[1] Song-ti â, ngài ke sîm kiên-thin; ngài oi chhiòn-sîm chhong-kô siung-chan Ngì!
[2] Khìm â, sit â, hó-siáng lé! Ngài oi hêm ngit-thèu hong-hí-lòi!
[3] Song-chú â, ngài oi chhai lie̍t-koet chûng kám-chhia Ngì! Ngài oi chhai van-mìn chûng chhong-kô siung-chan Ngì!
[4] Ngì put-pien ke chhṳ̀-oi thai-to tù-thiên; Ngì ke sin-sṳ̍t tha̍t-to kiûng-chhông.
[5] Song-ti â, ngien Ngì ke chûn-yùng chhêu-ko chû-thiên! Ngien Ngì ke yùng-kông chhûng-mân chhiòn-thi!
[6] Vi-tó oi pûn Ngì só-siak ke chṳ́-mìn tet-kiu, khiù Ngì en ngài-têu, yung thai-nèn chṳ́n-kiu ngài-têu.
[7] Song-ti tui Kì ke sṳn-só siên-ko kóng: “Ngài oi tá-yàng, Ngài oi fûn-lie̍t Sṳ-kiam, chiông Sû-kot sân-lak pûn-pûn Ngài ke chṳ́-mìn.
[8] Kî-lie̍t he su̍k Ngài ke, Mâ-nâ-sî ya su̍k Ngài; Yî-fap-lièn he Ngài ke thèu-khûi; Yù-thai chhiu-he Ngài ke khièn-chhóng.
[9] Mô-ap he Ngài ke sé-kiok-phùn; Yî-tûng chhiu-he Ngài ke thi-phàn; Fî-li-sṳ he Ngài ke sú-hâ phai-chiong.”
[10] Má-ngìn nèn tai ngài tá-ngi̍p liá kiên-ku ke sàng? Má-ngìn nèn tai-liâng ngài hi-to Yî-tûng ke thi?
[11] Song-ti â, Ngì chṳn-kîn chiông ngài-têu fit-thet lé he-mò? Ngì m̀ thùng ngài-têu ke kiûn-chhui khiung-ha chhut-chan he-mò?
[12] Khiù Ngì pông-chhu ngài-têu kûng-kit thi̍t-ngìn, yîn-vi ngìn ke pông-chhu chhiòn-mò lu-yung.
[13] Yû Song-ti khiung-ha, ngài-têu chhiu voi sṳn-li; Kì yit-thin voi chien-tha̍p ngài-têu ke sù-thi̍t.