[1] Ngài tui Song-ti chhut-sâng khiù-ham; ngài thai-sâng khiù Song-ti, khiù Kì chhùi-thâng.
[2] Fam-nan ke sṳ̀, ngài chhìm-khiù Chú; ngài kûi am-pû khià-sú khì-tó, ngài ke sîm m̀-hén su ngìn ke ôn-ví.
[3] Ngài sṳ̂-ngiam Song-ti chhiu kín than-sit; ngài tiâm-tiâm kín-sióng chhiu kín sông-sîm.
[4] Ngì sṳ́ ngài kûi am-pû soi m̀-lo̍k kau; ngài yù-sèu chhâu-fàn to kóng m̀-chhut fa.
[5] Ngài sióng-ngiam ko-hi ke ngit-è, sióng-hí siên-chhièn ke-têu ngièn-ngit.
[6] Ngài theu-ya kín-sióng; ngài sîm-kôn kín-mun:
[7] “Kám-kóng Chú oi yún-yén fit-thet ngài-têu? Kì yún-yén mò-oi chai sṳ̂-ên he-mò?
[8] Kì put-pien ke chhṳ̀-oi chhiu yún-yén thìn-thet mâ? Kì ke yin-hí chhiu van-thoi lo̍k-khûng he-mò?
[9] Kám-kóng Song-ti yí-kîn m̀ ki-tet ngióng-pân sṳ̂-ên? Kám-kóng Kì ke lìn-mén pûn nu-hi set-thet he-mò?”
[10] Ngài chhiu kóng: “Liá he ngài chui sông-sîm ke sṳ-chhìn, Chṳ-kô-chá ke yu-sú yí-kîn mò khiung-yong lé.”
[11] Song-chú â, ngài oi sióng-ngiam Ngì ví-thai ke chok-vì; ngài oi sióng-hí Ngì vông-sṳ̀ só sṳ̀n-chhiu ke khì-sṳ.
[12] Ngài oi mén-sióng Ngì yit-chhiet ke só-cho; ngài oi kín-ngiam Ngì thai-nèn ke chok-vì.
[13] Song-ti â, Ngì só-cho ke yit-chhiet he sṳn-kiet ke; khì-thâ ke sṳ̀n-mìn, nai yit-ke thùng Ngì pí-et-tet!
[14] Ngì he hàng sṳ̀n-chiak khì-sṳ ke Song-ti; Ngì hiong lie̍t-koet hién-chhut Ngì ke thai-nèn.
[15] Ngì yung thai-li̍t kiu-su̍k Ngì ke chṳ́-mìn, chṳ́n-kiu Ngâ-kok lâu Yok-sit ke heu-thoi.
[16] Song-ti â, hói-súi khon-tó Ngì chhiu chho̍k-kiâng; chhṳ̂m-yên kien-tó Ngì, khiung-yong ya kín-chhat.
[17] Vû-yùn kong-hâ thai-yí; thiên-khûng kín hióng lùi-kûng; ngiap-lang sa-lòi sa-hi.
[18] Ngì ke lùi-kûng lung-lung-kún; ngiap-lang cheu-kông chhiòn sṳ-kie; thai-thi kiâng-to kín-chûn kín-chhat.
[19] Ngì hàng-ko thai-hói, Ngì ye̍t-ko chhṳ̂m-yên, chúng-he mò-ngìn khon-tó Ngì ke kiok-chiak.
[20] Ngì sṳt thûng-ko Mô-sî lâu Â-lùn ke sú, chhiong mu̍k-chá án-ngiòng tai-liâng Ngì ke chṳ́-mìn.