[1] Song-ti â, ngài-têu kám-chhia Ngì, ngài-têu kám-chhia Ngì! Ngài-têu siên-yòng Ngì ke ví-thai, kóng-sot Ngì khì-meu ke chok-vì!
[2] Song-ti kóng: “Ngài yí-kîn thin-hó ngit-è; Ngài oi yung kûng-tong lòi sṳ̂-hàng sṳ́m-phan.
[3] Sûi-yèn thi lâu he̍t chhai thi-song ke ngìn yèu-thung, Ngài hàn oi pûn thi ke kîn-kî tet-tó kiên-ku.
[4] Ngài ham kiêu-ngau ke ngìn mo̍k kiêu-ngau; Ngài ham hiûng-ok ke ngìn mo̍k hau-teu;
[5] mo̍k chhṳ-thai thèu ngo-ngo, mo̍k kóng-fa kiáng vàng-vàng.”
[6] Ngìn tet-tó kô-sṳ̂n m̀-he tui tûng-fông ya-he sî-fông lòi ke, ya m̀-he tui khóng-yâ lòi ke;
[7] vì-yû Song-ti ton-thin yit-chhiet; Kì sṳ́ yit-sà kong-hâ, yit-sà kô-sṳ̂n.
[8] Song-chú ke sú-chûng nâ-tén yit-chak pî-é, tî-poi chông-mân Kì thai fat-khién ke ngiàm-chiú; Kì tó chhut-lòi, sṳ-song sià-ok ke ngìn lûng-chúng oi lîm, yit-chhṳ̍t lîm-to chui-heu yit-tit.
[9] Chúng-he ngài oi siên-yòng Ngâ-kok ke Song-ti; ngài oi chhong-kô siung-chan Kì chhṳ̍t-to yún-yén.
[10] Kì oi tá-sui fái-ngìn ke khièn-sṳ; Kì oi kâ-thiâm ngi-ngìn ke li̍t-liong.