[1] Ngài ke Song-ti â, khiù Ngì chṳ́n-kiu ngài thot-lì sù-thi̍t; khiù Ngì pó-fu ngài thot-lì ke-têu kûng-kit ngài ke ngìn.
[2] Khiù Ngì chṳ́n-kiu ngài thot-lì chok-ok ke ngìn, pûn ngài thot-lì hau liù ngìn-hiet ke hiûng-sú.
[3] Khon â, kì-têu mài-fu̍k oi kûng-kit ngài; chhàn-phau ke ngìn kûi-khiùn thùng ngài chok-tui. M̀-he yîn-vi ngài yû má-ke ko-fam, ya m̀-he ngài yû cho má-ke fái-sṳ.
[4] Song-chú â, kì-têu kiak-kiak chún-phi, oi lòi kûng-kit ngài, pin m̀-he yîn-vi ngài fam-liáu má-ke ko-sṳt.
[5] Song-chú — Van-kiûn ke Ngièn-soi Song-ti â, hong-hí-lòi pông-chhu ngài! Yî-set-lie̍t ke Song-ti â, khiù Ngì chhîn-chhṳ lòi kam-chhat! Khiù Ngì hong-hí-lòi chit-fa̍t lie̍t-pâng; m̀-hó tui phoi-ngia̍k Ngì ke fái-ngìn fat-chhut chhṳ̀-pî!
[6] Kì-têu am-pû-sṳ̀ chang chón-lòi, chhiu-chhiong yâ-kiéu án-ngiòng kín-phoi, chhai sàng tî-poi òng-lòi òng-hi.
[7] Ngì thâng kì-têu ke vú-yu̍k lâu khiúng-hak; kì-têu ke sa̍t-mà chhiong li-kiam tui choi phùn chhut-lòi yit-yong; kì-têu yit-chhṳ̍t kóng: “Yû má-ngìn thâng-tó?”
[8] Chúng-he Song-chú â, Ngì seu kì-têu; Ngì oi sâu-nat lie̍t-koet.
[9] Ngài ke li̍t-liong â, ngài yí-kho Ngì; Song-ti â, Ngì he ngài ke sàng-pó.
[10] Ngài ke Song-ti siak ngài, Kì chhai ngài thèu-chhièn hàng; Song-ti oi pûn ngài khon ngài ke sù-thi̍t sṳt-phai.
[11] Song-ti â, m̀-hó sêu-me̍t kì-têu, miên-tet ngài ke ngìn-mìn m̀ ki-tet. Khiù Ngì yung Ngì ke thai-nèn pûn kì-têu si-san phêu-liù! Pó-fu ngài-têu ke Chú â, khiù Ngì tá-vang kì-têu!
[12] Kì-têu mân-choi chhui-ok, sa̍t-mà ya chhin-thu̍k; ngien kì-têu pûn chhṳ-kâ ke kiêu-ngau chhàn-tén! Yîn-vi kì-têu chu-ma, khî-phien,
[13] khiù Ngì thai fat-khién lòi sêu-me̍t kì-têu; khiù Ngì chiông kì-têu fí-me̍t to chhiang-chhiang! Van-mìn chang voi tî chhṳ-lî Yî-set-lie̍t ke, Kì chhiu-he thúng-chhṳ chhiòn sṳ-kie ke Song-ti.
[14] Ngài ke sù-thi̍t am-pû-sṳ̀ chang chón-lòi, chhiu-chhiong yâ-kiéu án-ngiòng kín-phoi, chhai sàng tî-poi òng-lòi òng-hi.
[15] Chhiong yâ-kiéu chéu-sông chéu-hâ chhìm sṳ̍t-vu̍t, kì-têu na mò sṳ̍t-páu chhiu kieu mò-thìn.
[16] Chúng-he ngài oi chhong-kô siung-chan Ngì ke li̍t-liong; tak chêu-sṳ̀n ngài oi thai-sâng kô-chhong Ngì put-pien ke chhṳ̀-oi. Ngì yit-chhṳ̍t he ngài ke sàng-pó, ngài fam-nan chûng ke phit-nan-só.
[17] Ngài ke li̍t-liong â, ngài oi chhong-kô siung-chan Ngì; Song-ti he ngài ke sàng-pó, he thung-siak ngài ke Song-ti.