[1] Ngien siung-chan kûi-pûn Song-chú — ngài ke phàn-sa̍k! Kì hiun-lien ngài ke sú chan-chên, hiun-lien ngài ke sú-chṳ́ siông-chhṳ̀.
[2] Kì he ngài chhṳ̀-oi ke Chú, ngài ke sàng-pó, ngài ke phit-nan-só, ngài ke chṳ́n-kiu-chá, ngài ke tún-phài, ngài só yí-kho ke; Kì sṳ́ lie̍t-koet hòng-fu̍k ngài.
[3] Song-chú â, ngìn son má-ke nò? Ngì koân-sîm kì! Voi hiú-fai ke ngìn son má-ke? Ngì ku-ngiam kì!
[4] Ngìn chhiong yit-héu hi thin-thin; Kì ke ngièn-ngit chhiu-chhiong yáng pî-tén ko-hi.
[5] Song-chú â, khiù Ngì tá-khôi thiên, chhîn-chhṳ kong-lìm; khiù Ngì miâ ke-têu sân, pûn sân chhut-yên.
[6] Khiù Ngì fat-chhut ngiap-lang, kón-san sù-thi̍t; khiù Ngì sa-chhut chien, pûn kì-têu fun-lon.
[7] Khiù Ngì tui thiên-táng chhûn-sú kiu ngài, tui thai-súi ke tông-chûng chṳ́n-kiu ngài, kiu ngài thot-lì ngoi-lòi ke khiòng-thi̍t.
[8] Kì-têu ke choi chôn-mùn kóng fâ-liâu, khià yu-sú fat-sṳ ya he hî-ká.
[9] Song-ti â, ngài oi tui Ngì chhong sîn-kô; ngài oi thàn sṳ̍p-hièn-khìm lòi siung-chan Ngì!
[10] Pûn chung-vòng tet-sṳn ke chhiu-he Ngì; Ngì chṳ́n-kiu Ngì ke phu̍k-ngìn Thai-ví.
[11] Khiù Ngì kiu ngài thot-lì chhàn-phau ke tô-kiam, kiu ngài thot-lì ke-têu ngoi-lòi ke khiòng-thi̍t. Kì-têu ke choi chôn-mùn kóng fâ-liâu, khià yu-sú fat-sṳ ya he hî-ká.
[12] Ngien ngài-têu ke lai-é chhai heu-sâng ke sṳ̀ chhiu chhin chap-chen chhiong thai-su; ngien ngài-têu ke moi-é mî-mau chhiong kiûng-thien chón-kok tiâu-khiet ke sa̍k-chhû.
[13] Ngien ngài-têu ke chhông-khu mân-mân, tún kok-chúng ke ńg-kuk; ngien ngài-têu mu̍k-chhòng ke yòng-khiùn sên-sán chhiên-chhiên van-van.
[14] Ngien ngài-têu ke ngiù-khiùn fàn-chhṳ̍t tô-tô, mò lau-thôi ke, ya mò pûn-ngìn chhióng-chéu. Ngien ngài-têu ke kiê-hong mò thai-kieu sâng.
[15] Hióng-su liá-chúng chhìn-khóng ke koet-kâ sṳ̍t-chhai yû fuk-hi! Chûn Song-chú cho kì-têu ke Song-ti, liá ngìn-mìn he ngióng-pân yû fuk-hi â!