[1] Ngài ke Song-ti, ngài ke Vòng â, ngài oi chhòn-yòng Ngì ke ví-thai! Ngài oi siung-chan Ngì ke miàng, chhṳ̍t-to yún-yún yén-yén!
[2] Ngài oi tak-ngit siung-chan Ngì; ngài oi chan-mî Ngì ke miàng chhṳ̍t-to yún-yén!
[3] Song-chú chṳ-thai, chui khâm-tet su chan-mî; Kì ke ví-thai, mò-ngìn chhet-liòng tet-chhut.
[4] Sṳ-sṳ thoi-thoi oi siên-yòng Ngì ke chok-vì; kì-têu oi chhòn-kóng Ngì thai-nèn ke kûng-chok.
[5] Kì-têu oi kóng-hí Ngì ke yùng-kông lâu chûn-ngiàm; ngài oi kín-ngiam Ngì khì-meu ke chok-vì.
[6] Kì-têu oi kóng-lun Ngì tet-ngìn-kiâng ke chok-vì ngióng-pân yû nèn-li̍t; ngài oi siên-yòng Ngì ke ví-thai.
[7] Kì-têu oi chhòn-yòng Ngì fûng-sṳn ke liòng-san, fôn-hí chhong-kô lòi siung-chan Ngì ke kûng-ngi.
[8] Song-chú yû ên-tién lâu lìn-mén, mò sùi-phien fat-khién, mân-yû put-pien ke chhṳ̀-oi.
[9] Song-chú ên-thai van-yû, lìn-mén Kì só-chho ke yit-chhiet.
[10] Song-chú â, Ngì só chho ke yit-chhiet oi kám-chhia Ngì; Ngì chûng-sîm ke chṳ́-mìn oi siung-chan Ngì.
[11] Kì-têu oi kóng-hí Ngì vòng-khièn ke yùng-kông, thàm-lun Ngì ke thai-nèn;
[12] kì-têu oi pûn sṳ-kiên-ngìn tî Ngì thai-nèn ke chok-vì, ngin-sṳt Ngì koet-thu ke yùng-kông lâu chûn-ngiàm.
[13] Ngì ke koet-thu yún-yén chhòng-chhùn; Ngì ke vòng-khièn chhṳ̍t-to van-thoi. Song-chú ke yin-hí chhiòn-phu sin-sṳ̍t khó-kho; Kì só-cho ke yit-chhiet hién-chhut Kì ke chhṳ̀-oi.
[14] Voi tiet-tó ke, Song-chú fù-tén kì-têu; pûn-ngìn ap-chṳ ke, Kì fù-chhṳ̀ kì-têu.
[15] Chung-sên ke muk-chû chhiòn-phu ngióng-mong Ngì; Ngì cheu sṳ̀-chiet su sṳ̍t-vu̍t pûn kì-têu.
[16] Ngì ke sú yit-ha tá-khôi, chung-sên chhiu tet-tó páu-chiuk.
[17] Song-chú só-hàng ke chok-vì chhiòn-phu he kûng-ngi; Kì só-cho ke yit-chhiet hién-chhut Kì ke chhṳ̀-oi.
[18] Song-chú chhîn-khiun só-yû khiù-ham Kì ke ngìn, chhiu-he yit-chhiet sṳ̀n-sîm khiù-ham Kì ke ngìn.
[19] Kì oi sṳ̀n-chhiòn kin-vi Kì ke ngìn ke sîm-ngien; Kì oi thâng kì-têu ke khiù-ham, chṳ́n-kiu kì-têu.
[20] Song-chú pó-fu yit-chhiet kin-oi Kì ke ngìn; chúng-he Kì oi sêu-me̍t só-yû sià-ok ke ngìn.
[21] Ngài oi khôi-choi chan-mî Song-chú; ngien yit-chhiet su-chho ke siung-chan Kì ke sṳn-miàng, chhṳ̍t-to yún-yún yén-yén.