[1] Song-chú — chṳ́n-kiu ngài ke Song-ti â, ngài ngit-ya chhai Ngì mien-chhièn khiù-ham.
[2] Khiù Ngì thâng ngài ke khì-tó; chet-ngí thâng ngài ke khiù-ham!
[3] Án-tô châi-nan lo̍k chhai ngài ke sṳ̂n-song; ngài ke sin-miang yí-kîn chiap-khiun yîm-kiên.
[4] Ngài thùng só-yû lìm-chûng ke ngìn khiung-yong, chhiòn-phu ke ngièn-hi yí-kîn sêu chhiang-chhiang.
[5] Ngài pûn-ngìn fit chhai sí-ngìn ke tông-chûng, chhiong pûn-ngìn chhṳ̀-sí ke soi chhai fùn-mu, mò khó-nèn chai tet-tó Ngì ke ki-ngiam, mò khó-nèn chai tet-tó Ngì ke fù-chhṳ̀.
[6] Ngì chiông ngài fit chhai chhṳ̂m-hâng tú, chhin-chhṳ̂m yu chhin-am ke só-chhai.
[7] Ngì ke nu-hi án-chhûng chak-tén ngài; Ngì yung yit-chhiet ke pô-long tá ngài.
[8] Ngì sṳ́ ngài ke phèn-yû lì-khôi ngài, sṳ́ ngài sàng-cho kì-têu só-nâu ke. Ngài pûn-ngìn koân-tén, mò phan-fap thot-sṳ̂n;
[9] ngài ke muk-chû yîn-vi sông-sîm mùng-thet. Song-chú â, ngài tak-ngit khiù-ham Ngì; ngài tui Ngì khià-sú, pet-chhiet khì-tó.
[10] Ngì oi hàng khì-sṳ pûn sí-ngìn khon he-mò? Sí-ló kám-voi hong-hí-lòi siung-chan Ngì mâ?
[11] Má-ngìn voi chhai fùn-mu tú kóng-hí Ngì ke chhṳ̀-oi? Má-ngìn voi chhai yîm-kiên siên-yòng Ngì ke sin-sṳ̍t?
[12] Chhai ke-vi am mô-mô, ngióng khon-tet-tó Ngì hàng ke khì-sṳ? Chhai ke-vi van-sṳ hiû, ngióng hàn voi sióng-ngiam Ngì ke kûng-ngi?
[13] Song-chú â, he ngài khién-khiù Ngì lòi pông-chhu; tak-ngit thiên yit-kông, ngài chhiu tui Ngì khì-tó.
[14] Song-chú â, Ngì cho-má-ke hi-chhie̍t ngài? Ngì cho-má-ke êm-tén mien m̀-tap ngài?
[15] Ngài chhiùng-se chhiu su chhin-tô khú, hiám-hiám mò-miang; Ngì tui ngài ke chit-fa̍t, sṳ́ ngài sṳ̂n-sîm chhie̍t-mong.
[16] Ngì ke thai fat-khién yim-ko ngài ke sṳ̂n-thí; Ngì yung tet-ngìn-kiâng ke tá-kit fí-me̍t ngài.
[17] Khú-nan chhiong thai-súi kûi-ngit chiông ngài vì-tén; fam-nan cho-yit-ha tui si-mien vì-khun ngài.
[18] Ngì sṳ́ ngài ke phèn-yû lìn-sa lì-khôi ngài; vû-am chhiu sàng-cho ngài vì-yit ke thùng-phân.