<भजन-संहिता 67

[1] परमेसर ह हमर ऊपर अनुग्रह करय अऊ हमन ला आसीस देवय अऊ अपन मुहूं के अंजोर हमर ऊपर चमकावय—

[2] ताकि धरती म तोर ईछा, अऊ जम्मो जाति म तोर उद्धार के पता चलय।

[3] हे परमेसर, मनखेमन तोर परसंसा करंय; जम्मो मनखेमन तोर परसंसा करंय।

[4] देस-देस के मनखेमन खुसी मनांय अऊ आनंद के गीत गावंय, काबरकि तें मनखेमन ऊपर बिगर पखियपात के सासन करथस अऊ धरती के देस-देस के मनखेमन के अगुवई करथस।

[5] हे परमेसर, मनखेमन तोर परसंसा करंय; जम्मो मनखेमन तोर परसंसा करंय।

[6] भुइयां ह अपन फसल देथे; परमेसर, हमर परमेसर हमन ला आसीस देथे।

[7] परमेसर हमन ला अऊ आसीस देवय, ताकि धरती के जम्मो छोर तक मनखेमन ओकर भय मानंय।