[1] Song-ti â, Ngì cho-má-ke fit-thet ngài-têu án-kiú? Ngì oi yún-yén tui Ngì mu̍k-yông ke yòng-khiùn khién-to fat-fó mâ?
[2] Oi ki-tet Ngì kú sṳ̀-thoi kién-sién ke chṳ́-mìn, chhiu-he Ngì só-su̍k, kûi Ngì chhṳ-kâ ke mìn-chhu̍k; khiù Ngì ki-ngiam Ngì sṳt he̍t-ko ke Siak-ôn-sân.
[3] Ngài-têu ke sù-thi̍t yí-kîn chiông sṳn-thien fí-me̍t thet lô; khiù Ngì sái kiok-phu ko-lòi khon liá fông-liòng ke só-chhai.
[4] Ngì ke sù-thi̍t chhai Ngì ke sṳn-thien tú thai-sâng hêm; kì-têu chiông kì-têu tet-sṳn ke khì-è khià hí-lòi.
[5] Kì-têu chhiong chám su-é ke ngìn, nâ-tén pú-thèu kín-phiak kín-chám.
[6] Sṳn-thien-tú só-yû tiâu-khiet ke chhû-tún, chhiòn-phu yung pú-thèu lâu thiet-chhùi khau-thet.
[7] Kì-têu hàn piong-fó sêu Ngì ke sṳn-thien; kì-têu siet-thu̍k kin-pai Ngì ke só-chhai, chhak-to tap-tap.
[8] Kì-têu kiet-sîm kóng: “Ngài-têu lòi chiông kì-têu chha̍t-tái sêu-me̍t”; kì-têu chhiu chiông liá thi-fông tak-kiên sṳn-só sêu chhiang-chhiang.
[9] Sṳ̀n-sṳn ke ki-ho chhiòn-phu m̀ kien-thet lé; ya mò yit-ke siên-tî lé; ngài-têu tông-chûng mò-ngìn tî liá châi-nan oi-to kí-sṳ̀.
[10] Song-ti â, sù-thi̍t seu Ngì oi-to kí-sṳ̀ nè? Kám-kóng thi̍t-ngìn voi yún-yén siet-thu̍k Ngì ke miàng he-mò?
[11] Ngì cho-má-ke m̀ chhûn yu-sú pông-chhu ngài-têu? Khiù Ngì tui fài-chûng chhûn-sú sêu-me̍t kì-têu.
[12] Song-ti â, chhṳ-kú yî-lòi Ngì he ngài ke vòng; chhai liá sṳ-kiên, sṳ̂-hàng chṳ́n-kiu ke chhiu-he Ngì.
[13] Ngì yung thai-nèn fûn-khôi hói-súi; Ngì tá-lan hói-koai ke thèu-nà.
[14] Ngì chiông thai hói-koai ke thèu-nà tá-to mièn-mièn, chiông kì ke ngiuk pûn-pûn khóng-yâ ke thung-vu̍t sṳ̍t.
[15] He Ngì sṳ́ chhièn-súi kín yúng-tén chhut-lòi; he Ngì sṳ́ thai hò-pa ke súi châu-thet.
[16] Ngit-ya ke pien-fa he Ngì ke chṳ́-yi; ngit-thèu lâu ngie̍t-kông he Ngì phài-lie̍t ke.
[17] Thai-thi ke kie-han he Ngì sat-li̍p ke; ngie̍t-thiên lâu hòn-thiên he Ngì ôn-phài ke.
[18] Song-chú â, m̀-hó m̀ ki-tet Ngì ke sù-thi̍t sâu-nat Ngì; m̀-hó m̀ ki-tet mò kin-khièn ke ngìn ngióng-pân méu-sṳ Ngì ke miàng.
[19] M̀-hó chiông Ngì sùn-liòng ke chṳ́-mìn kâu-pûn chhàn-phau ke thi̍t-ngìn; m̀-hó yún-yén m̀ ki-tet Ngì liá-têu su ap-pet ke chṳ́-mìn.
[20] Khiù Ngì ki-ngiam Ngì thùng ngài-têu só-li̍p ke khie-yok, yîn-vi thi-song vû-am ke só-chhai chhûng-mân phau-li̍t.
[21] Khiù Ngì mo̍k pûn su ap-pet ke ngìn tù-tó vú-yu̍k; oi pûn khiùng-khú mò-ngìn pông-chhu ke ngìn siung-chan Ngì.
[22] Song-ti â, khiù Ngì hong-hí-lòi chên-chhí Ngì chhṳ-kâ ke chṳn-ngi; khiù Ngì m̀-hó m̀ ki-tet mò kin-khièn ke ngìn kûi-ngit seu Ngì.
[23] M̀-hó m̀ ki-tet Ngì ke sù-thi̍t tet-yi ke seu-sâng; m̀-hó m̀ ki-tet Ngì ke thi̍t-ngìn mò-thìn ke chhàu-nau.