[1] हे यहोवा, मोर सच्चई के बिनती ला सुन; मोर गोहार ला सुन। मोर पराथना ला सुन— येह कपटरहित बात बोलइया मुहूं ले निकले हवय।
[2] मोर नियाय तोरेच करा ले आथे; तोर आंखी ह सही बात ला देखय।
[3] हालाकि तेंह मोर मन ला जांचथस, हालाकि रथिया तेंह मोला परखथस अऊ मोला जांचथस, तभो ले तेंह पाबे कि मेंह कोनो दुस्टता के योजना नइं बनाय हंव; मोर मुहूं ह कोनो पाप नइं करे हवय।
[4] हालाकि मनखेमन मोला घूस देय के कोसिस करिन, पर तोर दिये गय हुकूम के जरिये मेंह अपनआप ला गलत काम ले दूरिहा रखे हंव।
[5] मोर पांव ह तोर रसता ला धरे हवय; मोर गोड़ ह नइं लड़खड़ाय हवय।
[6] हे परमेसर, मेंह तोला पुकारत हंव, काबरकि तेंह मोला जबाब देबे; अपन कान ला मोर कोति लगा अऊ मोर पराथना ला सुन।
[7] अपन बड़े मया के अद्भूत काममन ला मोला देखा, तें जऊन ह अपन जेवनी हांथ के दुवारा ओमन ला बचाथस, जऊन मन अपन बईरीमन ले तोर करा सरन लेथें।
[8] मोला अपन आंखी के पुतली सहीं रख; मोला अपन डेना के छइहां म छुपा ले
[9] ओ दुस्ट मनखेमन ले, जेमन मोला नास करे बर निकले हवंय, ओ मोर मरनहार बईरीमन ले, जेमन मोला घेर ले हवंय।
[10] ओमन अपन कठोर हिरदय ला बंद कर लेथें, अऊ ओमन के मुहूं ले घमंड के बात निकलथे।
[11] ओमन मोर पता लगा ले हवंय, अऊ अब ओमन मोला घेरत हवंय, मोला भुइयां म पटके बर ओमन के आंखीमन सचेत हवंय।
[12] ओमन सिकार के भूखा एक सिंह सहीं अंय, ओ भयंकर सिंह, जऊन ह ओधा लेके घात म बईठे रहिथे।
[13] हे यहोवा, उठ, ओमन के सामना कर, ओमन ला पटक दे; अपन तलवार के दुवारा मोला दुस्ट ले बचा।
[14] हे यहोवा, अपन हांथ के दुवारा मोला अइसन मनखेमन ले बचा, ये संसार के ओ मनखेमन ले, जेमन के ईनाम इही जिनगी म हवय। ओमन के पेट ओमा ले भरय, जेला तेंह दुस्टमन बर रखे हस; ओमन के लइकामन ओमा ले पेट भरके खावंय, अऊ ओमा ले ओमन के छोटे लइकामन बर घलो बच जावय।
[15] जहां तक मोर बात ए, मेंह बचाय जाहूं अऊ तोर चेहरा ला देखहूं; जब मेंह जागहूं, त तोर सरूप ला देखके संतोस करहूं।