[1] हे यहोवा, मोर बिनती ला सुन अऊ मोला जबाब दे, काबरकि मेंह गरीब अऊ जरूरतमंद अंव।
[2] मोर परान के रकछा कर, काबरकि मेंह तोर बर बिसवासयोग्य हंव; अपन सेवक के उद्धार कर, जऊन ह कि तोर ऊपर भरोसा रखथे। तेंह मोर परमेसर अस;
[3] हे परभू, मोर ऊपर दया कर, काबरकि मेंह दिन भर तोला पुकारथंव।
[4] हे परभू, अपन सेवक ला आनंदित कर, काबरकि मेंह तोर ऊपर भरोसा रखथंव।
[5] हे परभू, तें छेमा करइया अऊ बने अस, जऊन मन तोर नांव लेथें, ओ जम्मो ला तेंह बहुंत मया करथस।
[6] हे यहोवा, मोर पराथना ला सुन; मोर बात ला सुनके मोर ऊपर दया कर।
[7] जब मेंह संकट म रहिथंव, त मेंह तोला पुकारथंव, काबरकि तेंह मोला जबाब देथस।
[8] हे परभू, देवतामन म तोर सहीं कोनो नइं एं; कोनो भी काम के तुलना तोर काम से करे नइं जा सकय।
[9] हे परभू, ओ जम्मो जाति के मनखे जेमन ला तेंह बनाय हस, ओमन आहीं अऊ तोर आघू म अराधना करहीं; ओमन तोर नांव के महिमा करहीं।
[10] काबरकि तेंह महान अस अऊ अद्भूत काम करथस; सिरिप तेंह परमेसर अस।
[11] हे यहोवा, अपन रसता मोला देखा, ताकि मेंह तोर बिसवासयोग्यता ऊपर भरोसा करंव; मोला न भटकनेवाला मन दे, ताकि मेंह तोर नांव के भय मानंव।
[12] हे परभू मोर परमेसर, मेंह अपन पूरा मन से तोर परसंसा करहूं; मेंह तोर नांव के महिमा हमेसा करहूं।
[13] काबरकि तेंह मोला अब्बड़ मया करथस; तेंह मोला गहरई ले, मिरतू-लोक ले बचाय हस।
[14] हे परमेसर, घमंडी बिरोधीमन मोर ऊपर हमला करत हें; निरदयी मनखेमन मोला मार डारे के कोसिस करत हें— ओमन के मन म तोर बर कोनो आदर नइं ए।
[15] पर हे परभू, तेंह दयालु अऊ अनुग्रहकारी परमेसर अस, देरी से कोप करइया अस, अऊ बहुंत मया अऊ बिसवासयोग्यता ले भरे हस।
[16] मोर कोति देख अऊ मोर ऊपर दया कर; अपन सेवक कोति ले अपन ताकत ला देखा; मोर उद्धार कर, काबरकि मेंह तोर सेवा करथंव जइसे कि मोर दाई घलो करिस।
[17] अपन भलई के कोनो चिनहां देखा, ताकि मोर बईरीमन ओला देखें अऊ सरमिंदा होवंय, काबरकि हे यहोवा, तेंह मोर मदद करे हस अऊ मोला सांति दे हस।