[1] Hâ-li-lu-yá! Ngì-têu oi tui thiên-táng chan-mî Song-chú! Ngì-têu oi chhai chṳ-kô ke só-chhai chan-mî Kì!
[2] Kì ke chung thiên-sṳ́ â, ngì-têu oi chan-mî Kì! Kì ke chung thiên-kiûn â, ngì-têu oi chan-mî Kì!
[3] Ngit-thèu â, ngie̍t-kông â, oi chan-mî Kì! Kín ngiap ke sên-sṳ̀n â, oi chan-mî Kì!
[4] Thiên-táng ke chû-thiên â, oi chan-mî Kì! Thiên-táng ke chung-súi â, oi chan-mî Kì!
[5] Ngien liá-têu chan-mî Song-chú ke miàng! Kì yit ha-lin, chhiu chho-chhut yit-chhiet.
[6] Kì chiông liá-têu kok-chhiu kok-vi, yún-yén kiên-ku; Kì thin-liáu kie-han, put-nèn chhêu-ko.
[7] Ngì-têu oi tui thi-song chan-mî Song-chú! Thai-hói-koai â, chhṳ̂m-yên â,
[8] ngiap-lang, pên-pho̍k, siet lâu yùn-vu â, chûn-hàng Kì min-lin ke thai-fûng â,
[9] só-yû ke thai-sân lâu se-sân â, kó-chṳ́-su lâu kok-chúng ke su â,
[10] yâ-chhu lâu thèu-sâng â, phà-chhùng lâu fî-khìm â, ngì-têu lûng-chúng oi chan-mî Kì!
[11] Sṳ-song ke kiûn-vòng â, thiên-ha van-mìn â, thai-sṳ̀n â, sṳ-song yit-chhiet chóng-khièn ke â,
[12] se â-kô-é â, se â-moi-é â, ló-ngìn-kâ â, se-ngìn-è â, ngì-têu lûng-chúng oi chan-mî Kì!
[13] Ngien chhiòn sṳ-kie ke yit-chhiet lûng-chúng chan-mî Song-chú ke miàng! Kì ke miàng he chṳ-chûn ke; Kì ke yùng-kông chhêu-ko thiên-thi.
[14] Kì sṳ́ Kì ke chṳ́-mìn khiòng-sṳn, pûn Kì sîm só-oi ke chṳ́-mìn, chhiu-he chûng-sîm ke Yî-set-lie̍t-ngìn, lûng-chúng chan-mî Kì! Hâ-li-lu-yá!