[1] Song-chú â, ngài oi yún-yén kô-chhong Ngì put-pien ke chhṳ̀-oi; ngài oi khôi-choi chhòn-yòng Ngì ke sin-sṳ̍t chhṳ̍t-to van-thoi.
[2] Ngài kóng, Ngì ke chhṳ̀-oi yún-yén chhòng-chhùn; Ngì ke sin-sṳ̍t kiên-thin, chhiong thiên yit-yong.
[3] Ngì kóng: “Ngài sṳt thùng Ngài só kién-sién ke ngìn li̍p-yok; Ngài sṳt yin-hí Ngài ke phu̍k-ngìn Thai-ví kóng:
[4] ‘Ngài oi sṳ́ ngì ke heu-thoi yún-yén cho vòng; Ngài oi kiên-ku ngì ke vòng-vi to van-thoi.’ ”
[5] Song-chú â, chû-thiên siung-chan Ngì khì-meu ke chok-vì; sṳn-chá chhai thiên-thìn chhong-kô chan-mî Ngì ke sin-sṳ̍t.
[6] Thiên-táng kám yû thùng Song-chú pí et-tet ke? Sṳ̀n ke chung-chṳ́ tông-chûng mò yit-ke cho-tet thùng Song-chú pài khiung-ha.
[7] Chhai sṳn-chá ke chhi-fi chûng, Song-ti chui su chûn-chhung; kì-têu chhai Kì ke chû-vì, chhiòn-phu kin-vi Kì.
[8] Chú Song-ti — Van-kiûn ke Ngièn-soi â, má-ngìn chhiong Ngì án-yû khièn-nèn? Song-chú â, Ngì chhai só-yû ke sṳ-chhìn song hién-chhut Ngì ke sin-sṳ̍t.
[9] Ngì kón-chṳ thai-hói; Ngì phìn-chhin pô-long.
[10] Ngì tá-sui hói-koai Lâ-ha̍p-pak, chhṳ̀-sí kì; Ngì yung thai khièn-nèn ke sú tá-san Ngì ke sù-thi̍t.
[11] Thiên he Ngì ke, thi ya khiung-yong he Ngì ke; sṳ-kie lâu khì-chûng ke van-vu̍t he Ngì chhóng-chho ke.
[12] Tui nàm-khi̍t to pet-khi̍t, chhiòn-phu he Ngì chho ke; Thâ-phok-sân, Het-mùn-liâng lûng-chúng tui Ngì fôn-fû.
[13] Ngì ke sú-kut ngióng-pân yû-li̍t! Ngì ke khièn-nèn ngióng-pân khiòng-thai!
[14] Ngì ke koet he yung chṳn-ngi lâu kûng-tong cho kîn-kî; Ngì só-cho ke yit-chhiet hién-chhut chhṳ̀-oi lâu sin-sṳ̍t.
[15] Yung sṳ̂-kô kin-pai Ngì ke ngìn sṳ̍t-chhai yû fuk-hi! Song-chú â, kì-têu sên-fa̍t chhai Ngì ke kông-mìn chûng.
[16] Yîn-vi Ngì, kì-têu kûi-ngit fôn-hí khoai-lo̍k; kì-têu só siung-chan ke he Ngì ke kûng-ngi.
[17] Ngì he kì-têu ke yùng-kông lâu li̍t-liong; Ngì sṳ̂-ên, ngài-têu chhiu tet-tó sṳn-li.
[18] Ngài-têu ke tún-phài sṳ̍t-chhai he Song-chú kién-sién ke; ngài-têu ke vòng he Yî-set-lie̍t ke Sṳn-chá sat-li̍p ke.
[19] Ke-sṳ̀, Ngì chhai yi-siong chûng tui Ngì chûng-sîm ke chṳ́-mìn kóng: “Ngài yí-kîn chiông miên-liù su-pûn yit-ke chhut-miàng ke yúng-sṳ; Ngài chiông vòng-vi su-pûn Ngài tui ngìn-mìn chûng sién chhut-lòi ke ngìn.
[20] Ngài yí-kîn kién-sién Ngài ke phu̍k-ngìn Thai-ví, yung sṳn-yù kò kì, li̍p kì cho ngì-têu ke vòng.
[21] Ngài ke nèn-li̍t oi sṳ̀-sòng thùng kì khiung-ha; Ngài ke khièn-nèn voi sṳ́ kì pien chhin khiòng-chong.
[22] Kì ke sù-thi̍t yún-yén mò phan-fap yàng kì; sià-ok ke ngìn ya mò fap-thu hoi-tó kì.
[23] Ngài oi tá-sui thùng kì chok-tui ke ngìn; Ngài oi tá-vang yit-chhiet hen kì ke ngìn.
[24] Ngài oi yung sin-sṳ̍t lâu chhṳ̀-oi khoán-thai kì; kho Ngài ke miàng, kì chhiu voi tet-tó sṳn-li.
[25] Ngài oi sṳ́ kì ke koet-thú kín-lòi kín-thai, tui Thi-chûng-hói to Yu-fat-lâ-tí-hò.
[26] Kì voi tui Ngài kóng: ‘Ngì he ngâ Pâ, ngài ke Song-ti; Ngì he chṳ́n-kiu ngài ke phàn-sa̍k!’
[27] Ngài oi sat-li̍p kì cho chóng-chṳ́, cho sṳ-kiên chui ví-thai ke vòng.
[28] Ngài tui kì ke chhṳ̀-oi m̀-voi kói-pien; Ngài thùng kì li̍p ke yok yún-yén yû-háu.
[29] Ngài oi sṳ́ kì ke heu-thoi yún-yén chóng-khièn; kì ke pó-chho voi chhiong thiên án-ngiòng chhòng-chhùn.
[30] “Kì ke heu-thoi na hi-chhie̍t Ngài ke kau-sṳ, hàng-sṳ vì-ngìn m̀ chûn-cheu Ngài ke fap-chet,
[31] kì-têu na vì-phoi Ngài ke kûi-chet, kì-têu na m̀ sú Ngài ke kie-min,
[32] Ngài chhiu oi yung kun-é lòi chit-fa̍t kì-têu ke ko-fam; Ngài ya oi yung piên-é lòi chit-fa̍t kì-têu ke chhui-ngiak.
[33] Chúng-he, Ngài tui Thai-ví ke chhṳ̀-oi m̀-voi sû-fì; Ngài tui kì ke sin-sṳ̍t yún-yén m̀-voi pien-chṳt.
[34] Ngài m̀-voi fi-thet thùng kì só-li̍p ke yok, ya m̀-voi kói-pien Ngài pûn kì ke yin-hí.
[35] “Ngài chṳ́ chhṳ-kâ ke sṳn-miàng fat-sṳ, Ngài fat-sṳ yit-pái yún-yén yû-háu: Ngài chhie̍t-tui m̀-voi khî-phien Thai-ví!
[36] Kì ke heu-thoi voi yit-thoi chhòn yit-thoi, chhṳ̍t-to yún-yén; Ngài oi khon-ku kì ke pó-chho, pûn kì chhiong ngit-thèu chhòng-chhùn.
[37] Kì ke pó-chho voi chhiong ngie̍t-kông án kiên-thin; ngie̍t-kông he thiên-khûng chûng-sṳ̍t ke kien-chṳn-chá.”
[38] Kiet-kó Ngì sa khî-chhie̍t kì, piong-thet kì; Ngì fî-sòng khién Ngì só sién-li̍p ke vòng.
[39] Ngì chhí-sêu thùng Ngì phu̍k-ngìn só-li̍p ke yok; Ngì chiông kì ke miên-liù fit-lo̍k nam-nài tú.
[40] Ngì chhak-thet kì só-yû ke sàng-chhiòng, sṳ́ kì ke sàng-pó sàng-cho fông-thi.
[41] Ko-lu ke ngìn chhiòn-phu chhióng kì; lìn-koet ya siông-châng vú-yu̍k kì.
[42] Ngì sṳ́ kì ke sù-thi̍t lûng-chúng tá-yàng kì; Ngì pûn kì ke thi̍t-ngìn chhiòn-phu chṳ̂n fôn-hí.
[43] Ngì sṳ́ kì ke vú-hi sṳt-háu, pûn kì chhai chan-chhòng khî m̀-he̍t.
[44] Ngì chhióng-chéu kì ke khièn-chhóng, chiông kì ke pó-chho súng-vang.
[45] Ngì sṳ́ kì vi-ló siên-sôi; Ngì pûn kì su-chhin yit-chhiet ke siû-yu̍k.
[46] Song-chú â, Ngì khong-tén m̀-tap ngài-têu, oi to yún-yén mâ? Ngì ke nu-hi chhiong fó tông-chho̍k, oi to kí-sṳ̀ nè?
[47] Khiù Ngì oi ki-tet ngài ke ngìn-sên he kí-tón; Ngì só chhóng-chho ke ngìn-lui he ngióng-pân hî-khûng!
[48] Nai yû-ngìn chhòng-sên put-ló nè? Má-ngìn thò tet-ko yîm-kiên ke khièn-sṳ nè?
[49] Chú â, Ngì yung sin-sṳ̍t hiong Thai-ví só yin-hí ke, Ngì siên-chhièn ke chhṳ̀-oi chhai nai-vi?
[50] Chú â, khiù Ngì m̀-hó m̀ ki-tet Ngì ke phu̍k-ngìn só sṳ̀n-su ke siû-yu̍k; khiù Ngì m̀-hó m̀ ki-tet ngài ngióng-pân ngiûn-su ngoi-pâng ke khî-fu.
[51] Song-chú â, Ngì ke sù-thi̍t vú-yu̍k Ngì sat-li̍p ke vòng; mò-lun kì hi-to nai-vi, kì-têu chúng-he vú-yu̍k kì.
[52] Ngien Song-chú yún-yén tet-tó siung-chan! Â-mén! Â-mén!