[1] Song-chú â, khiù Ngì chet-ngí lòi-thâng ngài, en ngài, yîn-vi ngài khiùng-khú, mò-ngìn pông-chhu.
[2] Pó-fu ngài ke sin-miang, yîn-vi ngài tui Ngì chûng-sîm; Ngài ke Song-ti â, khiù Ngì chṳ́n-kiu liá sin-kho Ngì ke phu̍k-ngìn!
[3] Chú â, khiù Ngì lìn-mén ngài, yîn-vi ngài kûi-ngit khiù-ham Ngì.
[4] Chú â, khiù Ngì sṳ́ Ngì ke phu̍k-ngìn fôn-hí, yîn-vi ngài ke sîm só ngióng-mong ke chhiu-he Ngì.
[5] Chú â, Ngì he chṳ-san ke, he lo̍k-yi sa-miên ngìn ke; khiù-ham Ngì ke chhiu voi tet-tó Ngì fûng-sṳn ke chhṳ̀-oi.
[6] Song-chú â, khiù Ngì chet-ngí thâng ngài ke khì-tó; khiù Ngì liù-sîm thâng ngài khiù-ham ke sâng.
[7] Chhai fam-nan tông-chûng ngài oi khiù-ham Ngì, yîn-vi Ngì voi tap-yin ngài.
[8] Chú â, mò phe̍t ke sṳ̀n thùng Ngì pí et-tet; kì-têu ke chok-vì thùng Ngì ke pí m̀-tet.
[9] Chú â, Ngì só-chho ke van-koet voi lòi khúi-pai Ngì; kì-têu voi yùng-yeu Ngì ke chûn-miàng.
[10] Yîn-vi Ngì chui ví-thai, yu hàng khì-sṳ; vì-yû Ngì chang he Song-ti.
[11] Song-chú â, khiù Ngì chiông Ngì ke tho-lu chṳ́-sṳ ngài, ngài oi cheu Ngì ke chṳ̂n-lî lòi-hàng; khiù Ngì sṳ́ ngài yit-sîm kin-vi Ngì.
[12] Chú — ngài ke Song-ti â, ngài oi chhiòn-sîm kám-chhia Ngì; ngài oi yùng-kông Ngì ke miàng chhṳ̍t-to yún-yén.
[13] Ngì tui ngài ke chhṳ̀-oi án-thai; Ngì chṳ́n-kiu ngài thot-lì yîm-kiên.
[14] Song-ti â, kiêu-ngau ke ngìn kûng-kit ngài; kûi-tóng hiûng-ok ke phau-thù sióng-oi sat-hoi ngài, kì-têu chhiòn-mò chiông Ngì piong chhai ngién-chûng.
[15] Chú â, Ngì he yû lìn-mén lâu ên-tién ke Song-ti; Ngì mò sùi-phien fat-khién, yû fûng-sṳn ke chhṳ̀-oi lâu sin-sṳ̍t.
[16] Khiù Ngì chón-sṳ̂n mien-hiong ngài, lìn-mén ngài; chiông Ngì ke li̍t-liong su-pûn Ngì ke phu̍k-ngìn, chṳ́n-kiu ngài, yîn-vi ngài chhiong ngâ-mê án-ngiòng sṳ-fung Ngì.
[17] Song-chú â, tui ngài hién-chhut Ngì ke liòng-san, sṳ́ hen ngài ke ngìn khon-tó phìn-kí lòi kien-seu, yîn-vi Ngì khok-sṳ̍t pông-chhu ngài, ôn-ví ngài.