[1] Song-ti â, ngoi-chhu̍k-ngìn chhîm-ngi̍p Ngì ke thú-thi. Kì-têu tá-lá-sap Ngì ke sṳn-thien, sṳ́ Yâ-lu-sat-lâng pien-cho fông-liòng.
[2] Kì-têu nâ Ngì phu̍k-ngìn ke sṳ̂n-sṳ̂ pûn ên-tiâu sṳ̍t; kì-têu chiông Ngì sṳn-mìn ke sṳ̂n-sṳ̂ fit-pûn yâ-chhu.
[3] Kì-têu sṳ́ Ngì ke chṳ́-mìn hiet-liù sṳ̀n-hò, hiet chhiong súi án-ngiòng yim-tén Yâ-lu-sat-lâng, mò liù-hâ yit-ke ngìn hó mài-chong sṳ̂-thí.
[4] Lìn-koet vú-yu̍k ngài-têu; chû-vì ke ngìn seu ngài-têu, sâu-nat ngài-têu.
[5] Song-chú â, hàn-oi kí-kiú nè? Ngì oi fat-khién to yún-yén mâ? Ngì ke nu-hi oi chhiong fó sêu-to kí-sṳ̀ nè?
[6] Khiù Ngì chiông nu-hi chón-hiong m̀ kin-vi Ngì ke koet-kâ, piang chhai ke-têu m̀ khiù-ham Ngì miàng ke ngìn-mìn sṳ̂n-song;
[7] yîn-vi kì-têu thûn-me̍t Ngâ-kok ke heu-thoi, sṳ́ kì-têu ke hiông-thú pien-cho fông-liòng.
[8] Khiù Ngì mo̍k ki-tén ngài-têu chú-siên ke chhui, m̀-hó tui ngài-têu thó kì-têu ke chhui-chai. Khiù Ngì kiak-kiak sṳ̂-ên lòi lìn-mén ngài-têu, yîn-vi ngài-têu yí-kîn mò pan-si̍t hî-mong.
[9] Chṳ́n-kiu ngài-têu ke Song-ti â, khiù Ngì vi-tó Ngì yùng-kông ke miàng lòi pông-chhu ngài-têu; khiù Ngì vi-tó Ngì ke miàng théu-piong ngài-têu, sa-miên ngài-têu ke chhui.
[10] Cho-má-ke pûn lie̍t-koet kín-mun: “Ngì-têu ke Song-ti chhai nai-vi nò?” Pûn ngài-têu khon-tó Ngì chit-fa̍t lie̍t-koet, yîn-vi kì-têu liù Ngì phu̍k-ngìn ke hiet.
[11] Pûn-ngìn chok-hi koân ke, ngien Ngì chhùi-thâng kì-têu ke chhên-sâng; pûn-ngìn thin sí-chhui ke, ngien Ngì yung thai-nèn théu-piong kì-têu.
[12] Chú â, lìn-koet ngióng-pân siû-yu̍k Ngì, khiù Ngì yung chhit-phi vàn-pûn kì-têu.
[13] Án-ngiòng, ngài liá-têu cho Ngì ke chṳ́-mìn, Ngì mu̍k-yông ke yòng-khiùn, ngài-têu oi yún-yén kám-chhia Ngì; ngài-têu oi siung-chan Ngì, chhṳ̍t-to sṳ-sṳ thoi-thoi!