[1] Song-ti â, khiù Ngì thâng ngài kín-chhên ke sâng! Khiù Ngì kiu ngài thot-lì sù-thi̍t ke khiúng-hak!
[2] Khiù Ngì pó-fu ngài mo̍k pûn fái-ngìn am-son, ya m̀-hó pûn yîm-hiám ke ngìn ham-hoi.
[3] Kì-têu nò-li sa̍t-mà, chhiu-chhiong nò tô-é, chhiong sa-chien án-ngiòng, fat-chhut ok-thu̍k ke fa.
[4] Kì-têu am-chûng mài-fu̍k, oi sa mò-chhui ke ngìn; khôi-kiûng chhiu sa, chhiòn-mò ku-li.
[5] Kì-têu pí-chhṳ́ kâu-sô, yîm-mèu cho fái-sṳ; kì-têu kie-va̍k chiông lò-mióng sat-to chhin pi-me̍t, kóng: “Liá-têu lò-mióng má-ngìn khon-tet-tó nè?”
[6] Kì-têu tak-pái sat-hó kúi-kie chhiu kóng: “Liá kie-mèu he ngài-têu yung-chhin sîm-kî sat-kie ke!” Ngìn ke sîm-sṳ̂ yi-ngiam sṳ̍t-chhai chṳ̂n-nàn lî-kié!
[7] Chúng-he, Song-ti oi yung chien sa kì-têu; kì-têu voi chhai fut-yèn chṳ̂-kiên chho̍k-sông.
[8] Kì oi yîn-vi kì-têu ke fa sêu-me̍t kì-têu; khon-tó kì-têu ke ngìn chhiòn-phu voi kín yèu-thèu.
[9] Thai-kâ lûng-chúng voi pi̍t-pi̍t-chhat, chhòn-kóng Song-ti ke kûng-chok, ya sṳ̂-sióng Kì ke chok-vì.
[10] Ngi-ngìn yîn-vi Song-chú chhiu fôn-hí, pin yí-kho Kì; yit-chhiet sîm-kôn chṳn-chhṳ̍t ke ngìn ya oi siung-chan Kì.