[1] Song-ti â, khiù Ngì m̀-hó tiâm-tiâm m̀ khôi-choi! Song-ti â, khiù Ngì m̀-hó tiâm-tiâm m̀ chhut-sâng!
[2] Khon â, Ngì ke sù-thi̍t liá-ha tông chho-fán; yen-hen Ngì ke ngìn thèu-nà ngo-to kô-kô.
[3] Kì-têu yîm-mèu oi thùng Ngì ke chṳ́-mìn chok-tui; kì-têu sat-kie ham-hoi Ngì só pí-yu ke ngìn.
[4] Kì-têu kóng: “Lòi â, lòi sêu-me̍t kì-têu ke koet-kâ, sṳ́ Yî-set-lie̍t ke miàng yún-yén mò-ngìn chai ki-ngiam!”
[5] Kì-têu thùng-sîm khiung-ha chhâm-siòng, pí-chhṳ́ kiet-mèn oi fán-khong Ngì:
[6] Chhiu-he Yî-tûng-ngìn, Yî-sṳ̍t-mâ-li-ngìn, hàn-yû Mô-ap-ngìn lâu Ha-kap-ngìn,
[7] yû Kâ-pâ-le̍t-ngìn, Â-mùn-ngìn, Â-mâ-li̍t-ngìn, thùng-sṳ̀ hàn-yû Fî-li-sṳ-ngìn lâu Thai-ngì-ngìn.
[8] Â-sut-ngìn ya thùng kì-têu kiêu-kiet, cho Lò-tet heu-thoi ke lièn-mèn.
[9] Khiù Ngì tui-fu kì-têu, chhiong tui-fu Mí-thien-ngìn yit-yong, chhiong chhai Kî-sun hò-sùn tui-fu Sî-sî-lâ lâu Yâ-pîn.
[10] Ngì chhai Yún-Tô-ngí chiông kì-têu sêu-me̍t; kì-têu ke sṳ̂n-sṳ̂ chhai thi-song mièn-thet.
[11] Khiù Ngì tui-fu kì-têu ke chiông-kiûn, chhiong tui-fu Ngò-li̍p lâu Sî-yî-pak; ya sêu-me̍t kì-têu ke thúng-chhṳ-chá, chhiong sêu-me̍t Sî-pâ lâu Sat-mu-nâ;
[12] yîn-vi kì-têu kóng: “Ngài-têu lòi-hi chhióng, lòi-hi cham ke su̍k Song-ti ke thú-thi.”
[13] Ngài ke Song-ti â, tá-san kì-têu, chhiong chhôi-san chhṳ̀n-fôi; khiù Ngì sṳ́ kì-têu chhiong lùng-hông pûn fûng kién-chéu yit-yong.
[14] Chhiong fó sêu-kông su-lìm, fó-yam sêu-phien sân-liâng,
[15] cheu-yong, khiù Ngì yung khòng-fûng lòi tûi kì-têu, yung phau-yí lòi pûn kì-têu kiâng-to voi sí.
[16] Song-chú â, khiù Ngì sṳ́ kì-têu mân-mien kien-seu, án-ngiòng, kì-têu chang voi sṳ̀n-ngin Ngì ví-thai ke miàng.
[17] Ngien kì-têu yún-yén sṳt-phai chho̍k-kiâng! Ngien kì-têu chhai siû-yu̍k chûng me̍t-mòng!
[18] Ngien kì-têu tî: Chṳ́-yû Ngì — Song-chú, he chhiòn-thi ke Chṳ-kô-chá!