[1] Ngì-têu oi kám-chhia Song-chú, khiù-ham Kì ke miàng; oi hiong van-koet chhòn-yòng Kì ke chok-vì!
[2] Ngì-têu oi chhong-kô lòi siung-chan Kì! Oi kóng-sot Kì khì-meu ke chok-vì!
[3] Ngì-têu oi yîn-vi Kì ke sṳn-miàng khoai-lo̍k! Ngien yit-chhiet chhìm-khiù Song-chú ke ngìn fôn-hí!
[4] Oi khiù Song-chú pông-chhu; oi sṳ̀-sòng kin-pai Kì.
[5] Song-ti ke phu̍k-ngìn Â-pak-lâ-hón ke heu-thoi â, Ngâ-kok ke chṳ́-sûn, Kì só kién-sién ke chṳ́-mìn â, ngì-têu oi ki-tet Kì só-cho khì-meu ke chok-vì, Kì só-hàng ke sṳ̀n-chiak lâu só kóng-hí ke sṳ́m-phan.
[7] Kì he Song-chú — ngài-têu ke Song-ti; Kì ke sṳ́m-phan chhòn-phien chhiòn sṳ-kie.
[8] Kì voi yún-yén sú Kì ke yok; Kì só-kóng ke yin-hí chhṳ̍t-to chhiên-thoi.
[9] Kì ki-tet thùng Â-pak-lâ-hón só-li̍p ke yok, hàn-yû Kì fat-sṳ su-pûn Yî-sat ke yin-hí.
[10] Song-chú thùng Ngâ-kok kiên-thin liá-yok cho thiàu-li, chhiu-he Kì pûn Yî-set-lie̍t yún-kiú ke khie-yok.
[11] Kì kóng: “Ngài oi chiông Kâ-nàm-thi su-pûn ngì, chhiòn-phu oi cho ngì-têu ke sán-ngia̍p.”
[12] Ke-sṳ̀, Song-ti chṳ́-mìn ke ngìn-tên yû-han, su-muk chhin-séu, chhai Kâ-nàm-thi chhiam-sṳ̀ he̍t.
[13] Kì-têu tui liá-chhu̍k phêu-liù to ke-chhu̍k, tui liá-koet liù-long to ke-koet.
[14] Chúng-he Song-ti put-chún ngoi-ngìn khî-fu kì-têu; vi-tó kì-têu, Kì kín-ko ngoi-chhu̍k ke-têu vòng.
[15] Kì kóng: “Cho-m̀-tet vì-nàn Ngài só kién-sién ke; ngì-têu cho-m̀-tet sông-hoi Ngài ke siên-tî!”
[16] Song-chú sṳ́ ke thi-fông tù-tó kî-fông; Kì chhiet-thôn kì-têu liòng-sṳ̍t ke lòi-ngièn.
[17] Chúng-he Kì chhâi Yok-sit vi kì-têu siên-hàng; Yok-sit pûn-ngìn mai-cho nù-chhòi.
[18] Kì ke sûng-kiok pûn kiok-liàu só-tén, kì ke kiáng-kîn tai-tén thiet-kâ-só.
[19] Song-chú ke fa kín sṳ-lien kì, chhṳ̍t-to kì só yi-ngièn ke sṳ sṳ̍t-hien.
[20] Âi-khi̍p ke vòng chhiu phai-ngìn hi chiông kì sṳt-fong; thúng-chhṳ ngìn-mìn ke chhiu fî-fu̍k kì ke chhṳ-yù,
[21] phai kì cho vòng-kiûng ke chóng-kón, ham kì chhṳ-lî kì só-yû ke yit-chhiet,
[22] pûn kì chhṳ-yù kón-lî vùn-vú pak-kôn, yû-khièn chiông chṳ-fi kâu ke-têu ngièn-ló.
[23] Heu-lòi Yî-set-lie̍t hi-to Âi-khi̍p, Ngâ-kok chhiam-he̍t chhai Hàm ke thi-fông.
[24] Song-chú sṳ́ Kì ke chṳ́-mìn chen-kâ, pûn kì-têu pí thi̍t-ngìn kha khiòng-sṳn.
[25] Kì sṳ́ Âi-khi̍p-ngìn yen-hen Kì ke chṳ́-mìn; kì-têu yung kúi-kie tui-fu Kì ke phu̍k-ngìn.
[26] Kì chhiu chhâi Kì ke phu̍k-ngìn Mô-sî, yu phai Kì só kién-sién ke Â-lùn.
[27] Kì-têu hién-chhut Song-ti ke sṳ̀n-chiak, chhai Hàm ke thi-fông hàng thai khì-sṳ.
[28] Song-ti sṳ́ ke-vi chhûng-mân vû-am, chúng-he Âi-khi̍p-ngìn m̀-thâng Kì ke min-lin.
[29] Kì chiông kì-têu ke hò-súi pien-cho hiet, sṳ́ kì-têu ke ǹg chhiòn-phu sí chhiang-chhiang.
[30] Kì-têu koet-nui tak-vi he hà-mà, lièn vòng-kiûng tî-poi ya he khiung-yong.
[31] Song-ti ha-lin, vû-yìn kûi-khiùn pî-lòi, set-mà ya he khiung-yong, phien-mân chhiòn-thi.
[32] Kì kong pên-pho̍k chhiong lo̍k-yí, sṳ́ ngiap-lang to-chhu kín-ngiap.
[33] Kì tá-fái phù-thò-su lâu vù-fâ-kó-su, tá-thôn kì-têu koet-nui só-yû ke su-muk.
[34] Kì yit chhut-sâng, chhó-máng chhiu pî-lòi, chhiên-chhiên van-van, mò phan-fap hó son.
[35] Kì-têu chiông koet-nui ke chhiâng-chhoi khie chhiang-chhiang, chiông thièn-yèn só-yû ke ńg-kuk sṳ̍t kông-kông.
[36] Kì chhṳ̀-sí koet-nui só-yû ke chóng-chṳ́, chhiu-he ke-têu ngìn thèu-thôi ke lai-é.
[37] Yèn-heu, Kì chhiu tai-liâng Yî-set-lie̍t-ngìn chhut-lòi; kì-têu tai-tén kîm-ngiùn, kok kî-chhu̍k sà-sà yúng-khien.
[38] Kì-têu lì-khôi ke sṳ̀, Âi-khi̍p-ngìn fî-sòng fôn-hí, yîn-vi kì-têu kiâng Yî-set-lie̍t-ngìn kiâng-to voi sí.
[39] Song-ti yung yùn châ-tén Kì ke chṳ́-mìn, am-pû-sṳ̀ yung fó lòi cheu-kông kì-têu.
[40] Kì-têu yêu-khiù, Kì chhiu sṳ́ êm-thùn pî-lòi; yu tui thiên-táng kong liòng-sṳ̍t mân-chiuk kì-têu.
[41] Kì tá-khôi phàn-sa̍k, pûn chhièn-súi yúng chhut-lòi, súi chhiong hò-pa liù chhai châu-châu ke khóng-yâ.
[42] Yîn-vi Kì ki-tet Kì sṳ̀n-sṳn ke yin-hí, chhiu-he tui Kì phu̍k-ngìn Â-pak-lâ-hón só-kóng ke.
[43] Kì tai Kì ke chṳ́-mìn fôn-fôn hí-hí chhut-lòi; Kì só kién-sién ke chṳ́-mìn fôn-fû yu chhong-kô.
[44] Kì chiông lie̍t-koet ke thú-thi su-pûn kì-têu, pûn kì-têu sṳ̀n-su ngoi-chhu̍k-ngìn ke thièn-yèn,
[45] hó-pûn Kì ke chṳ́-mìn sú Kì ke kûi-chet, pin chûn-hàng Kì yit-chhiet ke kau-sṳ. Oi chan-mî Song-chú!