[1] Hâ-li-lu-yá! Chhong-kô siung-chan ngài-têu ke Song-ti he ngióng-pân mî-san! Chan-mî Kì he chhin khoai-lo̍k, ya he chhin sṳt-tông ke sṳ!
[2] Chiông Yâ-lu-sat-lâng chhùng-sîn hí hí-lòi ke chhiu-he Song-chú; seu-si̍p liù-mòng ke Yî-set-lie̍t-ngìn chón-lòi ke ya he Kì.
[3] Kì yî-hó sîm-kôn pho-sui ke ngìn, chiông kì-têu ke sông-héu pâu hí-lòi.
[4] Kì chṳ-thin sên-sṳ̀n ke su-muk, vi kì-têu mî-yit-ke ôn-miàng.
[5] Ngài-têu ke Chú chui-thai, mân-yû nèn-li̍t; Kì ke chṳ-fi mò-ngìn nèn chhûi-chhet.
[6] Song-chú fù-chhṳ̀ pî-mì ke ngìn; Kì sṳ́ fái-ngìn vang-to tap-tap.
[7] Oi yung kám-chhia ke sîm chhong-kô siung-chan Song-chú, thàn su-khìm cheu-ngo̍k kô-siung ngài-têu ke Song-ti.
[8] Kì sṳ́ vû-yùn châ-thiên, lo̍k-yí chṳ̂-yun thai-thi, sṳ́ khiùn-sân sâng chhiâng-chhó.
[9] Kì su sṳ̍t-vu̍t pûn chhu-lui, lâu kín-kieu ke se vû-â.
[10] Kì mò chung-yi mâ-é ke li̍t thai, mò kak-yi ngìn ke kiok chhin voi chéu.
[11] Song-chú fôn-hí kin-vi Kì ke ngìn, hí-oi ngióng-mong Kì chhṳ̀-oi ke ngìn.
[12] Yâ-lu-sat-lâng â, oi siung-chan Song-chú! Siak-ôn â, oi chan-mî ngì ke Song-ti!
[13] Kì sṳ́ ngì ke sàng-mùn kiên-ku; Kì su-fuk pûn ngì ke chṳ́-ńg.
[14] Kì pó-sú ngì ke piên-kie phìn-chhin; Kì pûn ngì sṳ̍t song-tén ke ma̍k-é to páu-páu.
[15] Kì hiong thai-thi fat-chhut min-lin; Kì ke fa ngiàm-sṳ̀ chhiu chhòn-phien.
[16] Kì kong ke siet chhiong yòng-mô; Kì ve ke sông chhiong chhṳ̀n-fôi.
[17] Kì sṳ́ pên-pho̍k chhiong sa̍k-é lo̍k-hâ; Kì chhôi hòn-fûng, má-ngìn khî tet-he̍t?
[18] Kì yit min-lin, sông-siet pên-pho̍k chhiu yùng-thet; Kì yung fûng yit-chhôi, súi chhiu liù-thûng.
[19] Kì chiông Kì ke fa khí-sṳ pûn Ngâ-kok, chiông Kì ke kûi-thin lâu fap-chet chhòn-pûn Yî-set-lie̍t.
[20] Kì mò án-ngiòng tui-thai phe̍t ke koet-kâ; kì-têu chhiòn mò liáu-kié Kì ke fap-chet. Hâ-li-lu-yá!