[1] Song-chú â, yùng-kông m̀-hó kûi-pûn ngài-têu, m̀-hó kûi-pûn ngài-têu! Yùng-kông oi yîn-vi Ngì ke chhṳ̀-oi lâu sin-sṳ̍t kûi chhai Ngì ke miàng-hâ!
[2] Cho-má-ke pûn lie̍t-koet kín-mun ngài-têu: “Ngì-têu ke Song-ti chhai nai-vi nè?”
[3] Ngài-têu ke Song-ti chhai thiên-táng; Kì cheu chhṳ-kâ ke chṳ́-yi hàng-sṳ.
[4] Kì-têu ke ngiéu-siong he kîm-ngiùn cho ke, he ngìn ke sûng-sú chṳ-chho chhut-lòi ke.
[5] Kì-têu yû choi, ya m̀-voi kóng-fa; sûi-yèn yû muk-chû, me m̀-voi khon;
[6] yû ngí-kûng, ya m̀-voi thâng; yû phi-kûng, me m̀-voi phi;
[7] yû sú, chúng-he m̀-voi miâ; yû kiok, ya he m̀-voi hàng; hèu-lièn, me m̀-voi chhut-sâng.
[8] Ngien yit-chhiet chṳ-chho lâu sin-kho ngiéu-siong ke ngìn, lûng-chúng thùng kì-têu só-cho ke ngiéu-siong khiung-yong.
[9] Yî-set-lie̍t-ngìn â, oi sin-kho Song-chú! Kì he ngì-têu ke pông-chhu lâu tún-phài.
[10] Â-lùn-kâ ke chung chi-sṳ̂ â, oi sin-kho Song-chú! Kì he ngì-têu ke pông-chhu lâu tún-phài.
[11] Kin-vi Song-chú ke â, oi sin-kho Kì! Kì he ngì-têu ke pông-chhu lâu tún-phài.
[12] Song-chú yit-chhṳ̍t ku-ngiam ngài-têu; Kì hàn-oi su-fuk pûn ngài-têu; Kì oi su-fuk pûn Yî-set-lie̍t-kâ ke ngìn-mìn; Kì oi su-fuk pûn Â-lùn-kâ ke chung chi-sṳ̂.
[13] Song-chú oi su-fuk pûn kin-vi Kì ke ngìn, mò-lun thi-vi kô-tâi lûng-chúng yû-fun.
[14] Ngien Song-chú kâ-thiâm chṳ́-ńg pûn ngì-têu, pûn ngì-têu ke chṳ́-sûn ye̍t-lòi ye̍t-tô.
[15] Ngien Song-chú su-fuk pûn ngì-têu; Kì he chhóng-chho thiên-thi ke Chú!
[16] Thiên, chhiu-he Song-chú ke thiên; thi, Kì chhiu su-pûn ngìn-lui.
[17] Sí-ngìn m̀-voi chan-mî Song-chú; lo̍k yîm-fú ke ya he khiung-yong.
[18] Chúng-he, ngài-têu sâng-sâng ke ngìn oi siung-chan Song-chú, tui liá-ha chhṳ̍t-to yún-yún yén-yén! Hâ-li-lu-yá!