[1] Song-ti â, lìn-mén ngài, khiù Ngì lìn-mén ngài, yîn-vi ngài yí-kho Ngì. Ngài oi khong chhai Ngì ke yi̍t-kap hâ khiù Ngì pó-yu, tén-to só-yû ke châi-nan ko-hi.
[2] Ngài oi thai-sâng khiù-ham Chṳ-kô ke Song-ti, chhiu-he su ngài yit-chhiet sî-yeu ke Song-ti.
[3] Kì voi tui thiên-táng chhûn-sú kiu ngài; Kì voi kiuk-chéu ap-pet ngài ke ngìn. Song-ti voi tui ngài hién-chhut Kì put-pien ke chhṳ̀-oi lâu sin-sṳ̍t.
[4] Ngài pûn sù-thi̍t vì-khun; kì-têu chhiong oi sṳ̍t ngìn ke sṳ̂-é. Kì-têu ke ngà-chhṳ́ chhiong chhiông, chhiong chien; kì-têu ke sa̍t-mà chhiong li-kiam.
[5] Song-ti â, ngien Ngì ke chûn-yùng chhêu-ko chû-thiên! Ngien Ngì ke yùng-kông chhûng-mân chhiòn-thi!
[6] Thi̍t-ngìn sat lò-mióng oi chok ngài; ngài pûn châi-nan ap-to poi kû-kû. Kì-têu chhai ngài ke mien-chhièn yet ham-chiáng, chhṳ-kâ fán-chón tiet lo̍k-hi.
[7] Song-ti â, ngài sîm kiên-thin, ngài sîm kiên-thin; ngài oi ngìm-sṳ̂, ngài oi chhong-kô siung-chan Ngì!
[8] Ngài ke sîm-sṳ̀n â, hó-siáng lé! Khìm â, sit â, hó-siáng lé! Ngài oi hêm ngit-thèu hong-hí-lòi!
[9] Chú â, ngài oi chhai lie̍t-koet chûng kám-chhia Ngì! Ngài oi chhai van-mìn chûng chhong-kô siung-chan Ngì!
[10] Ngì put-pien ke chhṳ̀-oi thai-to tù-thiên; Ngì ke sin-sṳ̍t tha̍t-to kiûng-chhông.
[11] Song-ti â, ngien Ngì ke chûn-yùng chhêu-ko chû-thiên! Ngien Ngì ke yùng-kông chhûng-mân chhiòn-thi!