[1] “Oi kám-chhia Song-chú, yîn-vi Kì he chṳ-san; Kì ke chhṳ̀-oi yún-yén chhòng-chhùn!”
[2] Song-chú só kiu-su̍k ke ngìn â, ngì-têu oi án-ngiòng kín-kóng! Kì kiu ngì-têu thot-lì sù-thi̍t ke sú;
[3] Kì tui tûng, sî, nàm, pet, tai ngì-têu tui kok thi-fông to-chón-lòi.
[4] Yû-têu ngìn mì-sṳt chhai mò-ngìn he̍t ke khóng-yâ, chhìm m̀-tó lu hó-hi yû-ngìn he̍t ke sàng-sṳ.
[5] Kì-têu tú-kî yu choi-châu, chhiòn-mò pan-si̍t ke hî-mong.
[6] Chhai kip-nan chûng, kì-têu khiù-ham Song-chú, Kì chhiu chṳ́n-kiu kì-têu thot-lì khú-nan.
[7] Kì tai-liâng kì-têu hàng chhṳ̍t-lu, hi-to yû-ngìn he̍t ke sàng-sṳ.
[8] Kì-têu yin-tông kám-chhia Song-chú put-pien ke chhṳ̀-oi, siung-chan Kì vi-tó sṳ-kiên-ngìn só-hàng ke khì-sṳ.
[9] Kì pûn choi-châu ke ngìn tet-tó mân-chiuk, pûn tú-kî ke sṳ̍t chhin-hó yu chhin-páu.
[10] Yû-têu ngìn sên-fa̍t chhai vû-am lâu sí-yîm chûng, kì-têu su-chhin thung-khú yu pûn thiet-lien khún-tén,
[11] yîn-vi kì-têu phoi-ngia̍k Song-ti ke fa, méu-sṳ Chṳ-kô-chá ke chṳ́-yi.
[12] Song-ti yung lò-khú hòng-fu̍k kì-têu ke sîm; kì-têu vang-tó, chúng-he mò-ngìn lòi fù.
[13] Chhai kip-nan chûng, kì-têu khiù-ham Song-chú, Kì chhiu chṳ́n-kiu kì-têu thot-lì khú-nan.
[14] Kì tai kì-têu tui vû-am lâu sí-yîm chhut-lòi, yu pâng-thôn ke-têu khún-tén kì-têu ke só-lien.
[15] Kì-têu yin-tông kám-chhia Song-chú put-pien ke chhṳ̀-oi, siung-chan Kì vi-tó sṳ-kiên-ngìn só-hàng ke khì-sṳ.
[16] Kì tá-lan thùng-mùn, chám-thôn thiet mùn-chhôn.
[17] Yû-têu ngìn yîn-vi chhṳ-kâ ke ko-fam pot-phiang, yu yîn-vi chhṳ-kâ ke chhui-ok su-khú;
[18] kì-têu tui sṳ̍t-vu̍t chhiòn-mò vi-khiéu, kín-lòi chhiu kín-khiûn sí-mòng ke mùn.
[19] Chhai kip-nan chûng, kì-têu khiù-ham Song-chú, Kì chhiu chṳ́n-kiu kì-têu thot-lì khú-nan.
[20] Kì kóng yit-ki fa chhiu yî-hó kì-têu, kiu kì-têu thot-lì sí-mòng.
[21] Kì-têu yin-tông kám-chhia Song-chú put-pien ke chhṳ̀-oi, siung-chan Kì vi-tó sṳ-kiên-ngìn só-hàng ke khì-sṳ.
[22] Kì-têu yin-tông oi tui Kì hien kám-chhia ke chi, yung fôn-hí ke sṳ̂-kô kóng-sot Kì ke chok-vì!
[23] Yû-têu ngìn chhô-sòn chhut-hói, chhai thai-hói tông-chûng mèu-sên.
[24] Kì-têu khon-tó Song-chú ke chok-vì, Kì chhai chhṳ̂m-hói só-hàng ke khì-sṳ.
[25] Kì yit min-lin, chhiu hí khòng-fûng, sṳ́ hói-long kie̍p-to pan-thiên-kô.
[26] Yit-ha chhûng-to kô-kô, yit-ha lo̍k-to chhṳ̂m-chhṳ̂m, ngùi-kip chṳ-khi̍t, kì-têu kiâng-to sṳ̀n-fùn sêu-san.
[27] Kì-têu vang-lòi vang-hi, chhiong sṳ̍t chiú-chui; kì-têu ke chhòi-thiau vàn-chhiòn tién m̀-chhut.
[28] Chhai kip-nan chûng, kì-têu khiù-ham Song-chú, Kì chhiu chṳ́n-kiu kì-têu thot-lì khú-nan.
[29] Kì sṳ́ khòng-fûng phìn-chhin, pûn hói-long tiâm hâ-lòi.
[30] Kì-têu fôn-hí na-thiên, yîn-vi fûng-phìn long-chhin; Kì chhiu thu kì-têu to só-oi hi ke hói-kóng.
[31] Kì-têu yin-tông kám-chhia Song-chú put-pien ke chhṳ̀-oi, siung-chan Kì vi-tó sṳ-kiên-ngìn só-hàng ke khì-sṳ.
[32] Kì-têu yin-tông chhai chóng-ló ke ngi-fi chûng chan-mî Kì, chhai ngìn-mìn ke thai-fi chûng chhòn-yòng Kì ke ví-thai.
[33] Song-chú sṳ́ hò-pa pien-cho khóng-yâ, sṳ́ chhièn-súi châu-thet sàng-cho hôn-thi,
[34] sṳ́ chhin phì ke thú-thi pien-cho yàm-thi, yîn-vi he̍t chhai ke-vi ke ngìn chhin fái.
[35] Kì sṳ́ sâ-mo̍k tak-vi yû pî-thòng, sṳ́ hôn-thi sàng-cho chhièn-súi chṳ̂ thi.
[36] Kì pûn tú-kî ke ngìn he̍t chhai ke-vi; ke-têu ngìn chhiu hí yit-chho sàng lòi-he̍t.
[37] Kì-têu kâng-thièn ve-chúng, chung phù-thò, tet-tó fî-sòng fûng-fu ke sû-sṳ̀n.
[38] Kì su-fuk pûn kì-têu ke chṳ́-sûn kín-tô; Kì sṳ́ kì-têu ke thèu-sâng yû-kâ mò-kám.
[39] Heu-lòi yîn-vi pûn-ngìn khî-fu, su-khú su-nan, Song-ti ke chṳ́-mìn chhiu kín kám-séu, kín chhôi-ko.
[40] Song-ti sṳ́ thúng-chhṳ-chá tù-tó vú-yu̍k, pûn kì-têu phêu-liù chhai mò-ngìn he̍t ke khóng-yâ.
[41] Chúng-he, Kì chṳ́n-kiu khiùng-khú-ngìn thot-lì khú-nan, pûn kì-têu ke kâ-chhu̍k chhiong yòng-khiùn án hîn-vong.
[42] Chṳn-chhṳ̍t ke ngìn khon-tó chhiu chhin fôn-hí; chúng-he fái-ngìn chhiòn-phu á-khiéu vù-ngièn.
[43] Ngien yû chṳ-fi ke ngìn chu-yi liá-têu sṳ-chhìn; ngien kì-têu sṳ̂-ngiam Song-chú put-pien ke chhṳ̀-oi.