[1] Song-chú — Van-kiûn ke Ngièn-soi â, Ngì ke sṳn-só sṳ̍t-chhai chṳ̂n-hó!
[2] Ngài sióng-oi hi Song-chú ke sṳn-thien, sióng-to fûn-thet; ngài oi yung chhiòn-phu ke sṳ̂n-sîm thai-sâng siung-chan yún-sên ke Song-ti.
[3] Song-chú — Van-kiûn ke Ngièn-soi, ngài ke Vòng, ngài ke Song-ti â, chhai Ngì ke chi-thàn sùn-thèu, lièn vuk-yàm-tiâu ya vi chhṳ-kâ cho-teu, yen-é ya chhìm-tó phu-chṳ́ ke só-chhai.
[4] He̍t chhai Ngì sṳn-thien tú ke ngìn sṳ̍t-chhai yû fuk-hi ô! Kì-têu yit-chhṳ̍t chhai ke-vi chan-mî Ngì.
[5] Yí-kho Ngì tet-tó hi-li̍t, ngie̍t-sîm oi hi Siak-ôn-sân chhèu-sṳn ke ngìn, kì-têu sṳ̍t-chhai chṳ̂n-yû fuk-hi ô!
[6] Kì-têu kîn-ko châu-châu ke sân-lak, kì chhiu pien-cho chhièn-súi chṳ̂-thi; lièn chhiû-yí ya lo̍k hâ-lòi, sṳ́ sân-lak to-chhu sàng-cho pî-thòng.
[7] Kì-têu ye̍t-hàng ye̍t-yû hi-li̍t, chui-heu voi to Siak-ôn chhèu-kien chṳ-chûn ke Song-ti.
[8] Chú Song-ti — Van-kiûn ke Ngièn-soi â, khiù Ngì thâng ngài ke khì-tó! Ngâ-kok ke Song-ti â, khiù Ngì chet-ngí lòi-thâng!
[9] Song-ti â, khiù Ngì khon-ku ngài-têu ke tún-phài; khiù Ngì cheu-ku Ngì só sién-li̍p ke vòng!
[10] Chhai Ngì ke sṳn-thien he̍t yit-ngit, yàng-ko chhai phe̍t-vi he̍t chhiên-ngit; ngài kâm-ngien khî chhai ngài Song-ti sṳn-thien ke mùn-héu, ya mò-oi he̍t chhai sià-ok ngìn ke chong-phùng tú.
[11] Yîn-vi Chú Song-ti he ngit-thèu, he tún-phài; Kì voi su ên-fi lâu chûn-yùng pûn ngài-têu. Song-chú m̀-voi chiông chui-hó ke liù-tén m̀ pûn ke-têu hàng-vì chṳn-chhṳ̍t ke ngìn.
[12] Song-chú — Van-kiûn ke Ngièn-soi â, sin-kho Ngì ke ngìn sṳ̍t-chhai yû fuk-hi ô!