[1] Song-chú â, Ngì he sṳ̂n-yên ke Song-ti; sṳ̂n-yên ke Song-ti â, Ngì hó fat-fó lé!
[2] Ngì he chhiòn ngìn-lui ke sṳ́m-phan-chá; khiù Ngì hong-hí-lòi po-yin kiêu-ngau ke ngìn!
[3] Song-chú â, fái-ngìn ke ngit-è yû kí-tô? Kì-têu yòng-yòng tet-yi oi to kí-sṳ̀ nè?
[4] Chok-ok ke ngìn khoâ-khiéu oi to kí-sṳ̀? Kì-têu hàn-oi kiêu-ngau to kí-sṳ̀ nè?
[5] Song-chú â, kì-têu ap-chṳ Ngì ke chṳ́-mìn; kì-têu pet-hoi ke-têu su̍k Ngì ke ngìn.
[6] Kì-têu sat-hoi koá-fu lâu kû-yì, yu mèu-sat chhiam-he̍t ke sâng-fun-ngìn.
[7] Kì-têu kóng: “Song-chú m̀-voi khon-tó; Ngâ-kok ke Song-ti m̀-voi koân-sîm.”
[8] Ngì-têu yâ-màn-ngìn â, ngióng-pân án nga-ta? Ngì-têu ngong-tong ngìn â, kí-sṳ̀ chang mìn-pha̍k?
[9] Song-ti chho ngài-têu ke ngí-kûng, Kì kám m̀-voi thâng? Song-ti chho ngài-têu ke muk-chû, Kì kám m̀-voi khon?
[10] Kì kón-lî van-koet, kám m̀-voi chit-fa̍t ngìn? Kì he ngìn-lui ke thó-sṳ̂, kám voi mò chṳ-sṳt?
[11] Song-chú chhîn-chhú ngìn ke sîm-sṳ̂; kì-têu só-sióng chhiòn-he hî-khûng.
[12] Song-chú â, Ngì só kón-kau ke ngìn yû fuk-hi, chhiu-he Ngì yung kau-sṳ lòi chṳ́-thô ke ngìn!
[13] Kì chhai fam-nan chûng, Ngì sṳ́ kì phìn-ôn, chhṳ̍t-to fái-ngìn tiet-lo̍k chhṳ̂m-hâng me̍t-mòng.
[14] Song-chú m̀-voi fit-thet Kì ke chṳ́-mìn; Kì m̀-voi piong-thet su̍k Kì ke ngìn.
[15] Kûng-ngi thin-chho̍k voi chhai fap-thìn chai chhut-hien; chṳn-chhṳ̍t ke ngìn lûng-chúng voi vì-fu chṳn-ngi.
[16] Má-ngìn vi-tó ngài hong-hí-lòi kûng-kit fái-ngìn? Má-ngìn khî chhai ngài liá-phién tui-khong chok-ok ke ngìn?
[17] Song-chú na mò pông-chhu ngài, ngài chó chhiu lo̍k yîm-kiên lô!
[18] Tak-pái, ngài kóng: “Ngài ke kiok tá-thong-thiu lé!” Song-chú â, Ngì put-pien ke chhṳ̀-oi chhiu fù-chhṳ̀ ngài.
[19] Ngài chhâu-fàn yù-sèu ke sṳ̀-chiet, Ngì ôn-ví ngài, pûn ngài khoai-lo̍k.
[20] Ngì thùng fú-phai ke kôn-yèn mò lòi-vông; kì-têu sṳ́ put-ngi ke sàng-cho ha̍p-fap.
[21] Kì-têu kiêu-kiet mèu-hoi ngi-ngìn, chiông mò-chhui ke ngìn phan sí-hìn.
[22] Chúng-he Song-chú he ngài ke yeu-sai; ngài ke Song-ti he ngài phit-nan ke phàn-sa̍k.
[23] Kì oi yîn-vi kì-têu ke sià-ok po-yin kì-têu, cheu kì-têu só-fam ke chhui lòi sêu-me̍t kì-têu; Song-chú — ngài-têu ke Song-ti oi sêu-me̍t kì-têu.