[1] Mò-lun má-ngìn, tui Chṳ-kô-chá chhìm-khiù ôn-chhiòn, ya-he he̍t chhai Chhiòn-nèn-chá ke pí-yu chṳ̂-ha,
[2] chhiòn-phu cho-tet tui Song-chú kóng: “Ngì he ngài ke phit-nan-só lâu sàng-pó; Ngì he ngài ke Song-ti, ngài sin-kho Ngì.”
[3] Kì voi kiu ngì thot-lì yit-chhiet ke lò-mióng, pin thot-lì yit-chhiet chṳ-miang ke chhòn-ngiam-phiang.
[4] Kì voi yung chhṳ-kâ ke yi̍t-kap pí-yu ngì; tet-tó Kì ke khon-ku, ngì yit-thin ôn-chhiòn; Kì ke sin-sṳ̍t voi chhiong tún-phài pó-fu ngì.
[5] Am-pû-sṳ̀, ngì m̀-sṳ́ kiâng má-ke ngùi-hiám, ngit-sṳ̀-thèu, ngì m̀-sṳ́ kiâng tù-tó kûng-kit;
[6] ngì m̀-sṳ́ kiâng vû-am chûng liù-hàng chṳ-miang ke chhòn-ngiam-phiang, ya m̀-sṳ́ kiâng tông-chu-thèu fí-me̍t-sin ke châi-hoi.
[7] Sûi-yèn yû kûi-chhiên ngìn vang chhai ngì chó-phién, yû kûi-van ngìn sí chhai ngì ke yu-phién, liá-ke châi-nan ya mò khó-nèn lìm-to ngì.
[8] Ngì tá-khôi muk-chû chhîn-ngién lòi khon, chhiu voi khon-tó fái-ngìn su chit-fa̍t.
[9] Yîn-vi ngì kho Song-chú cho ngì ke phit-nan-só, ki-yèn Chṳ-kô-chá chhiu-he ngì he̍t ke só-chhai,
[10] châi-nan yit-thin m̀-voi lìm-to ngì, châi-fo m̀-voi chiap-khiun ngiâ vuk-hâ.
[11] Song-ti voi chhâi-phai thiên-sṳ́ khon-ku ngì, chhai ngì só-hàng ke lu-song pó-fu ngì.
[12] Kì-têu voi yung sûng-sú lòi fù-tén ngì, pûn ngì ke kiok m̀-voi chhong-tó sa̍k-thèu.
[13] Ngì voi chiông sṳ̂-é lâu thu̍k-sà tha̍p chhai kiok-hâ; ngì voi tém-sí hiûng-ok ke sṳ̂-é lâu thai-sà.
[14] Song-ti kóng: “Ngài oi chṳ́n-kiu ke-têu chôn-sîm kin-oi Ngài ke ngìn; Ngài oi pó-fu chûn Ngài cho Chú ke ngìn.
[15] Kì-têu khiù-ham Ngài ke sṳ̀-chiet, Ngài voi en kì-têu; kì-têu chhai fam-nan chûng, Ngài oi thùng kì-têu khiung-ha. Ngài oi chṳ́n-kiu kì-têu, pûn kì-têu tet-tó kông-yùng.
[16] Ngài oi pûn kì-têu hióng-su chhòng-su, pûn kì-têu khon-tó Ngài ke kiu-ên.”