[1] Yî-set-lie̍t ke Mu̍k-chá â, Ngì tai-liâng Yok-sit chhiong tai yòng-khiùn yit-yong, khiù Ngì chet-ngí lòi-thâng! Chhô chhai kî-lu-pak pó-chho song ke Chú â, khiù Ngì hién-chhut Ngì ke yùng-kông!
[2] Chhai Yî-fap-lièn, Phien-ngâ-mén, Mâ-nâ-sî mien-chhièn, khiù Ngì chông-hién Ngì ke thai-nèn lòi-kiu ngài-têu!
[3] Song-ti â, khiù Ngì fu̍k-hîn ngài-têu! Khiù Ngì hién-chhut chhṳ̀-oi, ngài-têu chhiu voi tet-kiu!
[4] Chú Song-ti — Van-kiûn ke Ngièn-soi â, Ngì ke chṳ́-mìn khì-tó khiù-ham Ngì, Ngì hàn-oi pot-at to kí-sṳ̀ nè?
[5] Ngì sṳ́ kì-têu yung muk-chṳp chún-fan lòi-sṳ̍t, sṳ́ kì-têu lîm-thet yit thai-pî ke muk-chṳp.
[6] Ngì sṳ́ lìn-koet chhai ngài-têu ke thú-thi kâu-chan; ngài-têu ke sù-thi̍t ya sùi-yi met-sa ngài-têu.
[7] Song-ti — Van-kiûn ke Ngièn-soi â, khiù Ngì fu̍k-hîn ngài-têu! Khiù Ngì hién-chhut chhṳ̀-oi, ngài-têu chhiu voi tet-kiu!
[8] Ngì tui Âi-khi̍p sái yit-thèu phù-thò-su chhut-lòi; Ngì kiuk-chéu lie̍t-koet, chiông liá-thèu su chung hâ-hi.
[9] Ngì vi kì khôi-khién yit thai-phién ke thú-thi, kì chhiu tang-kîn chhin-chhṳ̂m, chhe-to chhiòn-thi.
[10] Khiùn-sân pûn kì ke yîm-yáng châ-tén; kì ke su-kî khièm-ko hiông-pak-su.
[11] Kì ke su-kî tham-to Thi-chûng-hói; su-kîn chhûn-ngi̍p Yu-fat-lâ-tí-hò.
[12] Ngì cho-má-ke chhak-thet kì ke lì-pâ, yù-chhai ko-lu-ngìn chak kì ke phù-thò?
[13] Su-lìm chûng ke sân-chû ngi̍p-lòi châu-tha̍p kì, fông-sân chûng ke yâ-chhu ngi̍p-lòi thûn-sṳ̍t kì.
[14] Song-ti — Van-kiûn ke Ngièn-soi â, khiù Ngì fì-sîm chón-yi! Khiù Ngì tui thiên-táng khon hâ-lòi! Khiù Ngì cheu-ku liá phù-thò-su,
[15] chhiu-he Ngì chhîn-sú chung ke phù-thò-su, Ngì só cheu-ku pûn kì chóng-thai ke yu-kî.
[16] Ngài-têu ke sù-thi̍t chiông liá-thèu su chám-hi sêu-thet; khiù Ngì tui kì-têu fat-khién, lòi sêu-me̍t kì-têu!
[17] Khiù Ngì pí-yu Ngì só sat-li̍p ke koet-kâ, pó-fu Ngì chhṳ-kâ só kién-sién ke chṳ́-mìn.
[18] Ngài-têu chhie̍t-tui m̀-voi chai lì-khôi Ngì; pûn ngài-têu sâng-miang, ngài-têu chhiu voi khiù-ham Ngì ke miàng.
[19] Chú Song-ti — Van-kiûn ke Ngièn-soi â, khiù Ngì fu̍k-hîn ngài-têu! Khiù Ngì hién-chhut chhṳ̀-oi, ngài-têu chhiu voi tet-kiu!