài chhin fôn-hí Ngì ke kau-sṳ.
[71] Ngài só-su ke chit-fa̍t tui ngài yû li-yit, yîn-vi voi pûn ngài ho̍k-si̍p Ngì ke kûi-chet.
[72] Ngì pân-pu ke kau-sṳ he ngài ke pó-pi, yàng-ko chhiên-chhiên van-van ke kîm-ngiùn.
[73] He Ngì ke sú chhóng-chho ngài, yu fù-chhṳ̀ ngài; khiù Ngì pûn ngài chṳ-fi, hó ho̍k-si̍p Ngì ke kie-min.
[74] Kin-vi Ngì ke ngìn yit khon-tó ngài chhiu fôn-hí, yîn-vi ngài ngióng-mong Ngì ke fa.
[75] Song-chú â, ngài tî Ngì ke sṳ́m-phan chhin kûng-tong; Ngì chit-fa̍t ngài, he cheu Ngì ke sin-sṳ̍t.
[76] Khiù Ngì cheu Ngì tui phu̍k-ngìn só yin-hí ke, yung Ngì ke chhṳ̀-oi ôn-ví ngài.
[77] Khiù Ngì lìn-mén ngài, liù ngài ke miang, yîn-vi ngài chhin fôn-hí Ngì ke kau-sṳ.
[78] Ngien ke-têu kiêu-ngau ke ngìn kien-seu; kì-têu mò-yèn mò-ku yên-vóng ngài; lun-tó ngài, ngài oi me̍t-sióng Ngì ke kau-hiun.
[79] Ngien ke-têu kin-vi Ngì ke ngìn chón ngài liá-vi lòi, ngin-sṳt Ngì fap-lin ke ngìn oi thùng ngài khiung-ha.
[80] Ngien ngài yit-sîm yit-yi chûn-hàng Ngì ke kûi-chet, án-ngiòng ngài chang m̀-voi chṳ-to kien-seu.
[81] Ngài ke sîm hot-mu Ngì ke kiu-ên, ngài ngióng-mong Ngì ke fa.
[82] Ngài ke muk-chû phan-mong Ngì ke yin-hí to fâ-thet; ngài kín-mun kóng: “Ngì kí-sṳ̀ chang oi ôn-ví ngài nè?”
[83] Sûi-yèn ngài chhiong yit-chak khiu ke lan chiú-thoi, ngài hàn-he mò m̀ ki-tet Ngì ke kûi-chet.
[84] Ngì ke phu̍k-ngìn hàn-oi tén kí-kiú nè? Ngì kí-sṳ̀ chang oi sṳ́m-phan pet-hoi ngài ke ngìn nè?
[85] Kiêu-ngau ke ngìn yet ham-chiáng oi hoi ngài; kì-têu he m̀ chûn-sú Ngì kau-sṳ ke ngìn.
[86] Ngì ke kie-min chhiòn-phu sin-sṳ̍t khó-kho! Ke-têu ngìn mò-yèn mò-ku pet-hoi ngài; khiù Ngì pông-chhu ngài!
[87] Kì-têu hiám-hiám chiông ngài tui sṳ-kiên chhù-thet, chúng-he ngài hàn-he mò lì-khôi Ngì ke kau-hiun.
[88] Khiù Ngì cheu Ngì ke chhṳ̀-oi kiu ngài ke sâng-miang, hó sṳ́ ngài chûn-hàng Ngì só pân-pu ke fap-lin.
[89] Song-chú â, Ngì ke fa yún-yén chhòng-chhùn, chhai thiên-táng fî-sòng kiên-thin.
[90] Ngì ke sin-sṳ̍t van-thoi chhòng-chhùn; Ngì kien-li̍p thi, thi chhiu yit-chhṳ̍t chhùn-chhai.
[91] Van-yû cheu Ngì ke ôn-phài, to-kîm hàn-chhôi, yîn-vi van-vu̍t he Ngì ke nù-phu̍k.
[92] Ngài na m̀-he fôn-hí Ngì ke kau-sṳ, chó chhiu chhai khú-nan chûng me̍t-mòng lô!
[93] Ngài yún-yén m̀-voi m̀ ki-tet Ngì ke kau-hiun, yîn-vi Ngì thûng-ko kì-têu su ngài sâng-miang.
[94] Ngài he su̍k Ngì ke, khiù Ngì kiu ngài, yîn-vi ngài chhìm-khiù Ngì ke kau-hiun.
[95] Fái-ngìn tén-tén oi chiông ngài me̍t-thet, ngài hàn-he sṳ̂-sióng Ngì ke fap-lin.
[96] Ngài khon-chhut yit-chhiet yèn-mân ke sṳ hàn-he yû-han; vì-yû Ngì ke kie-min he vù-khiùng ke.
[97] Ngài he ngióng-pân oi-mu Ngì ke kau-sṳ â! Ngài kûi-ngit me̍t-sióng kì.
[98] Ngì ke kie-min sṳ̀-sòng chhai ngài ke sîm-chûng, sṳ́ ngài pí sù-thi̍t kha chhûng-mìn.
[99] Ngài pí ngài só-yû ke sîn-sâng hàn-kha lìn-thûng, yîn-vi ngài me̍t-sióng Ngì ke fap-lin.
[100] Ngài pí ló-ngìn-kâ kha yû chṳ-fi, yîn-vi ngài chûn-sú Ngì ke kau-hiun.
[101] Ngài hi-chhie̍t yit-chhiet ke fái hàng-vì, yîn-vi ngài oi chûn-sú Ngì ke fa.
[102] Ngài mò lì-khôi Ngì ke fap-chet, yîn-vi kau-thô ngài ke he Ngì.
[103] Ngì ke fa tui ngài lòi-kóng sṳ̍t-chhai chṳ̂n thiàm, chhai ngài khiéu-chûng pí phûng-thòng hàn-kha thiàm!
[104] Ngì ke kau-hiun sṳ́ ngài mìn-pha̍k sṳ-fî, só-yî ngài yen-hen yit-chhiet fái hàng-vì.
[105] Ngì ke fa he ngài kiok-chhièn ke tên, he ngài lu-song ke kông.
[106] Ngài sṳt fat-sṳ, yit-thin oi chûn-sú, oi chûn-hàng Ngì kûng-ngi ke fap-chet.
[107] Song-chú â, ngài só-su ke khú chhin chhûng; khiù Ngì cheu Ngì ke yin-hí von-sîn ngài ke sâng-miang.
[108] Song-chú â, chiap-na̍p ngài kám-chhia ke khì-tó; khiù Ngì kâu ngài Ngì ke fap-chet.
[109] Ngài ke sâng-miang sṳ̀-sòng yû ngùi-hiám, chúng-he ngài mò m̀ ki-tet Ngì ke kau-sṳ.
[110] Fái-ngìn sat lò-mióng lòi-hoi ngài, ngài hàn-he mò phiên-lì Ngì ke kau-hiun.
[111] Ngì ke fap-lin he ngài yún-kiú ke sán-ngia̍p, he ngài sîm-kôn só fôn-hí ke.
[112] Ngài kiet-sîm chûn-hàng Ngì ke kûi-chet, chhṳ̍t-to ngài lì-khôi liá sṳ-kiên.
[113] Ngài yen-hen sîm-fài lióng-yi ke ngìn; ngài oi-mu ke he Ngì ke kau-sṳ.
[114] Ngì he ngài ke phit-nan-só, ngài ke tún-phài; ngài ngióng-mong Ngì ke fa.
[115] Chok-ok ke ngìn â, lì-khôi ngài! Ngài oi chûn-sú ngài Song-ti ke kie-min.
[116] Khiù Ngì cheu Ngì ke yin-hí fù-chhṳ̀ ngài, liù ngài ke miang; khiù Ngì m̀-hó pûn ngài sṳt-mong kien-seu.
[117] Ngì fù-chhṳ̀ ngài, ngài chhiu voi tet-kiu; ngài oi sṳ̀-sòng chu-yi Ngì ke kûi-chet.
[118] Ngì hi-chhie̍t phiên-lì Ngì kûi-chet ke ngìn; kì-têu só thù-mèu ke chhiòn he hî-khûng.
[119] Ngì khon sṳ-song ke fái-ngìn cho lá-sap, só-yî ngài oi-mu Ngì ke fap-lin.
[120] Ngài kiâng Ngì to kûi-sṳ̂n pi̍t-pi̍t-chhat; ngài chhin-kiâng Ngì ke sṳ́m-phan.
[121] Ngài yit-chhṳ̍t cheu kûng-chṳn lâu kûng-ngi hàng-sṳ; khiù Ngì m̀-hó pûn ngài lo̍k chhai sù-thi̍t ke sú-chûng!
[122] Khiù Ngì pó-chṳn Ngì phu̍k-ngìn ke hen-fuk; khiù Ngì m̀-hó pûn kiêu-ngau ke ngìn khî-fu ngài!
[123] Yîn-vi phan-mong Ngì ke kiu-ên, tén-heu Ngì só yin-hí ke chṳ́n-kiu, ngài ke muk-chû mong-to fâ-thet.
[124] Khiù Ngì cheu Ngì ke chhṳ̀-oi ên-thai Ngì ke phu̍k-ngìn; khiù Ngì kâu ngài Ngì ke kûi-chet.
[125] Ngài he Ngì ke phu̍k-ngìn; khiù Ngì su ngài chṳ-fi, pûn ngài mìn-pha̍k Ngì ke fap-lin.
[126] Song-chú â, Ngì sṳ́m-phan ke sṳ̀-kiên to lé, yîn-vi ngìn chhiòn-phu phoi-ngia̍k Ngì ke kau-sṳ.
[127] Ngài oi-mu Ngì ke kie-min yàng-ko vòng-kîm, sṳm-chṳ yàng-ko chîn-lien ke sùn-kîm;
[128] só-yî, ngài sun-chhiùng Ngì yit-chhiet ke kau-hiun; ngài ya chhin-nâu yit-chhiet hî-ká ke hàng-vì.
[129] Ngì ke fap-lin sṳ̍t-chhai khì-meu, só-yî ngài chhiòn-sîm sun-fu̍k.
[130] Ngì ke fa yit kié-sṳt chhiu fat-chhut kông, pûn tân-sùn ke ngìn tet-tó chṳ-fi.
[131] Ngài choi so̍k-so̍k, hi kip-kip, yîn-vi ngài hot-mu Ngì ke kie-min.
[132] Khiù Ngì chón-sṳ̂n hiong ngài, lìn-mén ngài, chhiong Ngì tui ke-têu kin-oi Ngì ke ngìn án-ngiòng.
[133] Khiù Ngì cheu Ngì ke yin-hí sṳ́ ngài kiok-phu vún-thin, mo̍k pûn chhui-ok hot-chṳ ngài.
[134] Khiù Ngì kiu ngài thot-lì ap-chṳ ngài ke ngìn, pûn ngài yû-hó chûn-hàng Ngì ke kau-hiun.
[135] Khiù Ngì mien-hiong Ngì ke phu̍k-ngìn, kông-cheu ngài; khiù Ngì kâu ngài Ngì ke kûi-chet.
[136] Ngài ke muk-chṳp chhiong hò-pa súi liù tén-hâ, yîn-vi ngìn m̀-hén chûn-sú Ngì ke kau-sṳ.
[137] Song-chú â, Ngì he kûng-ngi ke; Ngì ke fap-chet he kûng-chṳn ke.
[138] Ngì só pân-pu ke fap-lin, vàn-chhiòn kûng-ngi, chhie̍t-tui khó-kho.
[139] Ngài tông khién, fó chhin-thai, yîn-vi ngài ke sù-thi̍t khon-khiâng Ngì ke fa.
[140] Ngì ke yin-hí vàn-chhiòn sùn-chṳ̂n, he Ngì ke phu̍k-ngìn só oi-mu ke.
[141] Ngài chhin pî-chhien yu pûn-ngìn khon-khiâng, chúng-he ngài mò m̀ ki-tet Ngì ke kau-hiun.
[142] Ngì ke kûng-ngi yún-yén chhòng-chhùn; Ngì ke kau-sṳ chhiu-he chṳ̂n-lî.
[143] Ngài tù-tó fam-nan lâu khun-khú, chúng-he Ngì ke kie-min tai-pûn ngài khoai-lo̍k.
[144] Ngì ke fap-lin yún-yén kûng-chṳn; khiù Ngì sṳ́ ngài liáu-kié, liù ngài ke sâng-miang.
[145] Song-chú â, ngài chhiòn-sîm khiù-ham, khiù Ngì en ngài; ngài yit-thin voi sun-chhiùng Ngì ke kûi-chet.
[146] Ngài khiù-ham Ngì, khiù Ngì chṳ́n-kiu ngài; ngài yit-thin voi chûn-hàng Ngì ke fap-lin.
[147] Thiên màng kông ngài chhiu hong-hí-lòi khiù-ham Ngì; ngài ngióng-mong Ngì ke fa.
[148] Ngài kûi-ya muk kîm-kîm, me̍t-sióng Ngì ke yin-hí.
[149] Song-chú â, khiù Ngì cheu Ngì ke chhṳ̀-oi thâng ngài ke khì-khiù; khiù Ngì cheu Ngì ke kûng-ngi su ngài sîn sâng-miang.
[150] Yung kúi-kie pet-hoi ngài ke ngìn yí-kîn chiap-khiun ngài; kì-têu yén-lì Ngì ke kau-sṳ.
[151] Chúng-he, Song-chú â, Ngì chhai ngài ke sṳ̂n-piên; Ngì ke kie-min tak-ki he chṳ̂n-lî.
[152] Ngài chó chhiu ho̍k-si̍p Ngì ke fap-lin; ngài tî Ngì sṳ́ kì-têu yún-yén kiên-thin.
[153] Khiù Ngì chhung-sṳ ngài só-su ke khú-nan, khiù Ngì kiu ngài, yîn-vi ngài m̀-sṳt fut-lio̍k Ngì ke kau-sṳ.
[154] Khiù Ngì vi ngài sṳ̂n-yên, théu-piong ngài; cheu Ngì ke yin-hí kiu ngài ke miang.
[155] Kiu-ên lì-khôi fái-ngìn chhin-yén, yîn-vi kì-têu m̀ chhìm-khiù Ngì ke kûi-chet.
[156] Chúng-he, Song-chú â, Ngì ke chhṳ̀-pî khi̍t-thai; khiù Ngì cheu Ngì ke kûng-ngi su ngài sîn sâng-miang.
[157] Pet-hoi ngài, tui-thi̍t ngài ke ngìn chhin-tô, ngài hàn-he mò phiên-lì Ngì ke fap-lin.
[158] Ngài khon-tó phoi-ngia̍k ke ngìn chhiu chhin-nâu, yîn-vi kì-têu m̀ chûn-sú Ngì ke fa.
[159] Song-chú â, Ngì khon ngài ngióng-pân oi-mu Ngì ke kau-hiun! Khiù Ngì cheu Ngì put-pien ke chhṳ̀-oi kiu ngài ke sâng-miang!
[160] Ngì ke fa chhiòn-phu he chṳ̂n-lî; Ngì kûng-ngi ke fap-chet lûng-chúng chhùn-to yún-yén!
[161] Ke-têu yû khièn-sṳ ke ngìn mò-yèn mò-ku pet-hoi ngài, chúng-he ngài ke sîm chûn-chhung Ngì ke fa.
[162] Ngài yîn-vi Ngì ke yin-hí fî-sòng fôn-hí, chhiong ngìn fat-hien tô-tô ke pó-vu̍t.
[163] Hî-hî ká-ká he ngài só yen-hen, ngài só-nâu ke, chúng-he Ngì ke kau-sṳ he ngài só oi-mu ke.
[164] Yîn-vi Ngì kûng-ngi ke fap-chet, ngài tak-ngit chan-mî Ngì chhit-pái.
[165] Oi-mu Ngì kau-sṳ ke ngìn voi yû thai phìn-ôn, mò má-ke nèn sṳ́ kì-têu tiet-tó.
[166] Song-chú â, ngài tén-heu Ngì ke chṳ́n-kiu; ngài chûn-hàng Ngì ke kie-min.
[167] Ngài chûn-sú Ngì ke fap-lin; ngài chhiòn-sîm oi-mu kì-têu.
[168] Ngài chûn-hàng Ngì ke kau-hiun lâu fap-lin, yîn-vi Ngì chhîn-chhú ngài yit-chhiet ke hàng-vì.
[169] Song-chú â, ngien ngài ke khiù-ham tha̍t-to Ngì mien-chhièn; khiù Ngì cheu Ngì ke fa su-pûn ngài chṳ-fi.
[170] Ngien ngài ke khì-tó tha̍t-to Ngì mien-chhièn; khiù Ngì cheu Ngì ke yin-hí chṳ́n-kiu ngài.
[171] Ngài ke choi oi sṳ̀-sòng chan-mî Ngì, yîn-vi Ngì kâu ngài Ngì ke kûi-chet.
[172] Ngài ke sa̍t-mà oi chhong-kô siung-chan Ngì ke yin-hí, yîn-vi Ngì ke kie-min chhiòn-phu he kûng-ngi ke.
[173] Khiù Ngì sùi-sṳ̀ chhûn-sú pông-chhu ngài, yîn-vi ngài kiet-sîm chûn-chhiùng Ngì ke kau-hiun.
[174] Song-chú â, ngài hot-mu Ngì ke kiu-ên! Ngì ke kau-sṳ he ngài só fôn-hí ke.
[175] Khiù Ngì liù ngài ke miang, hó pûn ngài chan-mî Ngì! Ngien Ngì ke fap-chet pông-chhu ngài!
[176] Ngài chhiong mì-sṳt ke yòng hàng m̀-chho̍k lu; khiù Ngì lòi chhìm Ngì ke phu̍k-ngìn, yîn-vi ngài m̀-sṳt m̀ ki-tet Ngì ke kie-min.