[1] Song-chú â, tui Ngì hien-song kám-chhia sṳ̍t-chhai chṳ̂n-hó! Chṳ-kô-chá â, kô-siung Ngì ke miàng sṳ̍t-chhai chṳ̂n-hó!
[2] Ngài tak chêu-sṳ̀n oi chhòn-yòng Ngì put-pien ke chhṳ̀-oi, ngài tak am-pû oi kóng-sot Ngì ke sin-sṳ̍t,
[3] oi yung sṳ̍p-hièn-khìm lòi phan-cheu, yung su-khìm mî-meu ke sâng-yîm lòi-fò.
[4] Song-chú â, Ngì ke chok-vì pûn ngài tet-tó fôn-hí; ngài oi yîn-vi Ngì ke sú só-cho ke lòi fôn-fû.
[5] Song-chú â, Ngì só-hàng ke chṳ̂n ví-thai! Ngì ke yi-ngiam sṳ̍t-chhai fî-sòng chhṳ̂m!
[6] Nga-ta ke m̀-voi liáu-kié, ngong-é ya m̀-voi mìn-pha̍k liá-khien sṳ:
[7] sûi-yèn fái-ngìn chhiong yâ-chhó án voi sâng, hàng-sṳ chit-ok ke hîn-vong yit-sṳ̀, kì-têu chui-heu voi vàn-chhiòn sêu-me̍t;
[8] chúng-he, Song-chú â, Ngì yún-yén he chṳ-kô vù-song ke!
[9] Song-chú â, ngài-têu chhîn-chhú tî: Ngì ke-têu sù-thi̍t thin-chho̍k voi me̍t-mòng; hàng-sṳ chit-ok ke chhiòn-phu voi si-san.
[10] Ngì pûn ngài chhiong yâ-ngiù án khiòng-chong; Ngì su-pûn ngài khi̍t-thai ke hen-fuk.
[11] Ngài chhîn-muk khon-tó ngài ke sù-thi̍t sṳt-phai; ngài chhîn-ngí thâng-tó kûng-kit ngài ke fái-ngìn kieu-chṳ̂.
[12] Chṳn-chhṳ̍t ke ngìn voi chhiong chûng-su án meu-sṳn, chhiong Lì-pâ-nun ke hiông-pak-su án kô-thai.
[13] Kì-têu chhiong chung chhai Song-chú sṳn-thien tú ke su-é, chhai ngài-têu Song-ti ke thìn-yen tú kín-lòi kín-vong,
[14] to ló hàn-he voi kiet kó-chṳ́, kî-ya̍p cha̍t-cha̍t, yún-yén chhiâng-chhui.
[15] Liá chṳn-mìn Song-chú he kûng-chṳn ke, ngài ke phàn-sa̍k chhiòn-mò put-ngi.