[1] M̀-sṳ́ yîn-vi chok-ok ke ngìn pot-at; ya m̀-sṳ́ chhit-tu hàng put-ngi ke ngìn.
[2] Kì-têu voi chhiong chhó tông-kiak khû-thet; kì-têu voi chhiong chhṳ̍t-vu̍t chhin-kiak châu-thet.
[3] Oi sin-kho Song-chú, chhin-li̍t hàng-san; oi chhai liá thi-song ôn-kî lo̍k-ngia̍p.
[4] Oi yîn-vi Song-chú fôn-fôn hí-hí; Kì chhiu chiông ngì sîm só-oi ke su-pûn ngì.
[5] Oi chiông van-sṳ kâu-thok Song-chú; sin-kho Kì, Kì chhiu voi sṳ̀n-chhiòn.
[6] Kì voi pûn ngì ke chṳn-ngi chhiong kông án-ngiòng fat-chhut; Kì voi pûn ngì ke kûng-chṳn chhiong tông-chu ke ngit-thèu.
[7] Oi tiâm-tiâm chhai Song-chú mien-chhièn, nai-sîm tén-heu Kì; m̀-hó yîn-vi phe̍t-ngìn hàng-sṳ sun-li chhiu pot-at, mo̍k yîn-vi fái-ngìn ke kie-mèu sṳ̀n-kûng lòi put-phìn.
[8] M̀-hó fat-khién, ya m̀-hó nâu-ngìn; mo̍k pot-at, miên-tet ngì sa cho-fái.
[9] Cho-fái ke ngìn yit-thin voi su chién-chhù; chúng-he, ngióng-mong Song-chú ke ngìn chhiu nèn sṳ̀n-chiap thú-thi.
[10] Yit-ngiap-muk, fái-ngìn chhiu sêu-me̍t thet-hi; ngì sióng-oi chhìm kì-têu, ya chhìm m̀-tó.
[11] Khiâm-pî ke ngìn chang nèn sṳ̀n-chiap thú-thi; kì-têu voi hióng-su vù-khiùng ke hen-fuk!
[12] Fái-ngìn mèu-hoi ngi-ngìn, hiong kì ngâu-ngà chhiet-chhṳ́.
[13] Chúng-he Chú oi seu fái-ngìn, yîn-vi Kì tî kì-têu ke ma̍t-ngit voi-to lé.
[14] Fái-ngìn pâng-chhut tô-kiam, lâi-khôi kì-têu ke kiûng-chien, oi tá-vang khiùng-khú ke ngìn, sat-hoi chṳn-chhṳ̍t ke ngìn.
[15] Chúng-he, kì-têu ke tô-kiam voi chhiuk-chhôn chhṳ-kâ ke sîm; hàn-yû, kì-têu ke kiûng-chien voi pûn-ngìn áu-thôn thet-hi.
[16] Ngi-ngìn só-yû ke sûi-yèn séu, yàng-ko fái-ngìn chhòi-sán chhin-tô.
[17] Yîn-vi fái-ngìn ke khièn-sṳ voi pho-me̍t; chúng-he Song-chú oi fù-chhṳ̀ ngi-ngìn.
[18] Song-chú tî vàn-chhiòn-ngìn ke su-ngièn; kì-têu ke sán-ngia̍p yún-yén chhòng-chhùn.
[19] Kì-têu chhai fam-nan ke ngit m̀-voi sṳt-mong, kî-fông ke sṳ̀-chiet hàn-he yû-hó páu-chiuk.
[20] Chúng-he, chok-ok ke ngìn chui-heu voi me̍t-mòng. Song-chú ke tui-thi̍t voi chhiong yâ-fâ chhia-thet; kì-têu voi chhiong yùn-yên khiung-yong sêu-san thet.
[21] Fái-ngìn chia-chhièn m̀-vàn; chúng-he ngi-ngìn thai-fông sṳ̂-sá.
[22] Song-chú su-fuk ke ngìn voi sṳ̀n-chiap thú-thi; Kì só chu-chú ke yit-thin voi su chién-chhù.
[23] Song-chú na fôn-hí má-ngìn só-hàng ke lu, chhiu sṳ́ kì ke kiok-phu vún-tong;
[24] van-yit tiet-tó, ya m̀-voi tiet-to tap-tap, yîn-vi Song-chú fù-tén kì ke sú.
[25] Ngài chhiùng-se to liá-ha, yí-kîn sṳ̍t-to án-ló, màng-sṳt khon-ko yû ngi-ngìn pûn Song-chú piong-thet, m̀-sṳt khon-tó ngi-ngìn ke chṳ́-sûn cho khiet-sṳ̍t.
[26] Kì yit-chhṳ̍t kiu-chi ngìn, lo̍k-yi chia-pûn ngìn; kì ke chṳ́-sûn ya chhiòn-phu tet-tó fuk-hi!
[27] Ngì-têu oi lì-ok hàng-san, chhiu cho-tet yún-yén ôn-kî lo̍k-ngia̍p.
[28] Yîn-vi Song-chú só-oi ke chhiu-he kûng-ngi; Kì m̀-voi piong-thet Kì chûng-sîm ke chṳ́-mìn. Kì-têu voi yún-yén tet-tó Kì ke pó-yu; chúng-he, fái-ngìn ke chṳ́-sûn voi su chién-chhù.
[29] Yit-chhiet ke ngi-ngìn voi sṳ̀n-chiap thú-thi, chṳ́-chṳ́ sûn-sûn yún-kiú he̍t chhai liá-vi.
[30] Ngi-ngìn ke choi fat-chhut chṳ-fi ke fa; kì ke sa̍t-mà kóng-lun kûng-ngi ke sṳ.
[31] Kì ke sîm-chûng yû Song-ti ke kau-sṳ; kì ke kiok-phu yit-thin m̀-voi thiu-tó.
[32] Fái-ngìn kín thêu-khon ngi-ngìn, oi chhìm kî-fi sat-hoi kì;
[33] chúng-he Song-chú m̀-voi piong-thet ngi-ngìn, m̀-voi pûn kì lo̍k chhai sù-thi̍t sú-chûng, su sṳ́m-phan ya m̀-voi chṳ-to thin-chhui.
[34] Oi ngióng-mong Song-chú, chûn-hàng Kì ke tho-lu! Kì voi kô-sṳ̂n ngì, pûn ngì sṳ̀n-chiap thú-thi; ngì voi khon-tó chok-ok ke ngìn su chién-chhù.
[35] Ngài sṳt khon-ko yit-ke tông-ok ke fái-ngìn, chhiong Lì-pâ-nun ke hiông-pak-su án kô-thai;
[36] heu-lòi ngài kîn-ko ke sṳ̀, kì sa m̀ kien-thet; ngài chhìm-lòi yu chhìm-hi, chúng-he chhìm kì m̀-tó.
[37] Chu-yi vàn-chhiòn-ngìn, khon chṳn-chhṳ̍t-ngìn; oi fò-phìn ke ngìn chṳ́-sûn hîn-vong;
[38] chúng-he phoi-ngia̍k ke ngìn voi chhiòn-phu sêu-me̍t; fái-ngìn ke heu-thoi voi su chién-chhù!
[39] Song-chú he ngi-ngìn ke chṳ́n-kiu-chá, kì-têu fam-nan sṳ̀ ke phit-nan-só.
[40] Song-chú pông-chhu kì-têu, chṳ́n-kiu kì-têu; Kì kiu kì-têu thot-lì sià-ok ke ngìn, yîn-vi kì-têu chhìm-khiù Kì ke pí-yu.