[1] Ngài só siung-chan ke Song-ti â, khiù Ngì m̀-hó yit-chhṳ̍t tiâm-tiâm.
[2] Sià-ok kúi-cha ke ngìn kûng-kit ngài. Kì-têu kóng fâ-liâu lòi fí-pong ngài,
[3] yung ok-thu̍k ke fa lòi chung-sông ngài; kì-têu mò-yèn mò-ku kûng-kit ngài.
[4] Ngài siak kì-têu, vi kì-têu khì-tó, chúng-he, kì-têu sa thùng ngài chok-tui.
[5] Kì-têu yung-ok po-san, yung yen-hen po oi-sîm.
[6] Khiù Ngì phai mò kûng-chṳn ke fap-kôn lòi sṳ́m-phan ngài ke sù-thi̍t, yung yit-ke thùng kì chok-tui ke ngìn lòi ko kì.
[7] Ngien kì su sṳ́m-phan, pûn-ngìn thin-chhui; ngien kì ke khì-tó ya son fam-chhui!
[8] Ngien kì ke su-miang suk-tón, phe̍t-ngìn chhióng kì ke chṳt-vi!
[9] Ngien kì ke chṳ́-ńg pien kû-yì, kì ke pû-ngiòng sàng-cho koá-fu!
[10] Ngien kì ke chṳ́-ńg liù-long cho khiet-sṳ̍t, tui khiet-sṳ̍t-liàu tî-poi pûn-ngìn kiuk chhut-lòi!
[11] Ngien chai-chú nâ-chéu kì só-yû ke chhòi-sán, sâng-fun-ngìn chhióng-chéu kì lò-luk só-tet ke!
[12] Ngien kì tet m̀-tó ngìn ke chhṳ̀-pî, kì ke kû-yì tet m̀-tó lìn-mén!
[13] Ngien kì ke heu-thoi chhiòn-phu chhie̍t-thet, kì ke siang chhòn m̀-to thi-ngi thoi!
[14] Ngien Song-chú ki-tén kiâ chú-siên ke chhui-ok, mo̍k m̀ ki-tet kiâ mê ke ko-fam!
[15] Ngien Song-chú yún-yén ki-tén kì-têu ke chhui, sṳ́ sṳ-kiên-ngìn vàn-chhiòn m̀ ki-tet kì-têu!
[16] Yîn-vi kì chhiùng-lòi m̀-sṳt sióng-tó chhṳ̀-pî, chṳ́-yû tî ap-pet chhôi-ko ke khiùng-khú-ngìn, sṳm-chṳ sat-hoi sông-sîm mò yí-kho ke ngìn.
[17] Kì chhin-hau chu-chú, ngien chu-chú lìm-to kì! Kì m̀-hén chuk-fuk, ngien chuk-fuk yén-lì kì!
[18] Kì yung chu-chú lòi chông-phi chhṳ-kâ, chhiong chok ngoi-phàu; ngien chu-chú chhiong súi yit-yong liù-ngi̍p kì ke sṳ̂n-thí, chhiong yù án-ngiòng yit-chhṳ̍t theu-ngi̍p kì ke kut-thèu!
[19] Ngien chu-chú chhiong sâm án-ngiòng ngiàm-tén kì, chhiong yêu-tai yit-yong sòng-sòng khún-tén kì!
[20] Ngien Song-chú án-ngiòng chit-fa̍t ngài ke-têu tui-thi̍t, po-yin ke-têu kóng fái-fa kûng-kit ngài ke ngìn.
[21] Chúng-he, Chṳ-kô ke Song-chú â, khiù Ngì yîn-vi Ngì ke miàng lòi pông-chhu ngài, cheu Ngì chṳ-san ke chhṳ̀-oi lòi chṳ́n-kiu ngài!
[22] Yîn-vi ngài khiùng-khú mò yí-kho; ngài ke nui-sîm sông-thung chṳ-khi̍t.
[23] Ngài chhiong lìm-am ke ngit-yáng chhiam-chhiam sêu-sṳt, chhiong yit-chak chhó-máng yit-yong pûn-ngìn fin-thet.
[24] Ngài kim-sṳ̍t to chhit-thèu sôn-ngiôn, sṳ̂n-thí chheu-to chhûn phì-pâu-kut.
[25] Sù-thi̍t khon-tó ngài chhiu seu ngài; kì-têu kín yèu-thèu vú-yu̍k ngài.
[26] Song-chú — ngài ke Song-ti â, khiù Ngì pông-chhu ngài; khiù Ngì cheu Ngì put-pien ke chhṳ̀-oi chṳ́n-kiu ngài!
[27] Pûn ngài ke sù-thi̍t tî liá he Ngì ke thai-nèn, liá-khien sṳ he Ngì — Song-chú chhṳ-kâ só-hàng ke.
[28] Chhiu-son kì-têu chu-chú ngài, Ngì hàn-he oi chuk-fuk ngài. Ngien pet-hoi ngài ke ngìn kien-seu, Ngì ke phu̍k-ngìn sa tet-tó fôn-hí.
[29] Ngien ngài ke-têu sù-thi̍t chok-tén siû-yu̍k, pûn kien-seu chhiong ngoi-phàu án-ngiòng pâu-tén.
[30] Ngài oi chhut-sâng thai-thai kám-chhia Song-chú; ngài oi chhai thai chhi-fi chûng chan-mî Kì,
[31] yîn-vi Kì vi khiùng-khú ke ngìn sṳ̂n-yên, kiu kì thot-lì thin kì sí-chhui ke ngìn.