[1] Ngài ke sîm yû chhin-chiâng ke fa chhung-tén chhut-lòi, vi-tó vòng ngìm-chhong mî-meu ke sṳ̂-kô; ngài ke sa̍t-mà chhiu-chhiong chok-kâ liù-li ke pit.
[2] Chhai van-ngìn chûng, ngì thi-yit sṳ̂-vùn; ngì ke kóng-fa ya mân-yû ên-fi; Song-ti chhiu yún-yén su-fuk pûn ngì!
[3] Ví-thai ke vòng â, ngien ngì yêu-kiên phi-kiam! Ngien ngì hién-chhut ngì ke chûn-yùng lâu vî-ngiàm!
[4] Vi-tó vì-fu chṳ̂n-lî lâu chṳn-ngi, chhai vî-ngiàm chûng yúng-kám hiong-chhièn! Ngì ke yu-sú oi cho-chhut tet-ngìn-kiâng ke sṳ.
[5] Ngì ke chien yu chiâm yu li, sa-ngi̍p thi̍t-ngìn ke sîm; van-pâng chhiòn-phu hòng-fu̍k chhai ngì ke kiok-chhièn.
[6] Song-ti su ngì ke pó-chho yún-yén chhòng-chhùn; chṳn-chhṳ̍t he ngì chhṳ-lî koet-kâ ke kîn-kí.
[7] Ngì fôn-hí kûng-ngi, yen-hen sià-ok; só-yî Song-ti — chhiu-he ngì ke Song-ti sién-li̍p ngì, pûn ngì chhûng-mân hí-lo̍k, yàng-ko thùng-phân.
[8] Ngì ke sâm fat-chhut mu̍t-yo̍k, chhṳ̀m-hiông lâu ngiuk-kui ke hiông-mi; siong-ngà-kiûng tú chhòn-chhut hièn-khìm ke yîm-ngo̍k, pûn ngì fôn-hí.
[9] Ngì ke pîn-fî chûng yû hó-tô he lie̍t-koet ke kûng-chú; vòng-heu tai-tén sùn-kîm ke chông-sṳt khî chhai ngì yu-phién.
[10] Vòng ke sîn-ngiòng â, oi thâng, oi sióng, oi tiâm-tiâm thâng: M̀-hó fài-ngiam ngì ke pún-chhu̍k lâu ngì ke chhîn-chhit!
[11] Án-ngiòng, ngì ke mî-mau chang voi sṳ́ vòng lien-mu ngì; yîn-vi kì he ngì ke chú-ngìn, ngì oi sun-fu̍k kì!
[12] Thai-ngì ke ngìn voi tai-tén lî-vu̍t lòi-kien ngì; yû-chhièn-ngìn voi sióng-oi tet-tó ngì ke fôn-hí.
[13] Chhai kiûng-chûng, kûng-chú chok-to fî-sòng chiâng! Kì só-chok ke sâm he yung kîm-sien siu ke.
[14] Kì phî-song lî-fu̍k, pûn-ngìn tai-to vòng ke mien-chhièn; ńg-pîn-siong lâu sṳ́-ńg ya thèn-tén hi ngì ke-vi.
[15] Kì-têu chhiòn-phu fôn-hí khoai-lo̍k, khiung-ha ngi̍p-hi vòng ke kiûng-thien.
[16] Vòng â, ngì chiông-lòi voi yû tông-tô chṳ́-sûn sṳ̀n-chiap lie̍t-chú ke vòng-vi; ngì voi sṳ́ kì-têu thúng-chhṳ chhiòn-thi.
[17] Ngài ke sṳ̂ voi pûn ngì ke miàng-sâng chhòn-to van-thoi; van-mìn voi yit-chhṳ̍t chhṳ̂n-siung ngì to yún-yún yén-yén.