[1] Song-chú â, m̀-hó m̀ ki-tet Thai-ví; oi ki-tet kì su ke yit-chhiet kiên-khú.
[2] Song-chú â, oi ki-tet kì tui Ngì só-hí ke ngien; kì tui Ngâ-kok ke Chhiòn-nèn-chá fat-sṳ kóng:
[3] “Ngài chhie̍t-tui m̀ chón vuk-hâ ya-he sông-chhòng,
[4] ngài chhie̍t-tui m̀ soi-muk ya-he tuk-muk-soi,
[5] chhṳ̍t-to ngài vi Song-chú chhìm-tó thi-fông, vi Ngâ-kok ke Chhiòn-nèn-chá chhìm-tó he̍t ke só-chhai.”
[6] Ngài-têu thâng-kóng yok-khui chhai Yî-fap-thâ; ngài-têu chhai Ngâ-ngí thièn-kiên chhìm-tó kì.
[7] Ngài-têu kóng: “Lòi-hi Song-chú he̍t ke só-chhai; ngài-têu lòi-hi Kì ke pó-chho chhièn khúi-pai.”
[8] Song-chú â, hong-hí-lòi, chin-ngi̍p Ngì hiû-sit ke thi-fông, thùng hién-sṳ Ngì thai-nèn ke yok-khui khiung-ha ngi̍p sṳn-só.
[9] Ngien Ngì ke chi-sṳ̂ chok-sông kûng-ngi; ngien Ngì chûng-sîm ke chṳ́-mìn fôn-fû.
[10] Khiù Ngì yîn-vi Ngì phu̍k-ngìn Thai-ví ke yèn-ku, m̀-hó chón-ko sṳ̂n m̀-tap Ngì sién-li̍p ke vòng.
[11] Song-chú yung sin-sṳ̍t tui Thai-ví fat-sṳ, chhie̍t-tui m̀-voi sû-chón hi; Kì kóng: “Ngài oi li̍p ngì yit-ke lai-é cho vòng; Ngài oi pûn kì sṳ̀n-chiap ngì ke vòng-vi.
[12] Ngì ke chṳ́-sûn na chûn-sú Ngài ke yok, sṳ̍t-hàng Ngài kâu kì-têu ke fap-lin, kì-têu ke chṳ́-sûn ya voi yún-yún yén-yén sṳ̀n-chiap ngì ke vòng-vi.”
[13] Song-chú yí-kîn kién-sién Siak-ôn; Kì oi ke thi-fông cho Kì he̍t ke só-chhai.
[14] Kì kóng: “Ngài oi yún-yén he̍t chhai liá-vi; liá-vi he Ngài chung-yi oi chóng-khièn ke só-chhai.
[15] Ngài oi kiûng-kip Siak-ôn yit-chhiet ke sî-yeu; Ngài oi pûn khì-chûng ke khiùng-khú-ngìn tet-tó páu-chiuk.
[16] Ngài oi pûn chung chi-sṳ̂ chok-sông Ngài ke kiu-ên; sàng-nui chûng-sîm ke ngìn-mìn oi thai-sâng fôn-fû!
[17] Ngài oi chhai liá-vi hîn-hí Thai-ví ke yit-ke heu-thoi, pûn kì cho vòng; Ngài oi pí-yu Ngài só sién-li̍p ke vòng, pûn kì ke vòng-khièn kiên-ku.
[18] Ngài oi sṳ́ kì ke sù-thi̍t sṳt-phai kien-seu, chúng-he kì ke koet-thu oi hîn-vong chhông-mìn.”