[1] Song-chú — Chhiòn-nèn ke Song-ti chhut-sâng kóng-fa, tui ngit-chhut to ngit-lo̍k chṳ̂-thi fat-chhut fû-ham.
[2] Tui ke sṳ̍p-fûn chiâng ke Siak-ôn-sàng, Song-ti ke yùng-kông sa-tén chhut-lòi.
[3] Ngài-têu ke Song-ti oi kong-lìm, m̀-he tiâm-tiâm mò chhut-sâng. Kì ke thèu-chhièn yû lie̍t-fó; Kì ke chû-vì yû phau-fûng.
[4] Kì oi chhòn thiên-thi cho chṳn-ngìn, lòi sṳ́m-phan chhṳ-kâ ke chṳ́-mìn.
[5] Kì kóng: “Seu-si̍p Ngài chûng-sîm ke chṳ́-mìn lòi Ngài liá-vi, chhiu-he ke-têu yung sên-ngì lòi thùng Ngài li̍p-yok ke ngìn.”
[6] Chû-thiên siên-pu Song-ti he kûng-ngi ke; Song-ti Kì chhṳ-kâ chhiu-he sṳ́m-phan-chá.
[7] Song-ti kóng: “Ngài ke chṳ́-mìn â, thâng-hó, Ngài oi kóng; Yî-set-lie̍t â, Ngài oi khúng-ko ngì. Ngài he Song-ti, chhiu-he ngì ke Song-ti.
[8] Ngài chit-phi ngì, m̀-he yîn-vi ngì ke sên-ngì, ya m̀-he yîn-vi ngì yit-chhṳ̍t hien ke sêu-fa-chi.
[9] Ngài mò sî-yeu ngì ngiù-làn tú ke kûng-ngiù, ya mò khiam-yung ngì yòng-khiên tú ke sân-yòng;
[10] yîn-vi su-lìm chûng ke chhu-lui lûng-chúng su̍k Ngài; chhiên-sân-táng ke thèu-sâng ya chhiòn-phu he Ngài ke.
[11] Sân-chûng só-yû ke fî-niâu he su̍k Ngài; phiàng-thi yit-chhiet ke thung-vu̍t he Ngài ke.
[12] “Chhiu-son Ngài yû tú-kî ke sṳ̀, Ngài ya m̀-sṳ́ lâu ngì kóng, yîn-vi, sṳ-kie lâu khì-chûng ke yit-chhiet chhiòn-phu he Ngài ke.
[13] Kám-kóng Ngài oi sṳ̍t kûng-ngiù ke ngiuk? Kám-kóng Ngài oi lîm sân-yòng ke hiet?
[14] Ngì oi yung kám-chhia cho chi-vu̍t hien pûn Song-ti; ngì oi tui Chṳ-kô-chá vàn ngì só-hí ke ngien.
[15] Fam-nan lìm-to ke sṳ̀-chiet, ngì oi khiù Ngài; Ngài voi chṳ́n-kiu ngì, ngì ya oi yùng-kông Ngài.”
[16] Chúng-he, Song-ti tui chok-ok ke ngìn kóng: “Ngì yû má-ke khièn-li hó phoi-siung Ngài ke kie-min? Ngì he má-ke ngìn, ngióng-kám thàm-lun Ngài ke yok â?
[17] Ngì nâu Ngài ke kón-kau; ngì khî-chhie̍t Ngài ke fa.
[18] Ngì tù-tó chhe̍t-é chhiu thùng kì cho-phân; ngì ya thùng ngìn khiung-ha hi-fam kiên-yìm.
[19] “Ngì yù-chhai ngì ke choi hi kóng fái-fa; ngì ke sa̍t-mà ya sṳ̀-sòng kóng fâ-liâu.
[20] Ngì sùi-phien fí-pong thi-hiûng, chhìm chhîn hiûng-thi ke mô-phiang.
[21] Ngì cho liá-têu sṳ, Ngài tiâm-tiâm mò chhut-sâng, ngì chhiu láu-tó Ngài thùng ngì khiung-yong, he-mò? Khì-sṳ̍t Ngài liá-ha oi chit-phi ngì, chiông ngì ke chhui pài chhai ngì mien-chhièn.
[22] “Ngì-têu m̀ ki-tet Ngài ke ngìn â, oi thâng chhîn-chhú, miên-tet Ngài chiông ngì-têu chhá-lie̍t, mò-ngìn hó kiu ngì-têu.
[23] Yung kám-chhia cho chi-vu̍t ke ngìn, chhiu-he chûn-chhùng Ngài; Cheu chṳn-lu lòi hàng ke, Ngài yit-thin voi chṳ́n-kiu kì.”