[1] Yû khièn-sṳ ke ngìn â, ngì cho-má-ke khoâ-khiéu só-cho ke fái-sṳ nè? Song-ti ke chhṳ̀-oi he yún-yén m̀-voi kói-pien ke.
[2] Ngì ke sa̍t-mà chhiong nò-li ke thi-thèu-tô; ngì yit-chhṳ̍t chṳ-chho sṳ-fî sông-hoi phe̍t-ngìn.
[3] Ngì hau sià-ok, nâu liòng-san; ngì oi hî-ká, hen chṳ̂n-lî.
[4] Ngì liá-ke fâ-liâu-kú â, ngióng án-oi chung-sông phe̍t-ngìn!
[5] Yîn-vi án-ngiòng, Song-ti oi chha̍t-tái sêu-me̍t ngì; Kì oi chok ngì, chiông ngì tui vuk-hâ khiú chhut-lòi, chiông ngì tui sṳ-ngìn chûng lièn-thèu tai-kîn pâng-thet.
[6] Ngi-ngìn khon-tó chhiu voi chho̍k-kiâng; kì-têu voi seu ngì, kóng:
[7] “Khon â, liá chhiu-he mò yí-kho Song-ti ke ngìn; kì yí-kho chhṳ-kâ ke chhièn tô, cho fái-sṳ kiên-li̍p chhṳ-kâ.”
[8] Chúng-he ngài, ngài chhiong chung chhai Song-ti vuk-hâ meu-sṳn ke kám-lám-su; ngài yún-yún yén-yén yí-kho Song-ti put-pien ke chhṳ̀-oi.
[9] Song-ti â, ngài oi yún-yén kám-chhia Ngì só-cho ke yit-chhiet; ngài oi chhai Ngì chûng-sîm ke chṳ́-mìn chûng chhòn-yòng Ngì ke hó miàng-sâng.